ന്യൂഡൽഹി: ഇൻസ്റ്റാഗ്രാമിലെ പെയ്ഡ് പരസ്യങ്ങളിലൂടെ കുട്ടികൾക്കെതിരെയുള്ള ലൈംഗികാതിക്രമ ദൃശ്യങ്ങൾ പ്രചരിക്കുന്നു എന്ന റിപ്പോർട്ടുകളിൽ കേന്ദ്ര സർക്കാർ കർശന നോട്ടീസ് അയച്ചതിന് പിന്നാലെ വിശദീകരണവുമായി പ്രമുഖ സോഷ്യൽ മീഡിയ ഭീമന്മാരായ മെറ്റ. ഇത്തരം ഉള്ളടക്കങ്ങൾ തടയുന്നതിനായി തങ്ങൾ സ്വീകരിച്ചിട്ടുള്ള ആഡ് റിവ്യൂ സംവിധാനങ്ങൾ, കൃത്രിമബുദ്ധി സാങ്കേതികവിദ്യകൾ, അക്കൗണ്ടുകൾക്കെതിരെയുള്ള നടപടികൾ എന്നിവ വിശദീകരിച്ച് മെറ്റ വിശദമായ ബ്ലോഗ് പോസ്റ്റ് പ്രസിദ്ധീകരിച്ചു.(Meta Removes 1.6 Lakh Accounts In India Over Instagram Child Abuse Ads Controversy)
കുട്ടികളെ ചൂഷണം ചെയ്യുന്നത് ഭയങ്കരമായ കുറ്റകൃത്യമാണെന്നും ഇതിനെതിരെ പ്ലാറ്റ്ഫോമിന് അകത്തും പുറത്തും ശക്തമായ നടപടികളാണ് സ്വീകരിക്കുന്നതെന്നും മെറ്റ വ്യക്തമാക്കി. ഇൻസ്റ്റാഗ്രാം പരസ്യങ്ങൾ വഴി ഇത്തരം ദൃശ്യങ്ങൾ പ്രചരിച്ചതായുള്ള വാർത്തകൾ ഗൗരവത്തോടെയാണ് കാണുന്നത്. എന്നാൽ, മെറ്റ മനഃപൂർവ്വം കുട്ടികളുടെ ദൃശ്യങ്ങൾ ഉൾപ്പെടുന്ന പരസ്യങ്ങൾ ഇത്തരക്കാരിലേക്ക് എത്തിക്കുന്നു എന്ന ആരോപണം പൂർണ്ണമായും തെറ്റാണെന്നും കമ്പനി അറിയിച്ചു. സംശയാസ്പദമായ നീക്കങ്ങൾ നടത്തുന്ന അക്കൗണ്ടുകൾ കണ്ടെത്താൻ അത്യാധുനിക എഐ സാങ്കേതികവിദ്യ ഉപയോഗിക്കുന്നുണ്ട്. കഴിഞ്ഞ ആറ് മാസത്തിനുള്ളിൽ മാത്രം ഇന്ത്യയിൽ നിന്ന് ഇത്തരത്തിലുള്ള 1,60,000 അക്കൗണ്ടുകൾ നീക്കം ചെയ്തതായി മെറ്റ വെളിപ്പെടുത്തി. ആഗോളതലത്തിൽ കഴിഞ്ഞ വർഷം 40 ലക്ഷത്തിലധികം സംശയാസ്പദമായ അക്കൗണ്ടുകളും കുട്ടികളെ ചൂഷണം ചെയ്യുന്ന 3.6 കോടി ഉള്ളടക്കങ്ങളും മെറ്റ ഓട്ടോമാറ്റിക്കായി നീക്കം ചെയ്തിട്ടുണ്ട്.
ഇൻസ്റ്റാഗ്രാം പരസ്യങ്ങളിൽ പെയ്ഡ് പരസ്യങ്ങൾ നൽകുകയും, അതുവഴി ഉപഭോക്താക്കളെ ഇത്തരം ദൃശ്യങ്ങൾ വിൽക്കുന്ന ടെലിഗ്രാം ചാനലുകളിലേക്ക് നയിക്കുകയും ചെയ്യുന്നുവെന്ന അന്വേഷണ റിപ്പോർട്ടിന് പിന്നാലെയാണ് കേന്ദ്ര ഐടി മന്ത്രാലയം മെറ്റയ്ക്ക് നോട്ടീസ് അയച്ചത്. ഐടി മന്ത്രിയുടെ നിർദ്ദേശപ്രകാരം കേന്ദ്ര ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രാലയം വിഷയത്തിൽ അടിയന്തരമായി ഇടപെടുകയും, ഇത്തരം പരസ്യങ്ങൾ ഉടനടി നിരോധിക്കാൻ ഉത്തരവിടുകയും ചെയ്തു. കൂടാതെ, ഏഴ് ദിവസത്തിനകം വിശദമായ മറുപടി നൽകാനും മെറ്റയോട് ആവശ്യപ്പെട്ടിരുന്നു.
Story Summary
Meta released a detailed response after the Indian government issued a stern notice over Instagram ads allegedly promoting Child Sexual Exploitation and Abuse Material (CSEAM). Meta stated it takes these concerns seriously, denying intentional ad targeting, and revealed that it has removed over 1,60,000 accounts in India over the last six months and 4 million accounts globally using AI tools.
