സ്കൗട്ട് ആന്‍റ് ഗൈഡ് ക്യാമ്പിനെത്തിയ വിദ്യാര്‍ഥിനികള്‍ മുങ്ങിമരിച്ച സംഭവം; മന്ത്രി റിപ്പോര്‍ട്ട് തേടി
മലപ്പുറം: സ്കൗട്ട് ആന്‍റ് ഗൈഡ് ക്യാമ്പിനെത്തിയ വിദ്യാര്‍ഥിനികള്‍ മുങ്ങിമരിച്ച സംഭവത്തില്‍ വിദ്യാഭ്യാസമന്ത്രി വി.ശിവന്‍കുട്ടി റിപ്പോര്‍ട്ട് തേടി. അന്വേഷണം നടത്തി റിപ്പോര്‍ട്ട് സമര്‍പ്പിക്കാന്‍ ജില്ലാ കളക്ടര്‍ക്ക് നിര്‍ദേശം നല്‍കി.
കുടുംബത്തിന്‍റെ ദുഃഖത്തില്‍ പങ്കുചേരുന്നെന്നും സാധ്യമായ എല്ലാ സഹായവും കുട്ടികളുടെ കുടുംബത്തിന് നല്‍കുമെന്നും മന്ത്രി അറിയിച്ചു. കന്‍മനം കുറുങ്കാട് സ്വദേശി പുത്തന്‍വളപ്പില്‍ അബ്ദുല്‍ റഷീദിന്‍റെ മകള്‍ ആയിഷ റിദ (14), പുത്തനത്താണി ചെലൂര്‍ സ്വദേശി കുന്നത്ത് പീടിയേക്കല്‍ മുസ്തഫയുടെ മകള്‍ ഫാത്തിമ മുഹ്‌സിന (11) എന്നിവരാണ് മരിച്ചത്. വെള്ളിയാഴ്ച വൈകിട്ടാണ് അപകടം സംഭവിച്ചത്. മലപ്പുറം കല്‍പകഞ്ചേരി കല്ലിങ്കല്‍പറമ്പ് എംഎസ്എം സ്കൂളിലെ വിദ്യാര്‍ഥിനികളാണ് ഇവര്‍.
49 വിദ്യാര്‍ഥികളും എട്ട് അധ്യാപകരുമടങ്ങിയ സംഘമാണ് കരുളായി വനത്തിനകത്തുള്ള നെടുങ്കയം വിനോദസഞ്ചാര കേന്ദ്രത്തിലെത്തിയത്. ഇവിടെ പുഴയില്‍ കുളിക്കാനിറങ്ങിയപ്പോഴായിരുന്നു അപകടം.
