ഗുവാഹത്തി: പ്രമുഖ സാമൂഹിക പ്രവർത്തകനും പരിസ്ഥിതി വാദിയുമായ സോനം വാങ്ചുക്കിന്റെ ചിത്രം (Sonam wangchuk graffiti) പൊതുസ്ഥലങ്ങളിൽ വരച്ചതിന് രണ്ട് യുവാക്കളെ ഗുവാഹത്തി പോലീസ് അറസ്റ്റ് ചെയ്തു. ബന്ധപ്പെട്ട അധികാരികളുടെ മുൻകൂർ അനുമതിയില്ലാതെയാണ് ഇവർ ചിത്രം വരച്ചതെന്നാണ് പോലീസിന്റെ വിശദീകരണം. ദിബ്രുഗഡ് സ്വദേശി നകുൽ മിലി, ഗുവാഹത്തി ദക്ഷിൺഗാവ് സ്വദേശി ഗൗരവ് സിംഗ് എന്നിവരെയാണ് ദിസ്പുർ പോലീസ് അറസ്റ്റ് ചെയ്തത്.
നഗരത്തിലെ വസിഷ്ഠ ഫ്ലൈഓവറിന് താഴെയും ജ്യോതി-വിഷ്ണു ഇന്റർനാഷണൽ ആർട്ട് തിയേറ്ററിന് സമീപമുള്ള ചുവരുകളിലുമാണ് ഇവർ ചിത്രം വരച്ചത്. പൊതുമുതൽ വികൃതമാക്കൽ തടയുന്ന നിയമപ്രകാരമാണ് പോലീസ് നടപടി. നീറ്റ് പരീക്ഷാ ക്രമക്കേടുകൾക്കെതിരെ ഡൽഹിയിൽ സമരം ചെയ്യവെ ആരോഗ്യനില വഷളായതിനെ തുടർന്ന് സോനം വാങ്ചുക്കിനെ സഫ്ദർജംഗ് ആശുപത്രിയിൽ പ്രവേശിപ്പിച്ച അതേ ദിവസമാണ് ഗുവാഹത്തിയിൽ ഈ അറസ്റ്റ് നടന്നത് എന്നത് ശ്രദ്ധേയമാണ്.
അറസ്റ്റിലായ യുവാക്കൾക്കെതിരെ അന്വേഷണം പുരോഗമിക്കുകയാണെന്നും ലഭിക്കുന്ന തെളിവുകളുടെ അടിസ്ഥാനത്തിൽ കൂടുതൽ നിയമനടപടികളിലേക്ക് കടക്കുമെന്നും പോലീസ് വ്യക്തമാക്കി. ഇതേ രീതിയിൽ നഗരത്തിലെ മറ്റൊരിടത്തും വാങ്ചുക്കിന്റെ ചിത്രം വരച്ചതുമായി ബന്ധപ്പെട്ട് പോലീസ് മറ്റൊരു കേസ് കൂടി രജിസ്റ്റർ ചെയ്തിട്ടുണ്ട്. ഇതിൽ ഉൾപ്പെട്ട പ്രതികൾക്കായി പോലീസ് തിരച്ചിൽ ശക്തമാക്കി.
Story Summary: Guwahati police have arrested two youth, Nakul Mili and Gaurav Singh, for painting graffiti of environmental activist Sonam Wangchuk in public spaces without prior permission. The arrests took place under Dispur police station limits on the same day Wangchuk was hospitalized in Delhi following his protest over NEET irregularities.
