കൊച്ചി: ലോകമെമ്പാടുമുള്ള ഫുട്ബോൾ പ്രേമികൾ ആവേശത്തോടെ കാത്തിരിക്കുന്ന ഒരു മഹാപോരാട്ടത്തിന് കൊച്ചി വീണ്ടും വേദിയാകുന്നു (Brazil Legends vs Indian All Stars Kochi). 2002-ൽ ഫിഫ ലോകകപ്പ് കിരീടം ബ്രസീലിന് നേടിക്കൊടുത്ത ഇതിഹാസ താരങ്ങൾ അണിനിരക്കുന്ന ‘ബ്രസീൽ ലെജൻഡ്സ്’ ടീമും, ഇന്ത്യൻ ഫുട്ബോൾ ചരിത്രത്തിലെ പ്രമുഖ താരങ്ങൾ അണിനിരക്കുന്ന ‘ഇന്ത്യൻ ഓൾ സ്റ്റാർസ്’ ടീമും തമ്മിലുള്ള അന്താരാഷ്ട്ര സൗഹൃദ ഫുട്ബോൾ മത്സരം സെപ്റ്റംബർ 20-ന് കൊച്ചി ജവഹർലാൽ നെഹ്റു ഇന്റർനാഷണൽ സ്റ്റേഡിയത്തിൽ വെച്ച് നടക്കും. മത്സരത്തിന്റെ ഔദ്യോഗിക ടിക്കറ്റ് ലോഞ്ചിങ് കൊച്ചി ലെ മെറിഡിയൻ ഹോട്ടലിൽ നടന്ന പ്രൗഢഗംഭീരമായ ചടങ്ങിൽ വെച്ച് ഫിഷറീസ്-സാമൂഹ്യനീതി വകുപ്പ് മന്ത്രി വി.ഇ. അബ്ദുൾ ഗഫൂർ നിർവ്വഹിച്ചു.
ലോക ഫുട്ബോളിലെ മാന്ത്രികൻ റൊണാൾഡീഞ്ഞോ, ഇതിഹാസ ഫോർവേഡ് റിവാൾഡോ തുടങ്ങിയ സൂപ്പർ താരങ്ങൾ കൊച്ചിയിലെ പുൽമൈതാനത്തിൽ വീണ്ടും പന്തുതട്ടാൻ എത്തുന്നു എന്നതാണ് ഈ മത്സരത്തിന്റെ ഏറ്റവും വലിയ സവിശേഷത. ഇവർക്കൊപ്പം 2002 ലോകകപ്പ് ടീമിൽ അംഗങ്ങളായിരുന്ന എഡ്മിൽസൺ, പൗലോ സെർജിയോ, ജിയോവാനി, ജൂനിയർ, വിയോള, ഗോമസ് (ഗോൾകീപ്പർ), അമാരൽ, ഗുസ്താവോ നേരി, റിക്കാർഡോ ഒലിവേര, ജോർജീഞ്ഞോ, കമാൻഡുകായ, എലിവെൽട്ടൺ, സൂസ, പാരാ, ഡിയോഗോ എന്നിവരടങ്ങുന്ന ശക്തമായ നിരയാണ് ബ്രസീലിനായി ബൂട്ട് കെട്ടുന്നത്. മറുഭാഗത്ത് കറുത്ത മുത്ത് ഐ.എം. വിജയൻ, സി.കെ. വിനീത്, ജോ പോൾ അഞ്ചേരി, കെ.ടി. ചാക്കോ തുടങ്ങി ഇന്ത്യൻ ഫുട്ബോളിലെ മുൻകാല സൂപ്പർ ഹീറോകളാണ് ഇന്ത്യൻ ഓൾ സ്റ്റാർസിനായി അണിനിരക്കുന്നത്.
ഗാമൻ വേൾഡ് സ്പോർട്സ് എന്റർടൈൻമെന്റ് പ്രൈവറ്റ് ലിമിറ്റഡ്, എ ടു ഇസെഡ് ലോജിസ്റ്റിക്സ് ഇന്ത്യ പ്രൈവറ്റ് ലിമിറ്റഡ്, എ സാബാ ഡോസ് ഇനിഷ്യേറ്റീവ് എന്നിവർ സംയുക്തമായാണ് കൊച്ചിയിലെ ഈ മെഗാ രാജ്യാന്തര ഫുട്ബോൾ മത്സരം സംഘടിപ്പിക്കുന്നത്. ബ്രസീൽ മുൻ താരങ്ങളുടെ ഈ ഏഷ്യൻ അന്താരാഷ്ട്ര ടൂറിന്റെ ഭാഗമായി അഞ്ച് പ്രധാന നഗരങ്ങളിലാണ് മത്സരങ്ങൾ ക്രമീകരിച്ചിരിക്കുന്നത്. ചെന്നൈ, കൊച്ചി, ഹൈദരാബാദ്, മുംബൈ, ദുബായ് എന്നിവിടങ്ങളിലായി നടത്തുന്ന ഈ ടൂറിലെ രണ്ടാമത്തെ മത്സരത്തിനാണ് കൊച്ചി വേദിയാകുന്നത്. ഇതിന് മുൻപ് ചെന്നൈയിൽ വെച്ച് അരങ്ങേറിയ ആദ്യ മത്സരം വൻ വിജയമായിരുന്നുവെന്ന് സംഘാടകർ വാർത്താസമ്മേളനത്തിൽ അറിയിച്ചു. ടിക്കറ്റ് ലോഞ്ചിങ് ചടങ്ങിൽ ഹൈബി ഈഡൻ എം.പി, ടി.ജെ. വിനോദ് എം.എൽ.എ, കൊച്ചി കോർപ്പറേഷൻ പൊതുമരാമത്ത് സ്റ്റാൻഡിങ് കമ്മിറ്റി ചെയർമാർ ടി.കെ. അഷ്റഫ്, ഗാമൻ വേൾഡ് സ്പോർട്സ് സി.ഇ.ഓ എ. രാജേഷ് തുടങ്ങിയ പ്രമുഖ വ്യക്തികളും പങ്കെടുത്തു.
Story Summary:
Kochi’s Jawaharlal Nehru Stadium will host a historic football match between Brazil Legends and Indian All Stars on September 20. The match features legendary 2002 World Cup winners like Ronaldinho and Rivaldo against Indian icons like I.M. Vijayan and Jo Paul Ancheri. The ticket launch was conducted by Minister V.E. Abdul Gafoor in Kochi. This is the second match of the 5-city international tour.
