തിരുവനന്തപുരം: കേരളത്തിലെ പുതിയ മുഖ്യമന്ത്രിയെ നിശ്ചയിക്കുന്നതുമായി ബന്ധപ്പെട്ട ചർച്ചകൾ കോൺഗ്രസിനുള്ളിൽ അതീവ സങ്കീർണ്ണമായ തലത്തിലേക്ക് നീങ്ങുന്നു. എം.പിമാർ നിയമസഭാ തിരഞ്ഞെടുപ്പിൽ മത്സരിക്കേണ്ടതില്ലെന്ന ഹൈക്കമാൻഡ് നയം നിലനിൽക്കെ, എഐസിസി ജനറൽ സെക്രട്ടറി കൂടിയായ കെ.സി. വേണുഗോപാൽ മുഖ്യമന്ത്രി സ്ഥാനത്തിനായി അവകാശവാദം ഉന്നയിക്കുന്നത് ശരിയല്ലെന്നാണ് മുതിർന്ന നേതാക്കളുടെ പക്ഷം (Kerala CM selection). പാർട്ടി നയങ്ങൾ നടപ്പിലാക്കാൻ ഉത്തരവാദിത്തപ്പെട്ട ഒരു നേതാവ് തന്നെ അത് ലംഘിക്കുന്നത് തെറ്റായ കീഴ്വഴക്കമുണ്ടാക്കുമെന്ന് ഇവർ എഐസിസി നിരീക്ഷകരെ ബോധിപ്പിച്ചു.
തിരുവനന്തപുരത്ത് നടന്ന നിർണ്ണായകമായ നിയമസഭാ കക്ഷി യോഗത്തിൽ പുതിയ നേതാവിനെ തിരഞ്ഞെടുക്കാനുള്ള പൂർണ്ണ അധികാരം എഐസിസി അധ്യക്ഷൻ മല്ലികാർജുന ഖാർഗെയ്ക്ക് വിട്ടുകൊണ്ട് ഏകവരി പ്രമേയം പാസാക്കി. കെപിസിസി മുൻ പ്രസിഡന്റ് സണ്ണി ജോസഫ് അവതരിപ്പിച്ച പ്രമേയത്തെ വി.ഡി. സതീശൻ പിന്താങ്ങി. യോഗത്തിന് ശേഷം എഐസിസി നിരീക്ഷകർ ഓരോ എം.എൽ.എമാരെയും നേരിൽ കണ്ട് അഭിപ്രായം തേടുന്ന നടപടികൾ തുടരുകയാണ്.
മുഖ്യമന്ത്രി സ്ഥാനത്തെച്ചൊല്ലിയുള്ള ഗ്രൂപ്പ് പോര് ഇത്തവണ പരസ്യമായ ഏറ്റുമുട്ടലിലേക്കാണ് വഴിമാറുന്നത്. തന്നെ മുഖ്യമന്ത്രിയാക്കിയില്ലെങ്കിൽ മന്ത്രിസഭയുടെ ഭാഗമാകാനില്ലെന്നും സാധാരണ എം.എൽ.എയായി തുടരാമെന്നും വി.ഡി. സതീശൻ നിലപാട് കടുപ്പിച്ചു. കേവലം എം.എൽ.എമാരുടെ എണ്ണം മാത്രം നോക്കി മുഖ്യമന്ത്രിയെ നിശ്ചയിക്കരുത് എന്ന ആവശ്യവും അദ്ദേഹം നിരീക്ഷകർക്ക് മുന്നിൽ വെച്ചു. എന്നാൽ, മത്സരത്തിൽ നിന്ന് പിന്മാറില്ലെന്ന ഉറച്ച നിലപാടിലാണ് കെ.സി. വേണുഗോപാൽ. അദ്ദേഹത്തിന് കെപിസിസി പ്രസിഡന്റ് കെ. സുധാകരന്റെയും എ ഗ്രൂപ്പിലെ ഒരു വിഭാഗത്തിന്റെയും പിന്തുണയുണ്ട്.
അതേസമയം, യുഡിഎഫ് ഘടകകക്ഷികളുടെ നിലപാടും ഇത്തവണ നിർണ്ണായകമാകും. മുസ്ലിം ലീഗ് ഉൾപ്പെടെയുള്ള പ്രമുഖ കക്ഷികൾ വി.ഡി. സതീശനെ പിന്തുണയ്ക്കാനാണ് സാധ്യതയെന്നാണ് സൂചന. ഇന്ന് വൈകീട്ട് നിരീക്ഷകർ ഘടകകക്ഷി നേതാക്കളുമായി കൂടിക്കാഴ്ച നടത്തും. നിരീക്ഷകർ ഡൽഹിയിലെത്തി സമർപ്പിക്കുന്ന റിപ്പോർട്ടിന്റെ അടിസ്ഥാനത്തിൽ രാഹുൽ ഗാന്ധിയുൾപ്പെടെയുള്ള മുതിർന്ന നേതാക്കളുമായി ചർച്ച ചെയ്ത ശേഷം ഞായറാഴ്ചയോടെ പുതിയ മുഖ്യമന്ത്രിയെ പ്രഖ്യാപിച്ചേക്കും.
Summary: Senior Congress leaders have raised objections to K.C. Venugopal’s claim for the CM post, citing the High Command’s earlier policy against MPs contesting in the assembly elections. Meanwhile, the CLP meeting passed a resolution authorizing the AICC President to choose the leader. V.D. Satheesan remains firm on his stand of staying out of the cabinet if not appointed CM, while the K.C. camp claims majority support and holds the backing of K. Sudhakaran.
