ന്യൂഡൽഹി: ലക്ഷക്കണക്കിന് മെഡിക്കൽ വിദ്യാർത്ഥികൾ എഴുതിയ നീറ്റ് യുജി 2026 പരീക്ഷ റദ്ദാക്കി. പരീക്ഷയുടെ വിശ്വാസ്യതയെ ബാധിക്കുന്ന തരത്തിൽ ‘ഗസ് പേപ്പർ’ ചോർന്നുവെന്ന കണ്ടെത്തലിനെത്തുടർന്നാണ് നാഷണൽ ടെസ്റ്റിംഗ് ഏജൻസിയുടെ അടിയന്തര തീരുമാനം. സംഭവത്തിൽ സമഗ്രമായ അന്വേഷണം നടത്താൻ കേന്ദ്ര സർക്കാർ സിബിഐയോട് ആവശ്യപ്പെട്ടു.(NEET UG 2026 Cancelled NTA Announces Re Exam CBI Probe Into Paper Leak)
രാജസ്ഥാനിലെ സിക്കർ കേന്ദ്രീകരിച്ച് പരീക്ഷയ്ക്ക് മുൻപ് തന്നെ ചോദ്യങ്ങൾ അടങ്ങിയ പിഡിഎഫ് ഫയലുകൾ വാട്സാപ്പ് വഴി പ്രചരിച്ചതായി കണ്ടെത്തിയിരുന്നു. രാജസ്ഥാൻ പോലീസിന്റെ സ്പെഷ്യൽ ഓപ്പറേഷൻ ഗ്രൂപ്പ് നടത്തിയ പ്രാഥമിക അന്വേഷണത്തിൽ, പ്രചരിച്ച ‘ഗസ് പേപ്പറി’ലെ 120-ഓളം ചോദ്യങ്ങൾ യഥാർത്ഥ ചോദ്യപേപ്പറുമായി ഒത്തുപോകുന്നതായി വ്യക്തമായി.
പ്രിന്റിംഗ് പ്രസ്സിൽ നിന്നോ ചോദ്യപേപ്പർ സെറ്റ് ചെയ്തവരിൽ നിന്നോ ചോർച്ച ഉണ്ടായതായാണ് സംശയിക്കുന്നത്. ഇതിനോടകം രാജസ്ഥാനിൽ നിന്ന് 45-ഓളം പേരെ പോലീസ് കസ്റ്റഡിയിലെടുത്തു. പരീക്ഷാ പ്രക്രിയയിൽ ക്രമക്കേട് നടന്നതായി ബോധ്യപ്പെട്ട സാഹചര്യത്തിൽ, സുതാര്യത ഉറപ്പാക്കാൻ പരീക്ഷ റദ്ദാക്കണമെന്ന് ഹൈക്കമാൻഡ് തീരുമാനിക്കുകയായിരുന്നു.
പരീക്ഷ വീണ്ടും നടത്തുമെന്ന് എൻടിഎ അറിയിച്ചിട്ടുണ്ട്. പുനഃപരീക്ഷയുടെ തീയതി എൻടിഎ ഉടൻ ഔദ്യോഗിക വെബ്സൈറ്റ് വഴി അറിയിക്കും. വിദ്യാർത്ഥികൾ വീണ്ടും രജിസ്റ്റർ ചെയ്യേണ്ടതില്ല. പഴയ അപേക്ഷാ വിവരങ്ങൾ തന്നെ മതിയാകും. പരീക്ഷയ്ക്ക് അധിക ഫീസ് ഈടാക്കില്ല. മുൻപ് നൽകിയ ഫീസ് വിദ്യാർത്ഥികൾക്ക് റീഫണ്ട് ചെയ്യുമെന്നും പുനഃപരീക്ഷ എൻടിഎയുടെ ആഭ്യന്തര ഫണ്ട് ഉപയോഗിച്ച് നടത്തുമെന്നും അറിയിച്ചിട്ടുണ്ട്. പുനഃപരീക്ഷയ്ക്ക് മുന്നോടിയായി പുതിയ അഡ്മിറ്റ് കാർഡുകൾ വിദ്യാർത്ഥികൾക്ക് ലഭ്യമാക്കും.
ചോദ്യപേപ്പർ ചോർച്ചയ്ക്ക് പിന്നിൽ സംഘടിത കുറ്റകൃത്യം നടന്നിട്ടുണ്ടോ എന്ന് സിബിഐ പരിശോധിക്കും. കേരളം, ഉത്തരാഖണ്ഡ്, രാജസ്ഥാൻ എന്നിവിടങ്ങളിലേക്ക് അന്വേഷണം വ്യാപിപ്പിച്ചിട്ടുണ്ട്. കേരളത്തിലെ ഒരു മെഡിക്കൽ വിദ്യാർത്ഥിക്ക് ചോർച്ചയിൽ പങ്കുണ്ടെന്ന സംശയവും അന്വേഷണ പരിധിയിലുണ്ട്. 22 ലക്ഷത്തോളം വിദ്യാർത്ഥികളുടെ ഭാവി പ്രതിസന്ധിയിലായ സംഭവത്തിൽ കുറ്റക്കാർക്കെതിരെ കർശന നടപടിയെടുക്കാനാണ് സർക്കാർ നീക്കം.
Story Summary
NTA has cancelled the NEET UG 2026 examination held on May 3 following allegations of a paper leak. The government has ordered a CBI probe into the ‘guess paper’ circulation. A re-examination will be conducted soon, and candidates are not required to pay additional fees or re-register.
