ന്യൂഡൽഹി: ചോദ്യപ്പേപ്പർ ചോർച്ചയ്ക്കെതിരെ പ്രതിഷേധിച്ച വിദ്യാർത്ഥികൾക്ക് നേരെയുണ്ടായ പോലീസ് അതിക്രമത്തിൽ കേന്ദ്ര സർക്കാരിനെ രൂക്ഷമായി വിമർശിച്ച് കോൺഗ്രസ് എം.പി പ്രിയങ്ക ഗാന്ധി. സമാധാനപരമായി പ്രതിഷേധിച്ച യുവാക്കൾക്ക് നേരെ പെല്ലറ്റ് ഗണ്ണുകളും എ.കെ.47 തോക്കുകളും പ്രയോഗിക്കേണ്ട സാഹചര്യം എന്തായിരുന്നുവെന്ന് ലോക്സഭയിൽ പരീക്ഷാ തട്ടിപ്പ് തടയൽ ബില്ലിന്മേൽ നടന്ന ചർച്ചയിൽ അവർ ചോദിച്ചു.(Priyanka Gandhi Lok Sabha Speech Paper Leak Debate PM Modi)
സഭയിൽ സർക്കാരിനെതിരെ അതിരൂക്ഷമായ കടന്നാക്രമണമാണ് പ്രിയങ്ക നടത്തിയത്. വിദ്യാർത്ഥികൾക്ക് നേരെയുണ്ടായ പോലീസ് അതിക്രമത്തിന് ഉത്തരവിട്ടത് പ്രധാനമന്ത്രി നരേന്ദ്ര മോദിയാണോ അതോ ആഭ്യന്തരമന്ത്രി അമിത് ഷായാണോ എന്ന് അവർ തുറന്നടിച്ചു. ബി.ജെ.പി സർക്കാർ നിരന്തരം രാജ്യത്ത് മോഷണങ്ങൾ നടത്തുകയാണെന്ന് പ്രിയങ്ക കുറ്റപ്പെടുത്തി. രാമക്ഷേത്ര സംഭാവനകൾ, പൊതുസ്വത്തുക്കൾ, കർഷകരുടെ ഭൂമി എന്നിവയ്ക്ക് പുറമേ രാജ്യത്തെ യുവാക്കളുടെ സ്വപ്നങ്ങളാണ് സർക്കാർ കവർന്നെടുത്ത ഏറ്റവും വലിയ മോഷണമെന്ന് അവർ പറഞ്ഞു.
പ്രക്ഷോഭം നടത്തുന്ന വിദ്യാർത്ഥികളെ സ്വാധീനിക്കാൻ ഇൻസ്റ്റഗ്രാം റീലുകൾ ചെയ്യുന്ന പ്രധാനമന്ത്രിയോട്, ‘ക്യാമറ ആംഗിളല്ല, ഹൃദയത്തിന്റെ ആംഗിളാണ് മാറ്റേണ്ടത്’ എന്ന് പ്രിയങ്ക പരിഹസിച്ചു. പല ആംഗിളുകളിൽ വീഡിയോകൾ ഉണ്ടാക്കിയതുകൊണ്ട് മാത്രം ജെൻ സി തലമുറയുടെ വിശ്വാസം നേടിയെടുക്കാനാകില്ല. സ്വന്തം രാജ്യത്തെ യുവാക്കൾക്ക് നേരെ പെല്ലറ്റ് ഗണ്ണുകളും എ.കെ-47 തോക്കുകളും പ്രയോഗിക്കാൻ അവർ ഭീകരവാദികളാണോ? ഇതിന് ഉത്തരവിട്ടത് പ്രധാനമന്ത്രിയാണോ ആഭ്യന്തരമന്ത്രിയാണോ എന്ന് വ്യക്തമാക്കണം.
കഴിഞ്ഞ ഒരു പതിറ്റാണ്ടിനിടെ രാജ്യത്ത് 152 ചോദ്യപ്പേപ്പർ ചോർച്ചകളാണ് ഉണ്ടായത്. കോടിക്കണക്കിന് വിദ്യാർത്ഥികളുടെ ഭാവിയാണ് തകർന്നത്. എന്നാൽ ഇതുവരെ ഒരു കുറ്റവാളി പോലും ശിക്ഷിക്കപ്പെട്ടിട്ടില്ല. വിദ്യാഭ്യാസ സ്ഥാപനങ്ങളിൽ ആർ.എസ്.എസ് പ്രചാരക്മാരെ തിരുകിക്കയറ്റി ബി.ജെ.പി വിദ്യാഭ്യാസ സമ്പ്രദായത്തെ തകർത്തു. നാഷണൽ ടെസ്റ്റിംഗ് ഏജൻസി അടിച്ചേൽപ്പിച്ച് കാര്യങ്ങൾ കൂടുതൽ സങ്കീർണ്ണമാക്കുക മാത്രമാണ് സർക്കാർ ചെയ്തത്.
Story Summary
Congress MP Priyanka Gandhi launched a fiery attack on the Centre during the Lok Sabha debate on the anti-paper leak bill, questioning the use of pellet guns and AK-47s against student protesters. Criticizing Prime Minister Narendra Modi’s social media outreach, she remarked that the PM should change his ‘heart’s angle, not the camera angle’ while accusing the government of stealing the dreams of the country’s youth.
