പൂനെ: മഹാരാഷ്ട്രയിലെ പ്രശസ്തമായ ലോഹഗഡ് കോട്ടയിൽ (Lohagad Fort) വെച്ച് 25-കാരനായ റിയൽ എസ്റ്റേറ്റ് വ്യവസായി കേതൻ അഗർവാളിനെ കൊക്കയിലേക്ക് തള്ളിവിട്ട് കൊലപ്പെടുത്തിയ കേസിൽ ഞെട്ടിക്കുന്ന കൂടുതൽ വിവരങ്ങൾ പുറത്ത്(Ketan Agarwal Murder Case Pune). കൊലപാതകം നടത്തുന്നതിന് മുൻപ് പ്രതികൾ മറ്റൊരു മലമുകളിൽ വെച്ച് കുറ്റകൃത്യം കൃത്യമായി ‘റിഹേഴ്സൽ’ (അഭ്യാസപ്രകടനം) നടത്തിയിരുന്നതായി പൂനെ റൂറൽ പോലീസ് കണ്ടെത്തി. കേതന്റെ പ്രതിശ്രുതവധു സിയ ഗോയൽ (20), ഇവരുടെ കാമുകൻ ചേതൻ ചൗധരി (22) എന്നിവരെ കസ്റ്റഡിയിൽ വാങ്ങി ചോദ്യം ചെയ്തപ്പോഴാണ് സിനിമകളെ വെല്ലുന്ന ആസൂത്രണത്തിന്റെ വിവരങ്ങൾ പോലീസിന് ലഭിച്ചത്.
കേതനെ കൊലപ്പെടുത്തുന്നതിന് മുൻപ് പൂനെ മാർക്കറ്റ് യാർഡിന് സമീപമുള്ള ലുല്ലാനഗറിലെ ഒരു ക്ലബ്ബിന്റെ അടുത്തുള്ള തുറസ്സായ മലമുകളിൽ വെച്ചാണ് ഇരുവരും ചേർന്ന് ഒരാളെ എങ്ങനെ താഴ്ചയിലേക്ക് തള്ളിയിടാം എന്ന് പരിശീലിച്ചതെന്ന് പ്രതികൾ സമ്മതിച്ചു. പ്രതി സിയ ഗോയലുമായി ഇന്ന് പോലീസ് ഈ റിഹേഴ്സൽ നടത്തിയ സ്ഥലത്ത് എത്തി ഇൻക്വസ്റ്റ് (Spot Panchnama) നടപടികൾ പൂർത്തിയാക്കി. ജൂൺ 18-നായിരുന്നു ലോഹഗഡ് കോട്ടയുടെ പടിഞ്ഞാറൻ അറ്റത്തെ കുത്തനെയുള്ള മലയിടുക്കിൽ നിന്ന് കേതൻ അഗർവാൾ വീണ് മരിച്ചത്. ആദ്യഘട്ടത്തിൽ ട്രെക്കിങ്ങിനിടെയുണ്ടായ അപകടമരണമെന്നാണ് കരുതിയിരുന്നതെങ്കിലും, കേതന്റെ സഹോദരിക്ക് സിയയുടെ പെരുമാറ്റത്തിൽ തോന്നിയ സംശയത്തെ തുടർന്ന് നടത്തിയ അന്വേഷണത്തിലാണ് വൻ ഗൂഢാലോചന പുറത്തുവന്നത്.
