കൊൽക്കത്ത: പശ്ചിമ ബംഗാളിലെ ചരിത്രപ്രസിദ്ധമായ സായുധ സേനാ വിഭാഗമായ ഈസ്റ്റേൺ ഫ്രോണ്ടിയർ റൈഫിൾസിനെ പുനരുജ്ജീവിപ്പിക്കാൻ സർക്കാർ തീരുമാനിച്ചു. ഡാർജിലിംഗിലെ കുർസെഓങ്ങിൽ നടന്ന റാലിക്കിടെ മുഖ്യമന്ത്രി സുവേന്ദു അധികാരിയാണ് ഇക്കാര്യം പ്രഖ്യാപിച്ചത് (Eastern Frontier Rifles Revival). വരും മാസങ്ങളിൽ ഈസ്റ്റേൺ ഫ്രോണ്ടിയർ റൈഫിൾസിൽ 1000 പേർക്ക് നിയമനം നൽകുമെന്നും, എല്ലാ സർക്കാർ ജോലികളിലും സ്ത്രീകൾക്ക് 30 ശതമാനം സംവരണം ഏർപ്പെടുത്തുമെന്നും അദ്ദേഹം വ്യക്തമാക്കി.
പതിനെട്ടാം നൂറ്റാണ്ടിൽ ഈസ്റ്റ് ഇന്ത്യ കമ്പനി രൂപീകരിച്ച ഈസ്റ്റേൺ ഫ്രോണ്ടിയർ റൈഫിൾസ്, പതിറ്റാണ്ടുകളായി അതിർത്തി സംരക്ഷണത്തിലും ആഭ്യന്തര സുരക്ഷയിലും നിർണ്ണായക പങ്കാണ് വഹിക്കുന്നത്. മുൻ സർക്കാരിന്റെ കാലത്ത് നിയമനങ്ങൾ നിർത്തിവെക്കുകയും ബറ്റാലിയനുകൾ ലയിപ്പിക്കുകയും ചെയ്തതോടെ ഈ സേനാ വിഭാഗം ദുർബലമായെന്ന് ബിജെപി ആരോപിച്ചു. കഴിഞ്ഞ കാലങ്ങളിൽ മാവോയിസ്റ്റ് വിരുദ്ധ പോരാട്ടങ്ങളിലും യുദ്ധമുഖങ്ങളിലും വലിയ വീരസാഹസികത കാണിച്ച സേനയാണിത്. 2010-ൽ സിൽദയിൽ മാവോയിസ്റ്റുകൾ നടത്തിയ ആക്രമണത്തിൽ 24 ഇഎഫ്ആർ ഉദ്യോഗസ്ഥർ വീരമൃത്യു വരിച്ചിരുന്നു.
ദാർജിലിംഗിലെ ഗൂർഖ യുവാക്കൾക്ക് കൂടുതൽ അവസരങ്ങൾ നൽകുന്നതിലൂടെ സേനയുടെ കരുത്ത് വീണ്ടെടുക്കാനാണ് സർക്കാരിന്റെ നീക്കം. ഇന്ത്യാ-പാകിസ്ഥാൻ യുദ്ധങ്ങളിലും 1971-ലെ ബംഗ്ലാദേശ് വിമോചന സമരത്തിലും നിർണ്ണായക പങ്ക് വഹിച്ച ചരിത്രം ഇഎഫ്ആറിനുണ്ട്. ‘വിശ്വസ്തതയും ധീരതയും’ എന്ന ആപ്തവാക്യവുമായി പ്രവർത്തിക്കുന്ന ഈ സേനയെ ആധുനികവൽക്കരിക്കുമെന്നും മുഖ്യമന്ത്രി ഉറപ്പുനൽകി. ബിജെപി സർക്കാർ അധികാരമേറ്റാൽ ഇഎഫ്ആർ പുനരുജ്ജീവിപ്പിക്കുമെന്ന് ഡാർജിലിംഗ് എംപി രാജു ബിസ്ത നേരത്തെ നൽകിയ ഉറപ്പിന്റെ ഭാഗമായാണ് ഈ നടപടി.
Summary: West Bengal Chief Minister Suvendu Adhikari has announced the revival of the historic Eastern Frontier Rifles (EFR), planning the recruitment of over 1,000 Gorkha youths to strengthen the force. The EFR, which has a long legacy of service in both World Wars and internal security operations, had seen recruitment frozen for over a decade, and this move aims to restore its operational capacity and morale.
