തൃശൂർ: അതിരപ്പിള്ളി – മലക്കപ്പാറ പാതയിൽ അടിയന്തര റോഡ് നിർമ്മാണ-നവീകരണ പ്രവൃത്തികൾ ആരംഭിച്ചതിനെ തുടർന്ന് കർശന ഗതാഗത നിയന്ത്രണം ഏർപ്പെടുത്തി. നിർമ്മാണ പ്രവർത്തനങ്ങൾ സുഗമമാക്കുന്നതിന്റെ ഭാഗമായി ഈ റൂട്ടിൽ താൽക്കാലികമായി പൂർണ്ണ ഗതാഗത നിരോധനമാണ് പ്രഖ്യാപിച്ചിരിക്കുന്നത്.(Athirappilly Malakkappara Road Closed For Maintenance Vehicles Diverted Via Palakkad)
നിയന്ത്രണങ്ങളുടെ ഭാഗമായി തമിഴ്നാട്ടിൽ നിന്നുള്ള വാഹനങ്ങൾ മലക്കപ്പാറയിലും ചാലക്കുടിയിൽ നിന്നുള്ളവ വാഴച്ചാലിലും പോലീസ് തടയും. യാത്രക്കാരും വിനോദസഞ്ചാരികളും വനപാതയിലെ യാത്രാവിലക്ക് ശ്രദ്ധിക്കണമെന്ന് അധികൃതർ അറിയിച്ചു. പൊള്ളാച്ചി, വാൽപ്പാറ ഭാഗത്തുനിന്ന് അതിരപ്പിള്ളി, ചാലക്കുടി മേഖലകളിലേക്ക് പോകുന്നതിനായി മലക്കപ്പാറ വഴി വരുന്ന എല്ലാത്തരം വാഹനങ്ങളും മലക്കപ്പാറ ചെക്ക്പോസ്റ്റിൽ തടയും.
ചാലക്കുടി, അതിരപ്പിള്ളി ഭാഗത്തുനിന്ന് മലക്കപ്പാറ, വാൽപ്പാറ ഭാഗങ്ങളിലേക്ക് പോകുന്ന വാഹനങ്ങൾ വാഴച്ചാൽ ചെക്ക്പോസ്റ്റിൽ തടയുന്നതായിരിക്കും. ഇവിടേക്ക് എത്തുന്ന വിനോദസഞ്ചാരികൾക്കും മറ്റ് സ്വകാര്യ വാഹനങ്ങൾക്കും വാഴച്ചാലിനപ്പുറത്തേക്ക് പ്രവേശനമുണ്ടായിരിക്കില്ല. തമിഴ്നാട്ടിൽ നിന്നും തൃശ്ശൂർ, എറണാകുളം ഭാഗങ്ങളിലേക്ക് പോകേണ്ട യാത്രക്കാരും, തിരികെ യാത്ര ചെയ്യുന്നവരും ഈ വനപാത പൂർണ്ണമായും ഒഴിവാക്കേണ്ടതാണ്. ഇതിന് പകരമായി പാലക്കാട് – മണ്ണുത്തി ദേശീയപാത വഴിയുള്ള ബദൽ റൂട്ടുകൾ ഉപയോഗിച്ച് യാത്ര ക്രമീകരിക്കണം. റോഡ് നിർമ്മാണം പൂർത്തിയാകുന്നത് വരെ പൊതുജനങ്ങളും വിനോദസഞ്ചാരികളും ഈ സുരക്ഷാ നിയന്ത്രണങ്ങളോട് പൂർണ്ണമായി സഹകരിക്കണമെന്ന് പൊതുമരാമത്ത് വകുപ്പും വനംവകുപ്പും അഭ്യർത്ഥിച്ചു.
Story Summary
A total traffic ban has been imposed on the Athirappilly – Malakkappara interstate forest route due to urgent road maintenance work. Vehicles from Tamil Nadu are being stopped at Malakkappara and those from Chalakudy at Vazhachal, with commuters advised to use the Palakkad – Mannuthy National Highway (NH 544) as an alternative route.
