ചെന്നൈ: തമിഴ്നാട്ടിലെ മധുര മീനാക്ഷി അമ്മൻ ക്ഷേത്രത്തിലെ കാർ പാർക്കിംഗ് ഏരിയയിൽ വെച്ച് പതിനാറുകാരനായ ഗുബേന്ദ്രൻ എന്ന കൗമാരക്കാരൻ അഞ്ചംഗ സംഘത്തിന്റെ ആക്രമണത്തിൽ കൊല്ലപ്പെട്ടു (Madurai Meenakshi Temple Parking Lot Murder). ഞായറാഴ്ച രാത്രിയുണ്ടായ ഈ കൊലപാതകം അടുത്തിടെ സമാപിച്ച ചിത്തിരൈ ഉത്സവത്തിനിടയിലുണ്ടായ മുൻവൈരാഗ്യത്തെ തുടർന്നാണെന്നാണ് മധുര സിറ്റി പോലീസിന്റെ പ്രാഥമിക അന്വേഷണത്തിൽ വ്യക്തമാകുന്നത്. കോയമ്പത്തൂരിലെ സുലൂരിൽ പത്തുവയസ്സുകാരി തട്ടിക്കൊണ്ടുപോകപ്പെട്ട് ക്രൂരമായ ലൈംഗിക പീഡനത്തിന് ഇരയായി കൊല്ലപ്പെട്ട സംഭവത്തിന്റെ ഞെട്ടൽ മാറുന്നതിന് മുൻപാണ് തമിഴ്നാടിനെ നടുക്കിയ പുതിയ കൊലപാതക വാർത്ത പുറത്തുവരുന്നത്. കോയമ്പത്തൂരിൽ തന്നെ മറ്റൊരു സംഭവത്തിൽ സ്കൂൾ പഠനം ഉപേക്ഷിച്ച പതിമൂന്നുകാരനെ പ്രായപൂർത്തിയാകാത്ത രണ്ട് കൂട്ടുകാർ ചേർന്ന് കൊലപ്പെടുത്തി കുഴിച്ചുമൂടിയ വിവരവും പുറത്തുവന്നിട്ടുണ്ട്.
സംസ്ഥാനത്ത് തുടർച്ചയായുണ്ടാകുന്ന കുറ്റകൃത്യങ്ങളുടെ പശ്ചാത്തലത്തിൽ മുഖ്യമന്ത്രി വിജയ്യുടെ നേതൃത്വത്തിലുള്ള പുതിയ ടിവികെ സർക്കാരിനെതിരെ ബിജെപിയും പ്രതിപക്ഷമായ ഡിഎംകെയും കടുത്ത വിമർശനവുമായി രംഗത്തെത്തി. പുതിയ സർക്കാർ തിരഞ്ഞെടുപ്പ് വിജയത്തിന്റെ ആഘോഷ മൂഡിൽ നിന്നും ഇനിയും പുറത്തുകടന്നിട്ടില്ലെന്നും തമിഴ്നാട്ടിൽ ലഹരി മാഫിയകൾക്കും കൊലപാതകികൾക്കും അക്രമികൾക്കും സ്വതന്ത്രമായി വിഹരിക്കാനുള്ള സാഹചര്യമാണ് നിലവിലുള്ളതെന്നും മുൻ ബിജെപി സംസ്ഥാന അധ്യക്ഷൻ കെ. അണ്ണാമലൈ എക്സ് പ്ലാറ്റ്ഫോമിൽ കുറിച്ചു. ക്രമസമാധാനം പൂർണ്ണമായും തകർന്നുവെന്നും തിരഞ്ഞെടുപ്പ് കാലത്ത് മാറ്റം വാഗ്ദാനം ചെയ്ത മുഖ്യമന്ത്രി വിജയ് ഇപ്പോൾ ജനങ്ങളെ കാണാനോ മാധ്യമങ്ങളെ ഫേസ് ചെയ്യാനോ തയ്യാറാകുന്നില്ലെന്നും ഡിഎംകെ വക്താവ് എ. ശരവണൻ കുറ്റപ്പെടുത്തി.
Summary: A 16-year-old boy named Gubendran was murdered by a five-member gang in the parking lot of the Meenakshi Amman Temple in Madurai due to previous enmity. This incident has triggered severe political backlash against Chief Minister Vijay-led TVK government from both the BJP and DMK over the state’s deteriorating law and order situation. Opposition leaders highlighted recent back-to-back crimes involving minors, claiming the new administration has failed to address ground realities.
