ഹൈദരാബാദ്: ആന്ധ്രപ്രദേശ് ഉപമുഖ്യമന്ത്രിയും ജനപ്രിയ നടനുമായ പവൻ കല്യാണിനെ (Pawan Kalyan) ശസ്ത്രക്രിയയ്ക്ക് വിധേയനാക്കി. വെള്ളിയാഴ്ച ഔദ്യോഗിക യോഗങ്ങൾക്കിടെ അനുഭവപ്പെട്ട കടുത്ത ശാരീരിക അസ്വസ്ഥതകളെ തുടർന്നാണ് അദ്ദേഹത്തെ ആശുപത്രിയിൽ പ്രവേശിപ്പിച്ചത്. ശനിയാഴ്ച വൈകുന്നേരമായിരുന്നു ശസ്ത്രക്രിയ നടന്നത്.
പവൻ കല്യാൺ സുഖം പ്രാപിച്ചു വരികയാണെന്നും ആശങ്കപ്പെടാനില്ലെന്നും അദ്ദേഹത്തിന്റെ ഭാര്യ അന്ന ലെഷ്നേവ ഇൻസ്റ്റാഗ്രാമിലൂടെ അറിയിച്ചു. “എല്ലാം ശുഭകരമാണ്” എന്ന് അവർ കുറിച്ചു. വെള്ളിയാഴ്ച ദേഹാസ്വാസ്ഥ്യം അനുഭവപ്പെട്ടതിനെത്തുടർന്ന് നടത്തിയ എംആർഐ സ്കാനിംഗിലാണ് ശസ്ത്രക്രിയ വേണമെന്ന് ഡോക്ടർമാർ നിർദ്ദേശിച്ചത്. അടുത്ത 7 മുതൽ 10 ദിവസം വരെ അദ്ദേഹം പൂർണ്ണ വിശ്രമത്തിലായിരിക്കും. പ്രധാനമന്ത്രി നരേന്ദ്ര മോദി പവൻ കല്യാണുമായി ഫോണിൽ സംസാരിക്കുകയും അദ്ദേഹത്തിന്റെ ക്ഷേമം അന്വേഷിക്കുകയും ചെയ്തു. അദ്ദേഹം വേഗത്തിൽ സുഖം പ്രാപിക്കുമെന്ന് പ്രധാനമന്ത്രി എക്സിലൂടെ ആശംസിച്ചു.
സിനിമ-രാഷ്ട്രീയ മേഖലയിലുള്ള നിരവധി പ്രമുഖരും ആരാധകരും പവൻ കല്യാണിന്റെ വേഗത്തിലുള്ള തിരിച്ചുവരവിനായി പ്രാർത്ഥനകളുമായി രംഗത്തെത്തിയിട്ടുണ്ട്. പൂർണ്ണ ആരോഗ്യവാനായി കുറച്ചു ദിവസങ്ങൾക്കുള്ളിൽ അദ്ദേഹം ജനസേവനത്തിലേക്ക് മടങ്ങിയെത്തുമെന്നാണ് റിപ്പോർട്ടുകൾ.
Summary: Andhra Pradesh Deputy CM and superstar Pawan Kalyan is steadily recovering after undergoing surgery on Saturday. He was hospitalized following sudden physical discomfort during a meeting on Friday. His wife, Anna Lezhneva, confirmed on Instagram that he is doing well. Prime Minister Narendra Modi spoke with him and wished him a speedy recovery. Doctors have advised 7 to 10 days of rest before he resumes official duties.
