മുൻ മുഖ്യമന്ത്രി പിണറായി വിജയന്റെ നവകേരള യാത്രയ്ക്കിടെ ആലപ്പുഴയിൽ വെച്ച് യൂത്ത് കോൺഗ്രസ്, കെഎസ്യു പ്രവർത്തകരെ സുരക്ഷാ ഉദ്യോഗസ്ഥർ മർദിച്ച കേസ് അട്ടിമറിക്കാൻ ശ്രമിച്ചെന്ന ആരോപണത്തിൽ എഡിജിപി എം.ആർ. അജിത് കുമാറിനെതിരെ കർശന നടപടിക്ക് സർക്കാർ നീക്കം (Navakerala Sadas assault). കേസ് അട്ടിമറിക്കാൻ എഡിജിപി നേരിട്ട് ഇടപെട്ടതായി പ്രത്യേക അന്വേഷണ സംഘം കണ്ടെത്തിയതിനെത്തുടർന്നാണ് നടപടി. ഡിജിപിക്ക് ലഭിച്ച എസ്ഐടി റിപ്പോർട്ടിന്മേൽ നിയമോപദേശം തേടിയ ശേഷം അന്തിമ റിപ്പോർട്ട് അദ്ദേഹം നാളെ ആഭ്യന്തര വകുപ്പിന് കൈമാറിയേക്കും.
അന്വേഷണ ഉദ്യോഗസ്ഥരെ എഡിജിപിയുടെ ഓഫീസിലേക്ക് നേരിട്ട് വിളിച്ചുവരുത്തി കേസ് ഡയറിയും അന്തിമ റിപ്പോർട്ടും തിരുത്താൻ സമ്മർദം ചെലുത്തിയതായി അന്വേഷണത്തിൽ തെളിഞ്ഞു. ഇക്കാര്യം സ്ഥിരീകരിച്ചുകൊണ്ട് അന്വേഷണ സംഘത്തിലെ ഉദ്യോഗസ്ഥർ നൽകിയ മൊഴി റിപ്പോർട്ടിലുണ്ട്. സംഭവത്തിൽ ഉൾപ്പെട്ട അഞ്ച് പോലീസ് ഉദ്യോഗസ്ഥർ കുറ്റക്കാരാണെന്നും ഗുരുതരമായ ചട്ടലംഘനം നടത്തിയെന്നും എസ്ഐടി ആലപ്പുഴ സെഷൻസ് കോടതിയിൽ നേരത്തെ റിപ്പോർട്ട് നൽകിയിരുന്നു.
കുറ്റക്കാർ എത്ര ഉന്നത ഉദ്യോഗസ്ഥരായാലും നടപടിയെടുക്കുമെന്ന് ആഭ്യന്തര മന്ത്രി രമേശ് ചെന്നിത്തല വ്യക്തമാക്കിയിട്ടുണ്ട്. അജിത് കുമാറിന് യാതൊരുവിധ സംരക്ഷണവും നൽകേണ്ടതില്ലെന്നാണ് സർക്കാർ നിലപാട്. സസ്പെൻഷൻ ഉൾപ്പെടെയുള്ള നടപടികൾ സർക്കാരിന്റെ പരിഗണനയിലുണ്ട്. റിപ്പോർട്ട് ലഭിച്ചാലുടൻ അജിത് കുമാറിനെ സസ്പെൻഡ് ചെയ്തേക്കുമെന്നാണ് പുറത്തുവരുന്ന സൂചനകൾ. നടപടിക്ക് മുൻപായി അജിത് കുമാറിൽ നിന്ന് വിശദീകരണം തേടാനും ഡിജിപി തീരുമാനിച്ചിട്ടുണ്ട്.
Summary: The Kerala government is moving toward strict disciplinary action, including potential suspension, against ADGP M.R. Ajith Kumar for allegedly tampering with the investigation into the 2023 assault on Youth Congress activists during the Navakerala Sadas. The DGP is expected to submit a report to the Home Department today, incorporating SIT findings that implicate the ADGP in orchestrating the cover-up.
