കരുവന്നൂർ സഹകരണ ബാങ്ക് തട്ടിപ്പ് കേസ് : മുൻ ലോക്‌സഭാംഗവും സിപിഎം നേതാവുമായ പി കെ ബിജുവിന് ഇഡി നോട്ടീസ് അയച്ചു
കരുവന്നൂർ സഹകരണ ബാങ്ക് തട്ടിപ്പ് കേസിൽ മുൻ മന്ത്രി എ സി മൊയ്തീനെ ചോദ്യം ചെയ്യാൻ വിളിപ്പിച്ച് ദിവസങ്ങൾക്കുള്ളിൽ മുൻ ലോക്‌സഭാംഗവും സിപിഎം നേതാവുമായ പി കെ ബിജുവിന് എൻഫോഴ്സ്മെന്റ് ഡയറക്ടറേറ്റ് (ഇഡി) നോട്ടീസ് അയച്ചു. കേസിൽ പ്രതികൾക്കൊപ്പം ബിജുവും മുഖ്യപങ്ക് വഹിച്ചതായി മുൻ കോൺഗ്രസ് എംഎൽഎ അനിൽ അക്കര ആരോപിച്ചു. ഈ ആഴ്ച ആദ്യം ഇതേ കേസിൽ പി സതീഷ് കുമാർ, പി കിരൺ എന്നീ രണ്ട് പേരെ ഇഡി അറസ്റ്റ് ചെയ്തിരുന്നു.
ബിജുവിന്റെ ഉപദേശകനാണ് സതീഷ് കുമാർ, മൊയ്തീനെപ്പോലെ ബിജുവിനും തട്ടിപ്പിൽ തുല്യ പങ്കുണ്ട്. ബിജുവിന്റെ ഏറ്റവും വലിയ സാമ്പത്തിക സ്രോതസ്സ് കുമാറായിരുന്നു. ബിജുവിന്റെ നേതൃത്വത്തിലുള്ള ആഭ്യന്തര സമിതിയാണ് തട്ടിപ്പ് സംബന്ധിച്ച് റിപ്പോർട്ട് സമർപ്പിച്ചത്. ഈ റിപ്പോർട്ടിൽ സതീഷിന്റെ പേര് പരാമർശിച്ചിട്ടില്ല. ഇത് കുറ്റകൃത്യത്തിൽ ബിജുവിന്റെ പങ്കാളിത്തം സ്ഥിരീകരിക്കുന്നു,” അനിൽ അക്കര ശനിയാഴ്ച മാധ്യമങ്ങളോട് പറഞ്ഞു
അതിനിടെ, ചോദ്യം ചെയ്യലിൽ നിന്ന് ഒഴിഞ്ഞ മൊയ്തീന് ഇഡി മൂന്നാമത് നോട്ടീസ് അയച്ചു. തിങ്കളാഴ്ച ഇഡി ഓഫീസിൽ ഹാജരാകാൻ ആവശ്യപ്പെട്ടിട്ടുണ്ട്. തൃശൂർ കരുവന്നൂർ സഹകരണ ബാങ്ക് ലിമിറ്റഡിൽ നിന്ന് 150 കോടി രൂപ തട്ടിയെടുത്തതായി ഇഡി കണ്ടെത്തി.