ന്യൂഡൽഹി: നീറ്റ് ചോദ്യപ്പേപ്പർ ചോർച്ച വിഷയത്തിൽ ഇതുവരെ പുലർത്തിയ മൗനത്തിന്റെ കാരണം വ്യക്തമാക്കി എം.പി രാഘവ് ഛദ്ദ. പരീക്ഷാ ചോർച്ചകൾക്കെതിരെയുള്ള കേന്ദ്ര സർക്കാരിന്റെ പുതിയ ബില്ലിന്മേൽ രാജ്യസഭയിൽ നടന്ന ചർച്ചയിലാണ് മുൻ എ.എ.പി നേതാവ് കൂടിയായ ഛദ്ദ തന്റെ നിലപാട് പരസ്യമാക്കിയത്. കേവലം മാധ്യമ ശ്രദ്ധ നേടാനല്ല, മറിച്ച് വിഷയത്തിൽ ശാശ്വത പരിഹാരം കാണാനാണ് താൻ ശ്രമിച്ചതെന്ന് അദ്ദേഹം പറഞ്ഞു.(Raghav Chadha Rajya Sabha Speech NEET Paper Leak Anti Paper Leak Bill)
പ്രതിപക്ഷത്തായിരുന്നപ്പോൾ സർക്കാരിനോട് ചോദ്യങ്ങൾ ചോദിക്കുകയായിരുന്നു തന്റെ ചുമതലയെന്നും, എന്നാൽ ഇപ്പോൾ ഭരണപക്ഷത്തായതിനാൽ പ്രശ്നങ്ങൾക്ക് പരിഹാരം കണ്ടെത്തുകയാണ് തന്റെ ഉത്തരവാദിത്തമെന്നും എ.എ.പിയെയും കോൺഗ്രസിനെയും ലക്ഷ്യമിട്ട് 37-കാരനായ എം.പി വ്യക്തമാക്കി. നീറ്റ് പരീക്ഷ എഴുതുന്ന വിദ്യാർത്ഥികളുടെയും അവരുടെ കുടുംബങ്ങളുടെയും കഷ്ടപ്പാടുകൾ തനിക്ക് മനസ്സിലാകും. കോട്ടയിലും ഡൽഹിയിലും പോയി കഠിനപരിശീലനം നടത്തുന്ന വിദ്യാർത്ഥികളുടെ ആകുലതകളും ദേഷ്യവും തികച്ചും ന്യായമാണെന്ന് അദ്ദേഹം പറഞ്ഞു.
വിദ്യാർത്ഥികളുടെ പരാതികൾ രക്ഷിതാവിനെപ്പോലെ കേട്ട പ്രധാനമന്ത്രി നരേന്ദ്ര മോദി ഉടൻ തന്നെ നടപടികളിലേക്ക് കടന്നു. കേസ് അന്വേഷണം വേഗത്തിലാക്കി 75 ദിവസത്തിനുള്ളിൽ ഫാസ്റ്റ് ട്രാക്ക് കോടതിയിൽ കുറ്റപത്രം സമർപ്പിച്ചതായി അദ്ദേഹം ചൂണ്ടിക്കാട്ടി. ഭാവിയിൽ നീറ്റ് പരീക്ഷകൾ ഒ.എം.ആർ ഷീറ്റുകൾക്ക് പകരം പൂർണ്ണമായും കമ്പ്യൂട്ടർ അധിഷ്ഠിത രീതിയിലേക്ക് മാറ്റുമെന്ന് അദ്ദേഹം അറിയിച്ചു.
ചോദ്യപ്പേപ്പർ ചോർച്ചയെ രാഷ്ട്രീയ കണ്ണടയിലൂടെ കാണരുതെന്ന് പറഞ്ഞ ഛദ്ദ, എ.എ.പി ഭരിക്കുന്ന പഞ്ചാബിൽ അടുത്തിടെ നടന്ന ഫാർമസി ഓഫീസർ പരീക്ഷാ ക്രമക്കേടുകളും കോൺഗ്രസ് ഭരിക്കുന്ന കർണാടകയിലെ എസ്.എസ്.എൽ.സി പരീക്ഷാ ചോർച്ചയും ചൂണ്ടിക്കാട്ടി ഇരു പാർട്ടികളെയും രൂക്ഷമായി വിമർശിച്ചു. ചോദ്യപ്പേപ്പർ ചോർച്ച തടയുന്നതിനുള്ള ചരിത്രപരമായ ‘പബ്ലിക് എക്സാമിനേഷൻസ് ഭേദഗതി ബിൽ, 2026’ പാസാക്കാൻ എല്ലാ രാഷ്ട്രീയ പാർട്ടികളും ഒന്നിച്ച് പിന്തുണയ്ക്കണമെന്ന് അദ്ദേഹം അഭ്യർത്ഥിച്ചു.
Story Summary
In a Rajya Sabha speech, BJP MP Raghav Chadha addressed his previous silence on the NEET paper leak issue, stating that his role has shifted from asking questions in the Opposition to providing solutions in the Treasury benches. Highlighting the Public Examinations Amendment Bill 2026, he announced computer-based exams for future NEET tests while criticizing AAP and Congress over state-level exam leak controversies.
