ഗുവാഹത്തി: അസമിലെ പ്രശസ്തമായ കാമാഖ്യ ക്ഷേത്രത്തിന് സമീപം ടാക്സി ഡ്രൈവർ മർദ്ദനമേറ്റ് കൊല്ലപ്പെട്ടു. നീലാചൽ ഹിൽസ് സ്വദേശിയായ രൂപം ദാസ് ആണ് മരിച്ചത്. സംഭവത്തിൽ ബർപേട്ട സ്വദേശിയും നിലവിൽ കാമാഖ്യയിൽ താമസക്കാരനുമായ രാഹുൽ പാതക് എന്നയാളെ പോലീസ് അറസ്റ്റ് ചെയ്തു. (Kamakhya Temple murder)
ബുധനാഴ്ച കാമാഖ്യ ശ്മശാനത്തിന് സമീപമുള്ള മാ മനശ ഹോട്ടലിന് സമീപം വിശ്രമിക്കുകയായിരുന്ന രൂപം ദാസിനെ രാഹുൽ പാതക് മുളവടി ഉപയോഗിച്ച് ക്രൂരമായി മർദ്ദിക്കുകയായിരുന്നു. ഗുരുതരമായി പരിക്കേറ്റ രൂപം ദാസിനെ ഉടൻ തന്നെ ആശുപത്രിയിൽ എത്തിക്കാൻ ശ്രമിച്ചെങ്കിലും വഴിമധ്യേ മരണപ്പെട്ടു. പ്രതി ലഹരിക്ക് അടിമയാണെന്നും സംഭവസമയത്ത് ഇരുവരും മദ്യലഹരിയിലായിരുന്നോ എന്ന് സംശയിക്കുന്നതായും പോലീസ് അറിയിച്ചു.
മർദ്ദനത്തിന്റെ കൃത്യമായ കാരണം ഇതുവരെ വ്യക്തമായിട്ടില്ലെന്നും പ്രതിയെ ചോദ്യം ചെയ്തുവരികയാണെന്നും ഉന്നത പോലീസ് ഉദ്യോഗസ്ഥർ വ്യക്തമാക്കി. ഫോറൻസിക് സംഘം സംഭവസ്ഥലത്തെത്തി തെളിവുകൾ ശേഖരിച്ചു. കാമാഖ്യ ക്ഷേത്രപരിസരത്ത് മുൻപും സമാനമായ രീതിയിൽ കൊലപാതകങ്ങൾ നടന്നിട്ടുള്ളത് പ്രദേശവാസികളിൽ വലിയ ആശങ്കയാണ് ഉണ്ടാക്കിയിരിക്കുന്നത്.
Summary: A taxi driver named Rupam Das was beaten to death by a man identified as Rahul Patak outside the revered Kamakhya Temple in Guwahati, Assam. Police have arrested the accused, who is suspected to be a drug user, and are investigating the motive behind the fatal assault that occurred following an altercation on Wednesday.
