ഓടിക്കൊണ്ടിരുന്ന ബസിൽനിന്നു വീണ് വിദ്യാർഥിനിക്ക് പരിക്ക്
ചെറുതോണി: ഓടിക്കൊണ്ടിരുന്ന ബസിന്റെ വാതിൽ തുറന്ന് റോഡിൽ വീണ് വിദ്യാർഥിനിക്കു പരിക്കേറ്റു. പൈനാവ് കേന്ദ്രീയ വിദ്യാലയത്തിലെ ഒൻപതാം ക്ലാസ് വിദ്യാർഥിനി ദിയ ബിജു (14) വിനാണ് പരിക്കേറ്റത്.
ഇന്നലെ വൈകുന്നേരം 6.15 ന് കീരിത്തോടിനുസമീപം പകുതിപ്പാലത്തു വച്ചാണു അപകടം സംഭവിച്ചത്. കെഎസ്ആർടിസി ബസ് വാടകയ്ക്കെടുത്ത് എറണാകുളത്തുള്ള ഫിഷറീസ് ഇൻസ്റ്റിറ്റ്യൂട്ടിലേക്ക് പഠന യാത്ര പോയി തിരികെവരുമ്പോഴാണ് അപകടം.
ബസ് വളവ് തിരിക്കുമ്പോൾ വീഴാതിരിക്കാൻ വാതിലിന്റെ ലോക്കിൽ പിടിച്ചതോടെ വാതിൽ തുറന്ന് റോഡിൽ വീഴുകയായിരുന്നു. പരിക്കേറ്റ വിദ്യാർഥിനിയെ ഉടൻ തന്നെ ചേലച്ചുവട്ടിലെ സ്വകാര്യ ആശുപത്രിയിലും തുടർന്ന് ഇടുക്കി മെഡിക്കൽ കോളജ് ആശുപത്രിയിലും പ്രവേശിപ്പിച്ചു. വിദഗ്ധചികിത്സയ്ക്കായി പിന്നീട് കോട്ടയം മെഡിക്കൽ കോളജിലേക്ക് മാറ്റി.