തിരുവനന്തപുരം: തമിഴ്നാട് സ്വദേശിനിയായ മുപ്പത്തിയേഴുകാരിയുടെ വലതുകണ്ണിൽനിന്ന് പത്ത് സെന്റീമീറ്റർ നീളമുള്ള ജീവനുള്ള വിരയെ കിംസ്ഹെൽത്ത് ഹോസ്പിറ്റലിലെ ഡോക്ടർമാർ വിജയകരമായി പുറത്തെടുത്തു (KIMSHEALTH). രണ്ട് ദിവസമായി കണ്ണിൽ നീർക്കെട്ടും കഠിനമായ വേദനയും അനുഭവപ്പെട്ടതിനെത്തുടർന്നാണ് യുവതി ചികിത്സ തേടിയത്.
എമർജൻസി മെഡിസിൻ വിഭാഗത്തിൽ പ്രവേശിപ്പിക്കപ്പെട്ട യുവതിയെ പ്രാഥമിക പരിശോധനകൾക്ക് ശേഷം ഒഫ്താൽമോളജി വിഭാഗത്തിലേക്ക് മാറ്റി. കണ്ണിന്റെ സുതാര്യമായ പാളിയായ കൺജങ്റ്റൈവയ്ക്കടിയിലാണ് നീളമുള്ള വിരയെ കണ്ടെത്തിയത്. ഒഫ്താൽമോളജി വിഭാഗം കൺസൾട്ടന്റ് ഡോ. അസ്ഗർ അബ്ബാസിന്റെ നേതൃത്വത്തിലുള്ള സംഘം അതീവ ജാഗ്രതയോടെ ശസ്ത്രക്രിയ നടത്തി കാഴ്ചശക്തിക്ക് തകരാർ സംഭവിക്കാത്ത വിധം വിരയെ നീക്കം ചെയ്തു. കൃത്യസമയത്ത് ചികിത്സ ലഭിച്ചില്ലായിരുന്നെങ്കിൽ കാഴ്ചശക്തി നഷ്ടപ്പെടാൻ പോലും സാധ്യതയുണ്ടായിരുന്നുവെന്ന് ഡോക്ടർമാർ വ്യക്തമാക്കി.
ഡൈറോ ഫൈലേറിയ (Dirofilaria)
നായ്ക്കളിലും പൂച്ചകളിലുമാണ് സാധാരണയായി ‘ഡൈറോ ഫൈലേറിയ’ എന്ന ഇനത്തിൽപ്പെട്ട ഈ വിരകൾ കണ്ടുവരുന്നത്. കൊതുകുകൾ വഴിയാണ് ഇവ മനുഷ്യരിലേക്ക് പകരുന്നത്. മനുഷ്യശരീരത്തിൽ ഇത്തരം വിരകൾ അതിജീവിക്കുന്നത് അപൂർവ്വമാണെങ്കിലും, തൊലിക്കടിയിലോ കണ്ണിന് സമീപത്തോ ഇവ വളരാൻ സാധ്യതയുണ്ട്. ഇന്ത്യയിൽ ഇത്തരത്തിലുള്ള കേസുകൾ വളരെ കുറച്ചുമാത്രമേ റിപ്പോർട്ട് ചെയ്യപ്പെട്ടിട്ടുള്ളൂ.
ശസ്ത്രക്രിയക്ക് ശേഷം യുവതിയുടെ വേദനയും അസ്വസ്ഥതയും മാറുകയും, നീർക്കെട്ട് കുറയാനുള്ള തുടർചികിത്സകൾ നൽകുകയും ചെയ്തു.
Story Summary: Medical experts at KIMSHEALTH, Thiruvananthapuram, successfully removed a 10-cm long live worm (Dirofilaria) from the right eye of a 37-year-old Tamil Nadu native. The rare surgery, led by Dr. Asgar Abbas, saved the woman’s eyesight after she reported severe pain and swelling caused by the parasite, which is typically transmitted by mosquitoes.
