മുംബൈ: മുംബൈയിൽ വിദ്യാർത്ഥി പ്രതിഷേധത്തിനിടെ സമരക്കാരെ കൊണ്ടുപോയ പോലീസ് വാനിന് മുന്നിൽ ഒറ്റയ്ക്ക് തടസ്സം നിന്ന് ശ്രദ്ധനേടിയ 27 കാരിയായ മോഡൽ റിയ യാദവ് ആഹിർ സൈബർ ആക്രമണത്തിനെതിരെ പരാതി നൽകി. സംഭവത്തിന്റെ വീഡിയോകൾ വൈറലായതിന് പിന്നാലെ തനിക്കെതിരെ വ്യാപകമായ ഓൺലൈൻ അധിക്ഷേപവും വ്യാജ പ്രചാരണങ്ങളും നടക്കുകയാണെന്ന് ചൂണ്ടിക്കാട്ടിയാണ് റിയ മഹാരാഷ്ട്ര സൈബർ സെല്ലിനെ സമീപിച്ചത്.(Rhiya Ahir Files Cyber Crime Complaint Over Online Harassment After Mumbai Police Van Incident)
ജൂലൈ 22-ന് ശിവാജി പാർക്കിൽ വെച്ച് നടന്ന പ്രതിഷേധത്തിനിടെയായിരുന്നു റിയ പോലീസ് വാൻ തടഞ്ഞത്. എന്നാൽ ഇതിനുപിന്നാലെ ചില സോഷ്യൽ മീഡിയ അക്കൗണ്ടുകൾ തനിക്കെതിരെ കടുത്ത സൈബർ ബുള്ളിയിംഗും അശ്ലീല അധിക്ഷേപങ്ങളും അഴിച്ചുവിട്ടതായി റിയ പറഞ്ഞു. താൻ അഡൽറ്റ് കണ്ടന്റ് ക്രിയേറ്ററാണെന്ന് തെറ്റായി ചിത്രീകരിക്കാനും, ഇൻസ്റ്റാഗ്രാമിലൂടെ പണം ഈടാക്കി ഇത്തരം ചിത്രങ്ങൾ വിൽക്കുന്നുണ്ടെന്നും വ്യാജ കഥകൾ പ്രചരിപ്പിക്കാനും ചില പ്രമുഖ സോഷ്യൽ മീഡിയ പ്രൊഫൈലുകൾ ശ്രമിച്ചതായി അവർ ആരോപിച്ചു.
തന്റെ ചിത്രങ്ങൾ മങ്ങലേൽപ്പിച്ച് പ്രചരിപ്പിച്ചുകൊണ്ട് വ്യാജ പ്രചാരണങ്ങൾ നടത്തുകയാണെന്നും, ഇതിൽ നിന്ന് താൻ ഒരു രൂപ പോലും സമ്പാദിച്ചിട്ടില്ലെന്നും റിയ വ്യക്തമാക്കി. അധിക്ഷേപങ്ങൾക്കെതിരെ എഫ്.ഐ.ആർ രജിസ്റ്റർ ചെയ്ത് ശക്തമായ നിയമനടപടി സ്വീകരിക്കണമെന്നും റിയ ആവശ്യപ്പെട്ടു. റിയയുടെ പരാതി ലഭിച്ചിട്ടുണ്ടെന്നും ആരോപണങ്ങൾ പരിശോധിച്ച ശേഷം തുടർനടപടികൾ സ്വീകരിക്കുമെന്നും ഡെപ്യൂട്ടി പോലീസ് കമ്മീഷണർ ദത്ത നലവാഡെ അറിയിച്ചു.
Story Summary
Model Rhiya Yadav Ahir, who gained prominence after blocking a police van carrying detained student protesters in Mumbai, has filed a complaint with the Maharashtra Cyber Cell regarding online harassment and defamation. She requested an FIR against those creating false narratives about her content creation and circulating blurred/defamatory posts.
