ന്യൂഡൽഹി: കേന്ദ്ര ഗതാഗത മന്ത്രാലയത്തിന്റെ ഔദ്യോഗിക വെബ്സൈറ്റിന് സമാനമായ വ്യാജ പോർട്ടൽ നിർമ്മിച്ച് രാജ്യവ്യാപകമായി ലക്ഷക്കണക്കിന് ആളുകളെ പറ്റിച്ച യുവാവ് അറസ്റ്റിൽ. ഉത്തർപ്രദേശിലെ ഇറ്റാവ സ്വദേശിയായ 24-കാരൻ അൻഷുൽ യാദവാണ് ഡൽഹി പോലീസിന്റെ പിടിയിലായത്. എം.സി.എ ബിരുദധാരിയായ ഇയാൾ സാങ്കേതിക വിദ്യ ദുരുപയോഗം ചെയ്താണ് ഈ വൻ തട്ടിപ്പ് ആസൂത്രണം ചെയ്തത്.(Fake Parivahan Online Portal Busted MCA Graduate Anshul Yadav Arrested Cyber Fraud India)
തട്ടിപ്പുമായി ബന്ധപ്പെട്ട് നടന്ന സാമ്പത്തിക ഇടപാടുകളെക്കുറിച്ചുള്ള വിശദമായ അന്വേഷണത്തിനൊടുവിലാണ് പ്രതിയെ പോലീസ് വലയിലാക്കിയത്. ‘parivahan.online’ എന്ന പേരിൽ യഥാർത്ഥ സർക്കാർ വെബ്സൈറ്റുകളെ വെല്ലുന്ന രീതിയിലുള്ള വ്യാജ പോർട്ടലാണ് ഇയാൾ നിർമ്മിച്ചതെന്ന് ഡെപ്യൂട്ടി പോലീസ് കമ്മീഷണർ (സെൻട്രൽ) രോഹിത് രാജ്ബീർ സിംഗ് പ്രസ്താവനയിലൂടെ അറിയിച്ചു.
പൊതുജനങ്ങൾക്ക് പെട്ടെന്ന് തിരിച്ചറിയാൻ സാധിക്കാത്ത വിധം രൂപകൽപ്പന ചെയ്ത ഈ സൈറ്റ് വഴി ഡ്രൈവിംഗ് ലൈസൻസ് പുതുക്കൽ, ആർ.സി ബുക്ക് സംബന്ധമായ സേവനങ്ങൾ, നികുതി അടയ്ക്കൽ തുടങ്ങിയ ആവശ്യങ്ങൾക്കായി എത്തുന്ന ഉപഭോക്താക്കളെയാണ് ഇയാൾ പ്രധാനമായും ലക്ഷ്യമിട്ടിരുന്നത്. സർക്കാർ വെബ്സൈറ്റാണെന്ന് വിശ്വസിച്ച് പണം നൽകുന്ന സാധാരണക്കാരുടെ ബാങ്ക് വിവരങ്ങളും പണവും ഇയാൾ ഇത്തരത്തിൽ തട്ടിയെടുക്കുകയായിരുന്നു. സംഭവത്തിൽ കൂടുതൽ പേർക്ക് പങ്കുണ്ടോയെന്നും തട്ടിപ്പിലൂടെ എത്ര തുക കൈക്കലാക്കിയിട്ടുണ്ടെന്നും പോലീസ് അന്വേഷിച്ചു വരികയാണ്.
Story Summary
A 24-year-old MCA graduate named Anshul Yadav was arrested from Etawah, Uttar Pradesh, for creating and operating a fake transport department website, ‘parivahan.online’. The lookalike portal was used to deceive and financially defraud citizens across India, according to Delhi Police.
