തല ഉടലിൽ നിന്ന് വേർപെട്ട ശേഷവും പോരാട്ടം തുടർന്ന ഹ്യൂമനോയിഡ് റോബോട്ടിന്റെ വീഡിയോ സമൂഹമാധ്യമങ്ങളിൽ വൈറലാകുന്നു. ചൈനയിലെ ഷെൻഷെനിൽ നടന്ന ലോകത്തിലെ ആദ്യ സമ്പൂർണ വലിപ്പമുള്ള ഹ്യൂമനോയിഡ് റോബോട്ട് ഫ്രീ-കോമ്പാറ്റ് ടൂർണമെന്റായ അൾട്ടിമേറ്റ് റോബോട്ട് നോക്ക്-ഔട്ട് ലെജൻഡ് (URKL) മത്സരത്തിനിടെയായിരുന്നു കൗതുകകരമായ സംഭവം (China Humanoid Robot Fight). ചൈനീസ് റോബോട്ടിക്സ് കമ്പനിയായ EngineAI സംഘടിപ്പിച്ച മത്സരത്തിൽ ഏറ്റുമുട്ടിയത് കമ്പനിയുടെ ടി800 മോഡൽ ഹ്യൂമനോയിഡ് റോബോട്ടുകളായ വൈറ്റ് ഈഗിൾയും മാറ്റഡോർയും ആയിരുന്നു.
ഒരു കിക്കിൽ തല വേർപെട്ടു
മത്സരത്തിനിടെ വൈറ്റ് ഈഗിൾ നടത്തിയ ശക്തമായ ഹൈ-കിക്കിൽ മാറ്റഡോറിന്റെ തല സോക്കറ്റിൽ നിന്ന് വേർപെടുകയായിരുന്നു. തല തൂങ്ങിനിന്ന അവസ്ഥയിലും റോബോട്ട് എതിരാളിക്ക് നേരെ പഞ്ചുകളും കിക്കുകളും തുടരുന്ന ദൃശ്യങ്ങൾ കാണികളെ അമ്പരപ്പിച്ചു. അൽപസമയത്തിനുശേഷം മാറ്റഡോർ മുന്നിലേക്ക് വീഴുകയും സ്വന്തം തല ശരീരഭാരത്തിൽ അമരുകയും ചെയ്തു. വീണ്ടും എഴുന്നേൽക്കാൻ ശ്രമിക്കുന്നതിനിടെ തല പൂർണമായും വേർപെട്ടതോടെ റോബോട്ട് വീണ്ടും നിലത്തുവീണു. ഇതോടെ റഫറിമാർ മത്സരം അവസാനിപ്പിച്ചു. വിജയിച്ച വൈറ്റ് ഈഗിൾ തുടർന്ന് നൃത്തച്ചുവടുകളും വിജയാഘോഷങ്ങളും നടത്തി കാണികളെ ആവേശത്തിലാഴ്ത്തി. പരാജയപ്പെട്ട റോബോട്ടിനെ പിന്നീട് ഉദ്യോഗസ്ഥർ അരീനയിൽ നിന്ന് മാറ്റുകയായിരുന്നു.
Robot lost its head mid-fight and kept swinging anyway 😂pic.twitter.com/KnMaFDsr2n
— Tansu Yegen (@TansuYegen) July 17, 2026
‘ടെർമിനേറ്റർ’ പ്രചോദനമായ ടി800
കഴിഞ്ഞ വർഷമാണ് EngineAI ടി800 ഹ്യൂമനോയിഡ് റോബോട്ട് അവതരിപ്പിച്ചത്. ഹോളിവുഡ് ചിത്രമായ ‘ടെർമിനേറ്റർ’ സിനിമയിലെ പ്രശസ്ത കഥാപാത്രത്തിൽ നിന്നാണ് ഈ മോഡലിന് ടി800 എന്ന പേര് നൽകിയിരിക്കുന്നത്. പഞ്ച് കോമ്പിനേഷനുകൾ, റൗണ്ട്ഹൗസ് കിക്കുകൾ, കിക്ക്-പഞ്ച് സീക്വൻസുകൾ തുടങ്ങി മിക്സ്ഡ് മാർഷ്യൽ ആർട്സിൽ നിന്ന് പ്രചോദനം ഉൾക്കൊണ്ട നിരവധി ചലനങ്ങൾ അവതരിപ്പിക്കാൻ ടി800യ്ക്ക് കഴിവുണ്ടെന്ന് കമ്പനി അവകാശപ്പെടുന്നു.
