കണ്ണൂർ: പയ്യന്നൂരിൽ വി. കുഞ്ഞികൃഷ്ണന്റെ വസതിയിൽ അപ്രതീക്ഷിത സന്ദർശനം നടത്തി പി.വി. അൻവർ. ഏകദേശം അരമണിക്കൂറോളം നീണ്ടുനിന്ന കൂടിക്കാഴ്ച രാഷ്ട്രീയ വൃത്തങ്ങളിൽ വലിയ ചർച്ചകൾക്ക് വഴിവെച്ചിരിക്കുകയാണ്. സംസ്ഥാനത്ത് ഇടതുമുന്നണിക്കെതിരെ പുതിയൊരു വിമത കൂട്ടായ്മ രൂപീകരിക്കാനുള്ള അൻവറിന്റെ നീക്കങ്ങളുടെ ഭാഗമായാണ് ഈ സന്ദർശനത്തെ വിലയിരുത്തുന്നത്.(PV Anvar meets V Kunhikrishnan, Is the rebel alliance the goal?)
കൂടിക്കാഴ്ചയ്ക്ക് ശേഷം മാധ്യമങ്ങളോട് സംസാരിച്ച അൻവർ, സന്ദർശനം വ്യക്തിപരമാണെന്നും എന്നാൽ അതിന് വ്യക്തമായ രാഷ്ട്രീയ ലക്ഷ്യമുണ്ടെന്നും വ്യക്തമാക്കി. പിണറായിസം, കുടുംബാധിപത്യം, ഏകാധിപത്യം എന്നിവയ്ക്കെതിരായ പോരാട്ടത്തിന്റെ ഭാഗമായാണ് കുഞ്ഞികൃഷ്ണേട്ടന് ഇവിടെ മത്സരിക്കേണ്ടി വന്നത്. ഇതേ വിഷയങ്ങൾ ഉന്നയിച്ചാണ് ഒന്നര വർഷം മുൻപ് ഞാൻ ഇടതുപക്ഷം വിട്ടത്. സമാന ആശയമുള്ള വ്യക്തി എന്ന നിലയിൽ അദ്ദേഹത്തിന് ധാർമ്മിക പിന്തുണ നൽകാനാണ് ഞാൻ എത്തിയത്, അൻവർ പറഞ്ഞു.
തളിപ്പറമ്പിലെ യുഡിഎഫ് സ്ഥാനാർത്ഥിയായ ടി.കെ. ഗോവിന്ദനെയും താൻ സന്ദർശിക്കുമെന്ന് അൻവർ നേരത്തെ അറിയിച്ചിരുന്നു. എന്നാൽ കാണാൻ താൽപ്പര്യമില്ലെന്ന് ടി.കെ. ഗോവിന്ദൻ നിലപാട് എടുത്തു. ഇതോടെ ആ സന്ദർശനം ഒഴിവാക്കി.
