കൊൽക്കത്ത: കൊൽക്കത്ത നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിനുള്ളിൽ സ്ഥിതി ചെയ്യുന്ന ഗൗരിപൂർ ജാമിയ മസ്ജിദിലേക്കുള്ള (ബാങ്ക്റ മസ്ജിദ്) പ്രവേശനം സർക്കാർ തടഞ്ഞു (Gauripur Jama Masjid entry suspended). വിമാനത്താവളത്തിന്റെ സുരക്ഷയും റൺവേ വികസനവും മുൻനിർത്തിയാണ് കടുത്ത നടപടി. ദേശീയ സുരക്ഷയാണ് എല്ലാത്തിനും മുകളിലെന്നും വിമാനത്താവളത്തിന്റെ സുരക്ഷയിൽ വിട്ടുവീഴ്ചയില്ലെന്നും പശ്ചിമ ബംഗാൾ മുഖ്യമന്ത്രി സുവേന്ദു അധികാരി വ്യക്തമാക്കി. വിമാനത്താവള ഗേറ്റിലൂടെയുള്ള പ്രവേശന പാസുകൾ ശനിയാഴ്ച മുതൽ നിർത്തിവെക്കുകയും പള്ളിയിൽ പ്രാർത്ഥനകൾ താൽക്കാലികമായി അവസാനിപ്പിക്കുകയും ചെയ്തു. ക്രമസമാധാനം ഉറപ്പാക്കാൻ പോലീസിനെയും സുരക്ഷാ ഉദ്യോഗസ്ഥരെയും പള്ളി പരിസരത്ത് വിന്യസിച്ചിട്ടുണ്ട്.
136 വർഷം പഴക്കമുള്ള ഈ പള്ളി വിമാനത്താവളത്തിന്റെ റൺവേയ്ക്ക് സമീപമാണ് സ്ഥിതി ചെയ്യുന്നത്. ഇത് വിമാനങ്ങളുടെ സുഗമമായ പറന്നുയരലിനും ലാൻഡിംഗിനും വലിയ ഭീഷണിയാണെന്ന് വിദഗ്ധർ ചൂണ്ടിക്കാട്ടുന്നു. പ്രധാന റൺവേ അറ്റകുറ്റപ്പണികൾക്കായി അടച്ചിടേണ്ടി വരുമ്പോൾ, രണ്ടാമത്തെ റൺവേ ഉപയോഗിക്കാനുള്ള ശ്രമങ്ങൾക്ക് പള്ളിയുടെ സാന്നിധ്യം തടസ്സമാകുന്നുണ്ട്. വിമാനത്താവളത്തിന്റെ സുരക്ഷാ മേഖലയിൽ (ലെവൽ 3) സ്ഥിതി ചെയ്യുന്ന പള്ളിയിലേക്ക് പ്രവേശിക്കുന്നവർക്ക് ബയോമെട്രിക് പാസുകളോ കൃത്യമായ പശ്ചാത്തല പരിശോധനയോ ഇല്ലെന്നത് ഗുരുതരമായ സുരക്ഷാ പ്രശ്നമാണെന്ന് ബിജെപി എംഎൽഎ സൗരഭ് സിക്ദാർ ആരോപിച്ചു.
നിയമവാഴ്ചയാണ് സർക്കാർ നടപ്പിലാക്കുന്നതെന്ന് മുഖ്യമന്ത്രി സുവേന്ദു അധികാരി പറഞ്ഞു. ബംഗ്ലാദേശിനോട് അതിർത്തി പങ്കിടുന്ന പശ്ചിമ ബംഗാളിലെ വിമാനത്താവളം തന്ത്രപ്രധാനമായ സ്ഥലത്താണെന്നും പുറത്തുനിന്നുള്ളവർക്ക് വിമാനത്താവള ഗേറ്റുകൾ തുറന്നിടാൻ കഴിയില്ലെന്നും അദ്ദേഹം വ്യക്തമാക്കി. കേന്ദ്രമന്ത്രി സുകാന്ത മജുംദാർ ഉൾപ്പെടെയുള്ളവർ മുഖ്യമന്ത്രിയുടെ തീരുമാനത്തെ പിന്തുണച്ചു. അതേസമയം, ദീർഘകാലമായി പള്ളി അവിടെയുണ്ടെന്നും സർക്കാർ അധികൃതരുമായി ചർച്ചകൾ നടന്നു വരികയാണെന്നും അതിനാൽ പ്രവേശനം തടയേണ്ടതില്ലായിരുന്നുവെന്നും പള്ളി കമ്മിറ്റി പ്രസിഡന്റ് സിദ്ദിഖുല്ല ചൗധരി പ്രതികരിച്ചു. വിമാനത്താവള റൺവേ വികസനത്തിനായി പള്ളി മാറ്റി സ്ഥാപിക്കണമെന്ന ആവശ്യം നേരത്തെ തന്നെ ഉയർന്നിരുന്നു.
Summary: The West Bengal government has suspended entry passes for congregational prayers at the 136-year-old Gauripur Jama Masjid located within Kolkata’s Netaji Subhas Chandra Bose International Airport, citing national security and the need for runway expansion. Chief Minister Suvendu Adhikari emphasized that airport security is paramount, while authorities highlighted that the mosque’s location poses risks to aircraft operations and complicates essential infrastructure upgrades.
