ന്യൂഡൽഹി: പ്രശസ്ത പരിസ്ഥിതി പ്രവർത്തകൻ സനം വാങ്ചുക്കിന്റെ അഭ്യർത്ഥന മാനിച്ച് കോക്രോച്ച് ജനതാ പാർട്ടി (സിജെപി) പ്രസിഡന്റ് അഭിജീത് ദിപ്കെ തന്റെ നിരാഹാരസമരം അവസാനിപ്പിച്ചതായി അറിയിച്ചു (Abhijeet Dipke Ends Hunger Strike). ജൂൺ 28 മുതൽ സനം വാങ്ചുക് നടത്തുന്ന അനിശ്ചിതകാല നിരാഹാരസമരത്തിന് പിന്തുണ പ്രഖ്യാപിച്ച് ശനിയാഴ്ച മുതൽ ദിപ്കെ നിരാഹാരമനുഷ്ഠിക്കുകയായിരുന്നു. കൂടുതൽ കരുത്തോടെ സമരത്തിൽ സജീവമാകാൻ വാങ്ചുക് ആവശ്യപ്പെട്ടതിനെത്തുടർന്നാണ് ദിപ്കെ സമരം പിൻവലിച്ചത്.
നീറ്റ്-യുജി പരീക്ഷയിലെ ക്രമക്കേടുകൾക്കെതിരെയും കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രദാന്റെ രാജിക്കുവേണ്ടിയും സിജെപി പാർലമെന്റിലേക്ക് നടത്തിയ മാർച്ചിൽ അഭിജീത് ദിപ്കെ പിന്നീട് പങ്കുചേർന്നു. ഡൽഹിയിലെ ജന്തർ മന്തറിൽ നിന്ന് പാർലമെന്റിലേക്ക് ആയിരക്കണക്കിന് യുവാക്കളാണ് മാർച്ചിൽ അണിനിരന്നത്. പ്രതിഷേധക്കാർ ബാരിക്കേഡുകൾ തകർക്കാൻ ശ്രമിച്ചതോടെ ശാസ്ത്രി ഭവന് സമീപം പോലീസ് കണ്ണീർവാതകം പ്രയോഗിച്ചു.
പ്രതിഷേധം ശക്തമായ സാഹചര്യത്തിൽ കേന്ദ്ര സർക്കാർ സിജെപി പ്രതിനിധികളുമായി ചർച്ചയ്ക്ക് സന്നദ്ധത അറിയിച്ചതായി പാർട്ടിയുടെ മുഖ്യ വക്താവ് സൗരവ് ദാസ് അറിയിച്ചു. സിജെപി നേതാക്കളായ സൗരവ് ദാസും അശുതോഷ് റാങ്കയും കേന്ദ്രമന്ത്രി ജെ.പി. നഡ്ഡയുമായി കൂടിക്കാഴ്ച നടത്താൻ പോവുകയാണെന്നും അദ്ദേഹം എക്സിലൂടെ (ട്വിറ്റർ) വ്യക്തമാക്കി. എന്നാൽ, ചർച്ചയെക്കുറിച്ച് ഔദ്യോഗിക സ്ഥിരീകരണം സർക്കാർ ഭാഗത്തുനിന്നും ഉണ്ടായിട്ടില്ല.
പ്രതിഷേധം അക്രമാസക്തമായതോടെ ഡൽഹിയിൽ അതീവ സുരക്ഷാ സംവിധാനങ്ങളാണ് ഏർപ്പെടുത്തിയിരിക്കുന്നത്. പാർലമെന്റ് മന്ദിരത്തിന് ചുറ്റും പോലീസിനെയും അർദ്ധസൈനിക വിഭാഗത്തെയും വിന്യസിച്ചു. സുരക്ഷാ മുൻകരുതലിന്റെ ഭാഗമായി സമീപത്തെ പല മെട്രോ സ്റ്റേഷനുകളിലേക്കുള്ള പ്രവേശനം നിയന്ത്രിക്കുകയും ഗേറ്റുകൾ അടയ്ക്കുകയും ചെയ്തത് യാത്രക്കാരെയും വലച്ചു. സമാധാനപരമായ പ്രതിഷേധം എന്നതിലുപരി വലിയൊരു പ്രക്ഷോഭമായി ഈ സമരം മാറിക്കൊണ്ടിരിക്കുകയാണ്.
Summary: Abhijeet Dipke, president of the Cockroach Janta Party (CJP), ended his hunger strike following an appeal from activist Sonam Wangchuk, who has been fasting for over 20 days regarding NEET-UG 2026 irregularities. Dipke immediately joined the CJP’s intensified march toward Parliament, which saw clashes with security forces and significant disruption in central Delhi, even as CJP leaders claimed the government had reached out for formal talks.
