പാലക്കാട്: വാളയാർ അട്ടപ്പള്ളത്ത് അതിഥി തൊഴിലാളിയായ രാം നാരായണനെ ആൾക്കൂട്ടം തല്ലിക്കൊന്ന സംഭവത്തിന് പിന്നിൽ ആർ.എസ്.എസ് നേതാക്കളാണെന്ന് മന്ത്രി എം.ബി. രാജേഷ്. സംഘപരിവാറിന്റെ വിദ്വേഷ രാഷ്ട്രീയമാണ് ഈ കൊടുംക്രൂരതയ്ക്ക് കാരണമെന്നും അദ്ദേഹം ആരോപിച്ചു.(RSS behind Walayar mob lynching, alleges Minister MB Rajesh)
ജോലി തേടി കേരളത്തിലെത്തിയ രാം നാരായണനെ 'ബംഗ്ലാദേശി' എന്ന് ആക്ഷേപിച്ചാണ് ആൾക്കൂട്ടം ആക്രമിച്ചത്. ആർ.എസ്.എസ് നേതാക്കളാണ് ഈ മർദ്ദനത്തിന് നേതൃത്വം നൽകിയത്. കേസിൽ പിടിയിലായവർ സി.പി.എം പ്രവർത്തകരെ വീട്ടിൽ കയറി വെട്ടിക്കൊല്ലാൻ ശ്രമിച്ച കേസിലെ പ്രതികളാണെന്നും മന്ത്രി ആരോപിച്ചു. പ്രതികൾക്ക് സി.പി.എം ബന്ധമുണ്ടായിരുന്നെങ്കിൽ ഇവിടെ വലിയ ആഘോഷം നടക്കുമായിരുന്നുവെന്നും അദ്ദേഹം പരിഹസിച്ചു.
രാം നാരായണന്റെ കുടുംബത്തിനൊപ്പമാണ് സർക്കാർ. കുറ്റവാളികൾക്ക് പരമാവധി ശിക്ഷ ഉറപ്പാക്കുമെന്നും മന്ത്രി വ്യക്തമാക്കി. എം.വി. ഗോവിന്ദനും ആർ.എസ്.എസിനെതിരെ സമാനമായ ആരോപണങ്ങളുമായി രംഗത്തെത്തി.
തദ്ദേശ സ്വയംഭരണ വകുപ്പുമായി ബന്ധപ്പെട്ട മറ്റൊരു അറിയിപ്പും മന്ത്രി എം.ബി. രാജേഷ് പങ്കുവെച്ചു. സംസ്ഥാനത്തെ സ്ത്രീകൾക്കുള്ള പ്രത്യേക പെൻഷനായി ഇന്ന് മുതൽ അപേക്ഷിക്കാം. അതത് തദ്ദേശ സ്ഥാപനങ്ങളിലെ (പഞ്ചായത്ത്/മുനിസിപ്പാലിറ്റി/കോർപ്പറേഷൻ) സെക്രട്ടറിമാർക്കാണ് അപേക്ഷ സമർപ്പിക്കേണ്ടത്.