ന്യൂഡൽഹി: രാജ്യത്തെ സ്കൂൾ വിദ്യാഭ്യാസ മേഖലയിൽ ചരിത്രത്തിലാദ്യമായി അധ്യാപകരുടെ എണ്ണം 1.03 കോടി കടന്നതായി കേന്ദ്ര വിദ്യാഭ്യാസ മന്ത്രാലയത്തിന്റെ പുതിയ കണക്കുകൾ. നിലവിൽ ഇന്ത്യയിലുടനീളമുള്ള 14.67 ലക്ഷം സ്കൂളുകളിലായി 24.72 കോടിയോളം വിദ്യാർത്ഥികൾ പഠിക്കുന്നുണ്ടെന്നും റിപ്പോർട്ടുകൾ വ്യക്തമാക്കുന്നു. കേന്ദ്ര വിദ്യാഭ്യാസ മന്ത്രാലയം പുറത്തുവിട്ട സംസ്ഥാനങ്ങൾക്കും കേന്ദ്രഭരണ പ്രദേശങ്ങൾക്കുമായുള്ള ‘പെർഫോമൻസ് ഗ്രേഡിങ് ഇൻഡക്സ്’, ജില്ലകൾക്കായുള്ള ‘പെർഫോമൻസ് ഗ്രേഡിങ് ഇൻഡക്സ്’ എന്നിവയിലാണ് ഈ വിവരങ്ങളുള്ളത്. യുഡൈസ് പ്ലസ്, മറ്റ് സർക്കാർ പോർട്ടലുകൾ എന്നിവയിൽ നിന്നുള്ള വിവരങ്ങൾ അടിസ്ഥാനമാക്കിയാണ് ഈ സൂചികകൾ തയ്യാറാക്കിയിരിക്കുന്നത്.(Indian School Education System Crosses One Crore Teachers Milestone Ministry Of Education PGI Report)
പിജിഐ റാങ്കിങ് രീതിയിൽ സംസ്ഥാനങ്ങൾക്ക് വ്യക്തിഗതമായി ഒന്നാം റാങ്കോ രണ്ടാം റാങ്കോ നൽകാറില്ല. പകരം അവരെ വിവിധ പ്രകടന ഗ്രൂപ്പുകളായി തിരിക്കുകയാണ് ചെയ്യുന്നത്. സ്കൂൾ വിദ്യാഭ്യാസ-സാക്ഷരതാ വകുപ്പ് വികസിപ്പിച്ചെടുത്ത ഈ സൂചികയിൽ ആകെ 1000 പോയിന്റുകളാണുള്ളത്. 70 സൂചകങ്ങളെ അടിസ്ഥാനമാക്കിയാണ് പോയിന്റുകൾ നിശ്ചയിക്കുന്നത്. ഈ സൂചകങ്ങളെ പ്രധാനമായും ‘ഫലം’, ‘ഭരണം-മാനേജ്മെന്റ്’ എന്നിങ്ങനെ രണ്ട് വിഭാഗങ്ങളായി തിരിച്ചിരിക്കുന്നു. ഇവയ്ക്ക് കീഴിൽ പഠനനിലവാരം, സ്കൂളുകളിലേക്കുള്ള പ്രവേശനം, അടിസ്ഥാന സൗകര്യങ്ങൾ, തുല്യത, ഭരണപരമായ പ്രക്രിയകൾ, അധ്യാപക പരിശീലനം എന്നീ ആറ് മേഖലകൾ ഉൾപ്പെടുന്നു. യുഡൈസ് പ്ലസിന് പുറമെ പരഖ് രാഷ്ട്രീയ സർവേക്ഷൺ 2024, പിഎം പോഷൻ പോർട്ടൽ, പ്രബന്ധ് പോർട്ടൽ, വിദ്യാഞ്ജലി പോർട്ടൽ എന്നിവയിലെ വിവരങ്ങളും ഇതിനായി ഉപയോഗിക്കുന്നു.
സംസ്ഥാനങ്ങൾക്ക് പുറമെ ജില്ലാതലത്തിലും വിദ്യാഭ്യാസ നിലവാരം വിലയിരുത്താൻ മന്ത്രാലയം പുതിയ സൂചിക കൊണ്ടുവന്നിട്ടുണ്ട്. വിദ്യാഭ്യാസത്തിന്റെ ഗുണനിലവാരത്തിന് മുൻഗണന നൽകുന്ന ഈ ജില്ലാ സൂചികയ്ക്ക് ആകെ 600 പോയിന്റാണുള്ളത്. ഇതിലും 70 സൂചകങ്ങളാണുള്ളത്. ഇവയെ പഠനഫലങ്ങൾ, ഫലപ്രദമായ ക്ലാസ് റൂം അധ്യാപനം, അടിസ്ഥാന സൗകര്യങ്ങളും വിദ്യാർത്ഥികളുടെ അവകാശങ്ങളും, സ്കൂൾ സുരക്ഷയും കുട്ടികളുടെ സംരക്ഷണവും, ഡിജിറ്റൽ ലേണിങ് എന്നിങ്ങനെ ആറ് വിഭാഗങ്ങളായി തിരിച്ചിരിക്കുന്നു. 11 പ്രധാന മേഖലകളെ അടിസ്ഥാനമാക്കിയാണ് ഈ ഗ്രേഡിങ്. യുഡൈസ് പ്ലസ്, പരഖ് രാഷ്ട്രീയ സർവേക്ഷൺ 2024, പ്രബന്ധ് പോർട്ടൽ എന്നിവയിലെ വിവരങ്ങളാണ് ജില്ലാതല വിലയിരുത്തലിനായി ഉപയോഗിക്കുന്നത്.
Story Summary
India’s school education system has achieved a historic milestone with the total number of teachers crossing 1.03 crore for the first time across 14.67 lakh schools and 24.72 crore students. The data was revealed in the Union Ministry of Education’s Performance Grading Index (PGI 2.0) for States/UTs and PGI-D 2025-26 for districts, aimed at evaluating education outcomes, infrastructure, and digital learning.
