ഉജ്ജൻ: മധ്യപ്രദേശിലെ ഉജ്ജയിനിൽ മുഹറം ഘോഷയാത്രയ്ക്കിടെ ക്രെയിൻ ഉപയോഗിച്ച് ഉയരത്തിൽ പൊക്കിയ കാർ പൊട്ടിത്തെറിച്ചു (Muharram Procession Stunt). ബദ്നഗർ പ്രദേശത്ത് നടന്ന ഘോഷയാത്രയ്ക്കിടെയാണ് ഒരു ക്രെയിൻ ഉപയോഗിച്ച് കാർ ഏകദേശം 40 അടി ഉയരത്തിൽ ഉയർത്തിയ ശേഷം പൊട്ടിത്തെറിപ്പിച്ചത്. നഗരത്തിൽ ജനങ്ങൾ തിങ്ങിനിറഞ്ഞ സ്ഥലത്തായിരുന്നു ഈ അപകടകരമായ സ്റ്റണ്ട് നടന്നത്. സംഭവത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ പോലീസുകാരും അധികൃതരും ശക്തമായ നടപടികളുമായി രംഗത്തെത്തി.
പ്രാഥമിക അന്വേഷണത്തിൽ കാറിനുള്ളിൽ പടക്കങ്ങൾ വെച്ച് കൃത്രിമമായി പൊട്ടിത്തെറി ഉണ്ടാക്കുകയായിരുന്നുവെന്ന് വ്യക്തമായിട്ടുണ്ട്. റോക്കറ്റ് പോലുള്ള പടക്കങ്ങൾ കാറിനുള്ളിൽ വെച്ച് പൊട്ടിച്ചതോടെ ഗ്യാസ് നിറയുകയും ഗ്ലാസുകൾ തകർന്ന് സ്ഫോടനം നടന്നതുപോലെ അനുഭവപ്പെടുകയുമായിരുന്നു. ലോക്കൽ അഖാഡകൾ തമ്മിലുള്ള മത്സരത്തിന്റെ ഭാഗമായാണ് ഇത്തരമൊരു സ്റ്റണ്ട് ചെയ്തതെന്ന് പോലീസ് പറയുന്നു. സോഷ്യൽ മീഡിയയിൽ വൈറലാകാൻ വേണ്ടിയാണ് ഇവർ ഇത്രയും വലിയ അപകടസാധ്യതയുള്ള സ്റ്റണ്ട് നടത്തിയത്. സംഭവത്തിൽ നാല് പേർക്കെതിരെ പോലീസ് കേസെടുത്തിട്ടുണ്ട്. ഘോഷയാത്രയ്ക്ക് മാത്രമാണ് അനുമതി നൽകിയിരുന്നതെന്നും ഇത്തരം അപകടകരമായ കാര്യങ്ങൾ ചെയ്യാൻ ആർക്കും അനുവാദം നൽകിയിരുന്നില്ലെന്നും എ.എസ്.പി കരൺ ദീപ് സിംഗ് വ്യക്തമാക്കി.
Summary: A dangerous stunt during a Muharram procession in Ujjain, Madhya Pradesh, has sparked public outrage after a car was hoisted 40 feet in the air by a crane and then “blown up” using firecrackers placed inside the vehicle. The stunt, staged by local groups to attract attention and gain social media traction, drew significant criticism for its recklessness in a crowded area. Police have registered an FIR against four individuals, including the organizers and the crane owner, stating that such hazardous activities were strictly prohibited and not part of the permitted procession events.
