ന്യൂഡൽഹി: തെക്കുപടിഞ്ഞാറൻ കാലവർഷം ജൂലൈ 9-ഓടെ രാജ്യത്തുടനീളം വ്യാപിച്ചതായി ഇന്ത്യൻ കാലാവസ്ഥാ വകുപ്പ്. വരും ദിവസങ്ങളിൽ ഭൂരിഭാഗം സംസ്ഥാനങ്ങളിലും ശക്തമായ മഴ തുടരുമെന്നാണ് പ്രവചനം. ഉത്തരേന്ത്യൻ മലയോര മേഖലകളിലും ഗംഗാസമതലങ്ങളിലും വരും മണിക്കൂറുകളിൽ കനത്ത മഴയ്ക്ക് സാധ്യതയുണ്ട്. ഹിമാചൽ പ്രദേശ്, ഉത്തരാഖണ്ഡ്, ജമ്മു കശ്മീർ, ഉത്തർപ്രദേശ്, മധ്യപ്രദേശ്, പശ്ചിമ ബംഗാൾ, ബിഹാർ എന്നീ സംസ്ഥാനങ്ങൾക്ക് കാലാവസ്ഥാ വകുപ്പ് കനത്ത ജാഗ്രതാ നിർദ്ദേശം നൽകിയിട്ടുണ്ട്.(Monsoon covers entire India IMD forecasts heavy rain in Himachal and Uttarakhand)
കേരളം, കർണാടകയുടെ ചില ഭാഗങ്ങൾ, തമിഴ്നാട്, പുതുച്ചേരി, തെലങ്കാന എന്നിവിടങ്ങളിലും വരും ദിവസങ്ങളിൽ വ്യാപകമായ മഴ ലഭിക്കും. രാജ്യത്ത് മഴക്കെടുതിയുമായി ബന്ധപ്പെട്ട അപകടങ്ങളിൽ ഇതുവരെ 30 പേർ മരണപ്പെട്ടു. ഇതിൽ ഏറ്റവും കൂടുതൽ മരണം റിപ്പോർട്ട് ചെയ്തത് ഗുജറാത്തിലെ സൂറത്തിലാണ്; വെള്ളപ്പൊക്കത്തെ തുടർന്ന് ഇവിടെ 21 പേർക്ക് ജീവൻ നഷ്ടമായി.
ഹിമാചൽ പ്രദേശിൽ കനത്ത മഴ ജനജീവിതം പൂർണ്ണമായി സ്തംഭിപ്പിച്ചു. റോഡുകൾ തകരുകയും പാലങ്ങൾക്ക് കേടുപാടുകൾ സംഭവിക്കുകയും മരങ്ങൾ കടപുഴകി വീഴുകയും ചെയ്തതിനെ തുടർന്ന് സംസ്ഥാനത്തിന്റെ പല ഭാഗങ്ങളിലും സ്കൂളുകൾക്ക് അവധി പ്രഖ്യാപിച്ചു. കുല്ലു ജില്ലയിൽ മലയിടുക്കിൽ നിന്ന് കല്ലുകൾ ഉരുണ്ടുവീണ് 70 വയസ്സുകാരൻ മരണപ്പെട്ടു. ഷിംലയിൽ പല പ്രധാന റോഡുകളിലും ഗതാഗതം തടസ്സപ്പെട്ടു. കാൽക്ക-ഷിംല ദേശീയപാതയിൽ വൻതോതിൽ മണ്ണിടിച്ചിലും കല്ലുവീഴ്ചയും റിപ്പോർട്ട് ചെയ്തിട്ടുണ്ട്. സിർമൗർ, സോളൻ ജില്ലകളിലാണ് വ്യാഴാഴ്ച മുതൽ ഏറ്റവും കൂടുതൽ മഴ രേഖപ്പെടുത്തിയത്.
ഉത്തരാഖണ്ഡിലും കഴിഞ്ഞ 24 മണിക്കൂറായി തുടരുന്ന കനത്ത മഴയിൽ വ്യാപക നാശനഷ്ടമാണുണ്ടായത്. മഴക്കെടുതിയിൽ ഒരു കൗമാരക്കാരൻ മരണപ്പെടുകയും നിരവധി പേർക്ക് പരിക്കേൽക്കുകയും ചെയ്തു. കനത്ത മഴയെത്തുടർന്ന് യമുനോത്രി ദേശീയപാത ഉൾപ്പെടെ സംസ്ഥാനത്തുടനീളം 118 റോഡുകൾ തടസ്സപ്പെട്ടു. ഉത്തരകാശി ജില്ലയിലെ സ്യാനചട്ടിക്ക് സമീപം യമുനോത്രി ദേശീയപാതയുടെ 100 മീറ്ററോളം ഭാഗം മണ്ണിടിച്ചിലിൽ തകർന്നു. ഈ ഭാഗത്ത് റോഡ് പുനരുദ്ധാരണ പ്രവർത്തനങ്ങൾ പുരോഗമിക്കുകയാണ്.
Story Summary
The India Meteorological Department (IMD) has forecast widespread heavy rainfall across the country after the Southwest Monsoon covered all states on July 9. Severe disruptions and fatalities have been reported, particularly in Gujarat’s Surat, Himachal Pradesh, and Uttarakhand, where landslides have blocked key highways and damaged infrastructure.
