പാലക്കാട്: റോഡരികിൽ പൊട്ടിക്കിടന്ന കെഎസ്ഇബി (Palakkad road accident) സ്റ്റേ വയർ കഴുത്തിൽ കുരുങ്ങി ഇരുചക്രവാഹന യാത്രക്കാരന് ഗുരുതരമായി പരിക്കേറ്റു. പുത്തൂർ സ്വദേശി ശശികുമാറിനാണ് ഈ ദാരുണമായ അപകടം സംഭവിച്ചത്. മാർക്കറ്റിൽ നിന്നും സാധനങ്ങൾ വാങ്ങി ബൈക്കിൽ വീട്ടിലേക്ക് മടങ്ങുന്നതിനിടെയാണ് ശശികുമാറിന്റെ കഴുത്തിൽ റോഡിലേക്ക് വീണുകിടന്ന വയർ കുടുങ്ങിയത്.
വയറിൽ കുരുങ്ങിയതോടെ നിയന്ത്രണം നഷ്ടപ്പെട്ട വാഹനം മറിയുകയും ശശികുമാർ റോഡിലേക്ക് തലയിടിച്ച് വീഴുകയുമായിരുന്നു. അപകടം കണ്ട ഉടൻ തന്നെ നാട്ടുകാർ ചേർന്ന് ഇദ്ദേഹത്തെ പാലക്കാട് ജില്ലാ ആശുപത്രിയിൽ എത്തിച്ചു. പരിശോധനയിൽ തലയിൽ രക്തം കട്ടപിടിച്ചതായി കണ്ടെത്തിയതിനെ തുടർന്ന് പ്രഥമ ശുശ്രൂഷ നൽകിയ ശേഷം വിദഗ്ധ ചികിത്സയ്ക്കായി കോയമ്പത്തൂരിലെ സ്വകാര്യ ആശുപത്രിയിലേക്ക് മാറ്റി. നിലവിൽ ശശികുമാറിന്റെ ആരോഗ്യനില അതീവ ഗുരുതരമായി തുടരുകയാണെന്ന് ആശുപത്രി അധികൃതർ വ്യക്തമാക്കി.
Story Summary:
A bike rider sustained severe injuries after a snapped KSEB stay wire coiled around his neck in Palakkad. The victim, Sashikumar, lost control of his vehicle and suffered a serious head injury; he has been shifted to a private hospital in Coimbatore as his condition remains critical.
