കൊച്ചി: കെ.എസ്.ആർ.ടി.സി (KSRTC) ഓർഡിനറി ബസുകളിൽ വനിതകൾക്കായി യു.ഡി.എഫ് സർക്കാർ പുതുതായി ആരംഭിച്ച ‘പ്രിയദർശിനി’ സൗജന്യ യാത്രാ പദ്ധതിക്കെതിരെ സോഷ്യൽ മീഡിയയിൽ വ്യാജ പ്രചാരണം (KSRTC Priyadarshini free travel scheme women). സി.പി.ഐ.എം (CPIM) സംസ്ഥാന സെക്രട്ടറി എം. വി. ഗോവിന്ദൻ മാസ്റ്ററുടെ പേരിൽ വ്യാജ വാർത്താ കാർഡുകൾ നിർമ്മിച്ച് പ്രചരിപ്പിച്ചതിനെതിരെ എൽ.ഡി.എഫ് നേതാവ് അഡ്വ. കെ. എസ്. അരുൺ കുമാർ പോലീസിൽ ഔദ്യോഗികമായി പരാതി നൽകി. എറണാകുളം സെൻട്രൽ പോലീസ് സ്റ്റേഷനിലാണ് സൈബർ കുറ്റകൃത്യത്തിനെതിരെ പരാതി നൽകിയിട്ടുള്ളത്.
സി.പി.ഐ.എം അനുഭാവികളായ വനിതകൾ സർക്കാരിന്റെ ഈ സൗജന്യ ആനുകൂല്യം സ്വീകരിക്കില്ലെന്നും, അവർ സ്വന്തമായി പണം കൊടുത്ത് മാത്രമേ കെ.എസ്.ആർ.ടി.സിയിൽ യാത്ര ചെയ്യുകയുള്ളൂ എന്നും എം. വി. ഗോവിന്ദൻ മാസ്റ്റർ പ്രസ്താവിച്ചു എന്ന രീതിയിലാണ് വ്യാജ കാർഡുകൾ വ്യാപകമായി പ്രചരിച്ചത്. കവിത സുരേഷ്, ടോമി വൈരനാണിക്കൽ, ജിൻസ് തുടങ്ങിയ പ്രൊഫൈലുകൾ വഴിയാണ് ഈ വ്യാജ സന്ദേശം പ്രധാനമായും ഷെയർ ചെയ്യപ്പെട്ടിട്ടുള്ളതെന്ന് പരാതിയിൽ വ്യക്തമാക്കുന്നു. രാഷ്ട്രീയ ലാഭത്തിനായി ജനങ്ങളെ തെറ്റിദ്ധരിപ്പിക്കുന്ന ഇത്തരം വ്യാജ കാർഡുകൾ സാമൂഹ്യമാധ്യമങ്ങളിൽ പ്രചരിക്കുന്നത് അടിയന്തരമായി തടയണമെന്നും കുറ്റക്കാർക്കെതിരെ കർശന നിയമനടപടി സ്വീകരിക്കണമെന്നുമാണ് പരാതിയിലെ ആവശ്യം.
കഴിഞ്ഞ ദിവസമാണ് സംസ്ഥാനത്തെ സ്ത്രീകൾക്കും ട്രാൻസ്ജെൻഡർ വ്യക്തികൾക്കുമായി കെ.എസ്.ആർ.ടി.സി ഓർഡിനറി ബസുകളിൽ പൂർണ്ണമായും സൗജന്യയാത്ര അനുവദിക്കുന്ന യു.ഡി.എഫ് സർക്കാരിന്റെ പ്രഖ്യാപിത ‘പ്രിയദർശിനി’ പദ്ധതി ആരംഭിച്ചത്. മുഖ്യമന്ത്രി വി. ഡി. സതീശൻ പദ്ധതിയുടെ സംസ്ഥാനതല ഉദ്ഘാടനം നിർവ്വഹിച്ചിരുന്നു. തിരുവനന്തപുരം പാപ്പനംകോട് ഡിപ്പോയുടെ ഓർഡിനറി ബസിൽ തമ്പാനൂർ മുതൽ പെരുമാതുറ വരെ യാത്ര ചെയ്തുകൊണ്ടായിരുന്നു മുഖ്യമന്ത്രി ഈ ചരിത്ര പദ്ധതി നാടിന് സമർപ്പിച്ചത്.
പദ്ധതിയുടെ മറവിൽ ഓർഡിനറി ബസുകൾ വ്യാപകമായി സിറ്റി ഫാസ്റ്റ് ആക്കി മാറ്റുന്നു എന്ന തരത്തിൽ ഉയർന്ന ആക്ഷേപങ്ങൾക്ക് പിന്നാലെ കെ.എസ്.ആർ.ടി.സി ഔദ്യോഗിക വിശദീകരണവുമായി രംഗത്തെത്തിയിരുന്നു. സൗജന്യ യാത്ര ആസ്വദിക്കുന്നതിനായി സ്ത്രീകൾക്കോ ട്രാൻസ്ജെൻഡർ വ്യക്തികൾക്കോ പ്രത്യേകം തിരിച്ചറിയൽ കാർഡോ മുൻകൂട്ടിയുള്ള രജിസ്ട്രേഷനോ ആവശ്യമില്ല. യാതൊരുവിധ പ്രായപരിധിയോ മറ്റ് മാനദണ്ഡങ്ങളോ ഇതിന് ബാധകമല്ല. എല്ലാ വിഭാഗം സ്ത്രീകൾക്കും സൌജന്യയാത്ര അനുവദിച്ചതിനാൽ വിദ്യാർത്ഥിനികൾക്ക് ഓർഡിനറി കെ.എസ്.ആർ.ടി.സി ബസുകളിൽ യാത്ര ചെയ്യാൻ ഇനിമുതൽ കൺസെഷൻ ടിക്കറ്റുകളുടെ ആവശ്യമില്ല. പദ്ധതി പ്രകാരം സൗജന്യ യാത്ര അനുവദിക്കുന്ന എല്ലാ ഓർഡിനറി ബസുകളുടെയും മുന്നിലും വശങ്ങളിലുമായി പൊതുജനങ്ങൾക്ക് തിരിച്ചറിയാൻ പാകത്തിൽ ‘പ്രിയദർശിനി സ്ത്രീ സൗജന്യ യാത്ര’ എന്ന് വലിയ അക്ഷരത്തിൽ രേഖപ്പെടുത്തിയിട്ടുണ്ടാകും.
Story Summary: A fake social media campaign in the name of CPIM State Secretary M. V. Govindan has surfaced regarding the UDF government’s newly launched ‘Priyadarshini’ free KSRTC travel scheme for women. The fake card claimed CPIM women would reject the free benefit. LDF leader Adv. K. S. Arun Kumar has lodged a police complaint with Ernakulam Central Police against profiles like Kavitha Suresh, Tomy Vairananiqal, and Jins. The scheme, free for all women and trans persons, was recently inaugurated by CM V. D. Satheesan.
