തിരുവനന്തപുരം: പേട്ട റെയിൽവേ ആശുപത്രിയിലെ ശുചിമുറിയിൽ ഉപേക്ഷിച്ച നിലയിൽ വെടിയുണ്ടകൾ കണ്ടെത്തിയ സംഭവത്തിൽ പോലീസ് വിശദമായ അന്വേഷണം ആരംഭിച്ചു. ആശുപത്രി ശുചിമുറിയിലെ ഒരു മഗ്ഗിനുള്ളിൽ നിന്നാണ് ഉപയോഗിക്കാത്ത ഏഴ് വെടിയുണ്ടകൾ കണ്ടെടുത്തത്.(Bullets found at Pettah Railway Station Hospital, Forensic examination to be conducted)
സായുധ സേനകളും റെയിൽവേ പോലീസും സാധാരണയായി ഉപയോഗിക്കുന്ന 9mm വിഭാഗത്തിലുള്ള വെടിയുണ്ടകളാണ് ഇവ. വെടിയുണ്ടകളുടെ കാലപ്പഴക്കം, നിർമ്മാണ വിവരങ്ങൾ എന്നിവ കണ്ടെത്താനായി ഇവ ഫോറൻസിക് പരിശോധനയ്ക്ക് വിധേയമാക്കും.
ആർപിഎഫ് ഉദ്യോഗസ്ഥർ ചികിത്സ തേടിയെത്തുന്ന ആശുപത്രിയാണിത്. നിലവിൽ ഒരു മുൻ ആർപിഎഫ് ഉദ്യോഗസ്ഥനും ഇവിടെ ചികിത്സയിലുണ്ട്. ഉദ്യോഗസ്ഥർ ആരെങ്കിലും അബദ്ധത്തിൽ ഉപേക്ഷിച്ചതാണോ അതോ മനഃപൂർവ്വം കളഞ്ഞതാണോ എന്നാണ് പോലീസ് പരിശോധിക്കുന്നത്.