സിയയും കേതനും തമ്മിലുള്ള വിവാഹം ഈ വർഷം നവംബറിൽ നടത്താൻ നിശ്ചയിച്ചിരുന്നതാണ്. എന്നാൽ കഴിഞ്ഞ ഒക്ടോബർ മുതൽ ചേതനുമായി പ്രണയത്തിലായിരുന്ന സിയയ്ക്ക് ഈ വിവാഹത്തിന് താല്പര്യമില്ലായിരുന്നു. ഇതോടെയാണ് കേതനെ ഇല്ലാതാക്കാൻ ഇരുവരും കാഫെയിൽ വെച്ച് പ്ലാൻ ചെയ്തത്. ടോൾ പ്ലാസകളിലെ സിസിടിവി ക്യാമറകളിൽ പെടാതിരിക്കാൻ ചേതൻ 90 കിലോമീറ്ററിലധികം സ്കൂട്ടർ ഓടിച്ചാണ് ലോഹഗഡ് കോട്ടയിൽ എത്തിയത്. കോട്ടയിലെത്തിയ ശേഷം കേതനെ തള്ളിയിടാൻ സിയ ചേതന് പ്രത്യേക സിഗ്നൽ നൽകിയിരുന്നു. വെള്ളം കുടിക്കാനെന്ന വ്യാജേന സിയ നിലത്തിരുന്നപ്പോഴാണ് (സിഗ്നൽ) പിന്നാലെ വന്ന ചേതൻ കേതനെ അഗാധമായ കൊക്കയിലേക്ക് തള്ളിയിട്ടത്. താഴേക്ക് വീഴുന്നതിനിടെ കേതൻ രക്ഷയ്ക്കായി സിയയെ പിടിക്കാതിരിക്കാനാണ് സിയ തന്ത്രപൂർവ്വം മാറി നിലത്തിരുന്നതെന്ന് പോലീസ് പറയുന്നു.
മുൻപ് മെയ് 31-നും ജൂൺ 14-നും ഇവർ കേതനെ കോട്ടയിലെത്തിച്ച് കൊലപ്പെടുത്താൻ ശ്രമിച്ചിരുന്നുവെങ്കിലും പരാജയപ്പെട്ടിരുന്നു. ഒരു തവണ താഴേക്ക് തള്ളിയപ്പോൾ കേതൻ കാട്ടുചെടിയിൽ പിടിച്ച് രക്ഷപ്പെടുകയായിരുന്നു. അന്ന് പാമ്പിനെ കണ്ടപ്പോൾ പേടിച്ച് തള്ളിപ്പോയതാണെന്ന് പറഞ്ഞ് സിയ കേതനെ വിശ്വസിപ്പിച്ചു. പ്രതി ചേതന്റെ നടത്ത ശൈലി (Walking pattern) സിസിടിവി ദൃശ്യങ്ങളുമായി ഒത്തുനോക്കാൻ എഐ (AI) സാങ്കേതികവിദ്യ ഉപയോഗിച്ചുള്ള ‘ഗെയ്റ്റ് അനാലിസിസ്’ (Gait Analysis) നടത്താൻ പോലീസ് ഒരുങ്ങുകയാണ്. ഇതിനിടെ കേസിന്റെ ഗൗരവം കണക്കിലെടുത്ത് മഹാരാഷ്ട്ര സർക്കാർ കേസ് ഫാസ്റ്റ് ട്രാക്ക് കോടതിയിലേക്ക് മാറ്റുകയും പ്രശസ്ത നിയമവിദഗ്ദ്ധനും രാജ്യസഭാ എംപിയുമായ അഡ്വ. ഉജ്ജ്വൽ നികത്തിനെ (Ujjwal Nikam) സ്പെഷ്യൽ പബ്ലിക് പ്രോസിക്യൂട്ടറായി നിയമിക്കുകയും ചെയ്തു.
Story Summary:
Pune Rural Police investigation revealed that Siya Goyal (20) and her lover Chetan Chaudhary (22) had rehearsed the murder of her fiancé Ketan Agarwal (25) on a hill in Pune before pushing him off a cliff at Lohagad Fort on June 18. Following a tight plan involving pre-decided signals and a 90-km scooter ride to avoid tolls, the duo executed the crime. The Maharashtra government has moved the case to a fast-track court and appointed senior advocate Ujjwal Nikam as the Special Public Prosecutor.
