ന്യൂഡൽഹി: പെട്രോളിൽ 20 ശതമാനം എഥനോൾ കലർത്തിയ ‘ഇ20’ (E20) ഇന്ധനത്തിനെതിരെയുള്ള വിമർശനങ്ങൾ തെളിയിക്കാൻ കേന്ദ്ര റോഡ് ഗതാഗത മന്ത്രി നിതിൻ ഗഡ്കരി നടത്തിയ വെല്ലുവിളി ഏറ്റെടുത്ത് പ്രതിഷേധക്കാർ. ഇ20 ഇന്ധനം ഉപയോഗിച്ചതുമൂലം വാഹനം തകരാറിലായ ഒരാളെയെങ്കിലും ചൂണ്ടിക്കാണിക്കാൻ ഗഡ്കരി ആവശ്യപ്പെട്ടതിന് പിന്നാലെ, അങ്ങനെയുള്ള ആറ് പേരെ മാധ്യമങ്ങൾക്ക് മുന്നിൽ ഹാജരാക്കാൻ തയ്യാറാണെന്ന് തെഹ്സീൻ പൂനാവാല അറിയിച്ചു. എന്നാൽ ചർച്ച മാധ്യമങ്ങളുടെ സാന്നിധ്യത്തിൽ തത്സമയം സംപ്രേഷണം ചെയ്യണമെന്ന നിബന്ധനയാണ് പ്രതിഷേധക്കാർ മുന്നോട്ട് വെച്ചിരിക്കുന്നത്.(Protesters Accept Nitin Gadkari Challenge On E20 Ethanol Blended Petrol Issue)
കഴിഞ്ഞദിവസം ഒരു ദേശീയ മാധ്യമത്തിന് നൽകിയ അഭിമുഖത്തിലാണ് ഗഡ്കരി ഇ20 ഇന്ധനത്തെ ന്യായീകരിച്ചത്. ഇ20 ഇന്ധനം കാരണം ഏതെങ്കിലും പെട്രോൾ വാഹനത്തിന് കേടുപാടുകൾ സംഭവിച്ചതായി ആരും തെളിയിച്ചിട്ടില്ലെന്നും, അങ്ങനെയുണ്ടെങ്കിൽ ഡീലർമാർക്കോ മന്ത്രാലയത്തിനോ പരാതി നൽകാമെന്നും അദ്ദേഹം പറഞ്ഞിരുന്നു. കൂടാതെ എഥനോൾ ബിസിനസിൽ തന്റെ കുടുംബത്തിന് 0.07% ഓഹരി മാത്രമാണുള്ളതെന്നും ഇതിൽ വ്യക്തിപരമായ താൽപ്പര്യമില്ലെന്നും അദ്ദേഹം വ്യക്തമാക്കി. എന്നാൽ ഈ വിഹിതം പോലും പ്രതിവർഷം 50 മുതൽ 100 കോടി രൂപ വരെയുള്ള ബിസിനസ്സാണെന്ന് പൂനാവാല ആരോപിച്ചു.
രാജ്യത്തെ 80 ശതമാനം വാഹനങ്ങളും ഇ10 ഇന്ധനത്തിന് മാത്രം അനുയോജ്യമായവയാണെന്നും നിർബന്ധിത ഇ20 നടപ്പാക്കൽ വഴി മൈലേജ് കുറയുന്നതിനൊപ്പം വാഹനങ്ങളുടെ ഇന്ധന പൈപ്പുകളിലെ റബ്ബർ ഭാഗങ്ങൾക്ക് കേടുപാടുകൾ സംഭവിക്കുന്നുണ്ടെന്നുമാണ് വാഹന ഉടമകളുടെ പരാതി.
Story Summary
Activist Tehseen Poonawalla has accepted Union Minister Nitin Gadkari’s challenge to present victims of E20 ethanol-blended petrol. Poonawalla claimed to have six vehicle owners whose cars were damaged by E20 fuel, demanding a live-streamed meeting with the minister in front of the media. Motorists allege that the mandatory E20 fuel causes a drop in mileage and damages vehicle fuel systems.
