റിപ്പോർട്ട്: അൻവർ ഷരിഫ്
വാഴക്കാട്: എടവണ്ണപ്പാറ ടൗണിലും പരിസരങ്ങളിലും റോഡും പൊതുസ്ഥലങ്ങളും കയ്യേറി നടത്തിവരുന്ന അനധികൃത നിർമ്മാണങ്ങളും കച്ചവടങ്ങളും ഒഴിപ്പിക്കുന്നതിനായി വാഴക്കാട് ഗ്രാമപഞ്ചായത്ത് നടപടികൾ ശക്തമാക്കി (Vazhakkad Road Encroachment Removal). ഗതാഗതക്കുരുക്കിന് പരിഹാരം കാണുന്നതിനും പൊതുജനങ്ങൾക്കും വ്യാപാരികൾക്കും സഞ്ചാര സൗകര്യം ഉറപ്പാക്കുന്നതിനുമാണ് പഞ്ചായത്ത് ഭരണസമിതി ഇത്തരമൊരു കടുത്ത തീരുമാനമെടുത്തത്. ഇതിന്റെ ഭാഗമായി എടവണ്ണപ്പാറ-വാഴക്കാട് റോഡിലെ അനധികൃത ഷെഡുകൾ അധികൃതർ പൊളിച്ചുമാറ്റി.
റോഡിലേക്ക് ഇറക്കിവെച്ച സാധനങ്ങളും അനധികൃത നിർമ്മാണങ്ങളും അടിയന്തരമായി നീക്കം ചെയ്യാൻ നേരത്തെ തന്നെ വ്യാപാരികൾക്ക് മുന്നറിയിപ്പ് നൽകിയിരുന്നു. എന്നാൽ ഈ നിർദ്ദേശങ്ങൾ പൂർണ്ണമായി പാലിക്കപ്പെടാത്ത സാഹചര്യത്തിലാണ് പഞ്ചായത്ത് ഉദ്യോഗസ്ഥരും ജനപ്രതിനിധികളും ചേർന്ന് ഒഴിപ്പിക്കൽ നടപടികൾ ആരംഭിച്ചത്. യാതൊരു വിട്ടുവീഴ്ചയ്ക്കും തയ്യാറല്ലെന്ന് പഞ്ചായത്ത് പ്രസിഡണ്ട് വി. ആരിഫ, വൈസ് പ്രസിഡണ്ട് അഡ്വ. എം.കെ. നൗഷാദ് എന്നിവർ വ്യക്തമാക്കി. ബലപ്രയോഗത്തിലൂടെ സാധനങ്ങൾ നശിപ്പിക്കപ്പെടാതിരിക്കാൻ വ്യാപാരികൾ സഹകരിക്കണമെന്നും അവർ അഭ്യർത്ഥിച്ചു.
അതേസമയം, ഒഴിപ്പിക്കൽ നടപടിക്കിടെ പ്രതിഷേധവുമായി എത്തിയ വ്യാപാരി വ്യവസായി ഏകോപന സമിതി എടവണ്ണപ്പാറ യൂണിറ്റ് പ്രതിനിധികളുമായി പഞ്ചായത്ത് ഭരണസമിതി ചർച്ച നടത്തി. സാധനങ്ങൾ സ്വയം മാറ്റുന്നതിനായി തിങ്കളാഴ്ച വരെ സാവകാശം വേണമെന്ന് വ്യാപാരികൾ ആവശ്യപ്പെട്ടു. ജൂലൈ 20-നകം പഞ്ചായത്ത് പരിധിയിലെ എല്ലാ കയ്യേറ്റങ്ങളും ഉടമകൾ തന്നെ പൊളിച്ചുനീക്കണമെന്നും അല്ലാത്തപക്ഷം കർശന നിയമനടപടികൾ സ്വീകരിക്കുമെന്നും പഞ്ചായത്ത് അധികൃതർ അറിയിച്ചു.
സ്ഥിരം സമിതി അധ്യക്ഷന്മാരായ മുസ്തഫ വാഴക്കാട്, മുംതാസ് ബീഗം, വാർഡ് മെമ്പർമാരായ കരീം വെട്ടത്തൂർ, ഭാസ്കരൻ മാസ്റ്റർ, മുനീർ പുളിയേക്കൽ, അസിസ്റ്റന്റ് സെക്രട്ടറി സജേഷ് വി, ഹെഡ് ക്ലർക്ക് സയ്ദ് അക്ബർ ബാദ്ഷാ ഖാൻ, ഹെൽത്ത് ഇൻസ്പെക്ടർ ഡാനിഷ് വി എന്നിവരും പഞ്ചായത്ത് ജീവനക്കാരും പോലീസ് ഉദ്യോഗസ്ഥരും നടപടികൾക്ക് നേതൃത്വം നൽകി.
Summary: Vazhakkad Grama Panchayat has initiated strict measures to remove illegal encroachments and unauthorized constructions along roads in Edavannappara town to ease traffic congestion. While the panchayat has begun demolishing illegal sheds, local traders have been granted until Monday to voluntarily remove their goods following discussions with the governing body, with a final deadline set for July 20.