എന്താണ് URKL?
Ultimate Robot Knock-out Legend (URKL) ലോകത്തിലെ ആദ്യ ഹ്യൂമനോയിഡ് റോബോട്ട് ഫ്രീ-കോമ്പാറ്റ് ലീഗായാണ് വിശേഷിപ്പിക്കപ്പെടുന്നത്. 10 രാജ്യങ്ങളിൽ നിന്നായി 200-ലധികം ടീമുകൾ മത്സരത്തിൽ രജിസ്റ്റർ ചെയ്തിരുന്നുവെങ്കിലും ഓൺലൈൻ യോഗ്യതാ റൗണ്ടുകൾക്ക് ശേഷം 32 ടീമുകളാണ് പ്രധാന മത്സരത്തിലേക്ക് കടന്നത്.
എല്ലാ ടീമുകളും EngineAIയുടെ ടി800 പ്ലാറ്റ്ഫോമാണ് ഉപയോഗിക്കുന്നത്. എന്നാൽ ഓരോ ടീമിനും സ്വന്തം രീതിയിൽ കവചം, ഘടന, നിയന്ത്രണ സംവിധാനങ്ങൾ എന്നിവ മെച്ചപ്പെടുത്തി മത്സരത്തിൽ പങ്കെടുക്കാം. റോബോട്ടുകളുടെ ചലന നിയന്ത്രണം, ബാലൻസ്, സെൻസർ സംവിധാനങ്ങൾ, തീരുമാനമെടുക്കാനുള്ള കഴിവ്, ഊർജ വിനിയോഗം, ഘടനയുടെ കരുത്ത് എന്നിവ അടിസ്ഥാനമാക്കിയാണ് വിലയിരുത്തൽ.
10 ദശലക്ഷം യുവാൻ സമ്മാനം
2026 URKL സീസൺ വർഷാവസാനം വരെ വിവിധ ഘട്ടങ്ങളിലായി നടക്കും. ജൂലൈ മുതൽ ഓഗസ്റ്റ് വരെ യോഗ്യതാ മത്സരങ്ങളും തുടർന്ന് ഫൈനൽ റൗണ്ടുകളും നടക്കും. വിജയിക്കുന്ന ടീമിന് 10 ദശലക്ഷം യുവാൻ (ഏകദേശം 1.44 മില്യൺ യുഎസ് ഡോളർ) വിലമതിക്കുന്ന ചാമ്പ്യൻഷിപ്പ് ബെൽറ്റാണ് സമ്മാനമായി ലഭിക്കുക. തല വേർപെട്ട ശേഷവും പോരാട്ടം തുടർന്ന മാറ്റഡോറിന്റെ വീഡിയോ ഇതിനകം തന്നെ ലക്ഷക്കണക്കിന് ആളുകളാണ് സമൂഹമാധ്യമങ്ങളിൽ കണ്ടത്. റോബോട്ടിക് സാങ്കേതികവിദ്യ എത്രത്തോളം മുന്നേറിയെന്നതിന്റെ ഉദാഹരണമായാണ് പലരും ഈ ദൃശ്യങ്ങളെ വിശേഷിപ്പിക്കുന്നത്.
Summary: A humanoid robot stunned spectators at China’s Ultimate Robot Knock-out Legend (URKL) tournament by continuing to fight even after its head was knocked loose during combat. The dramatic incident has gone viral, highlighting the rapid advancements in humanoid robotics and AI-powered combat technology.
