ബിലാസ്പൂർ: സർക്കാർ സ്കൂളുകളിൽ വിദ്യാർത്ഥികളെക്കൊണ്ട് ഹിന്ദു പ്രാർത്ഥനകൾ നിർബന്ധപൂർവ്വം ചൊല്ലിക്കാൻ കഴിയില്ലെന്ന് ഛത്തീസ്ഗഡ് ഹൈക്കോടതി. ജൂൺ 12-ന് സംസ്ഥാന സർക്കാർ പുറത്തിറക്കിയ സർക്കുലറിനെതിരെ നൽകിയ ഹർജി പരിഗണിക്കവേയാണ് ജസ്റ്റിസ് അമിതേന്ദ്ര കിഷോർ പ്രസാദ് ഇക്കാര്യം വ്യക്തമാക്കിയത്.(Chhattisgarh High Court says students cannot be compelled to recite Hindu prayers)
സ്കൂൾ ദിനചര്യയുടെ ഭാഗമായി സരസ്വതി വന്ദന, ഗായത്രി മന്ത്രം, ഗുരു മന്ത്രം, ഭോജൻ മന്ത്രം തുടങ്ങിയവ ചൊല്ലണമെന്നായിരുന്നു സർക്കാർ ഉത്തരവ്. ഇതിനെതിരെ മുൻ വഖഫ് ബോർഡ് ചെയർമാൻ അബ്ദുൾ സലാം റിസ്വി, മുൻ ന്യൂനപക്ഷ വകുപ്പ് ചെയർമാൻ മഹേന്ദ്ര ഛാബ്ദ, സാമൂഹിക പ്രവർത്തകൻ ഷഫീഖ് അഹമ്മദ് എന്നിവരാണ് കോടതിയെ സമീപിച്ചത്. സർക്കുലർ പുറത്തിറക്കിയെങ്കിലും അത് ഇതുവരെ നടപ്പിലാക്കിയിട്ടില്ലെന്ന് സംസ്ഥാന സർക്കാർ കോടതിയെ അറിയിച്ചു. ഈ മറുപടി പരിഗണിച്ച് കോടതി ഹർജി തീർപ്പാക്കി.
സർക്കാർ സ്കൂളുകളിൽ പ്രാർത്ഥനയിൽ പങ്കെടുക്കാൻ ഏതെങ്കിലും കുട്ടിയെ നിർബന്ധിച്ചതായി കണ്ടെത്തിയാൽ പരാതിക്കാർക്ക് വീണ്ടും കോടതിയെ സമീപിക്കാമെന്ന് ജസ്റ്റിസ് പ്രസാദ് വ്യക്തമാക്കി. അത്തരം പരാതികൾ ഉണ്ടായാൽ കർശനമായ നടപടി സ്വീകരിക്കുമെന്നും കോടതി മുന്നറിയിപ്പ് നൽകി. ഭരണഘടന വിഭാവനം ചെയ്യുന്ന മതേതര തത്വങ്ങളുടെ ലംഘനമാണ് ഈ സർക്കുലർ എന്ന് ഹർജിക്കാർ ചൂണ്ടിക്കാട്ടി.
Story Summary
The Chhattisgarh High Court has ruled that students cannot be compelled to recite Hindu prayers in government schools, while hearing a challenge against a state circular that mandated the inclusion of mantras like the Gayatri Mantra and Saraswati Vandana in the school routine. The court disposed of the petition after the state government confirmed the circular had not yet been implemented, but granted liberty to the petitioners to approach the court again if any child is forced to participate in such religious activities.
