കോഴിക്കോട്: കെഎസ്ആർടിസി പ്രിയദർശിനി ബസിൽ നിന്ന് റോഡിലേക്ക് തെറിച്ചുവീണ് പ്ലസ് വൺ വിദ്യാർഥിനിക്ക് പരിക്കേറ്റു. നാദാപുരം ടിഐഎം ഹയർ സെക്കൻഡറി സ്കൂളിലെ വിദ്യാർഥിനിയും കക്കട്ട് മണിയൂർതാഴെ സ്വദേശിനിയുമായ വൈഗയാണ് അപകടത്തിൽപ്പെട്ടത് (KSRTC Priyadarshini bus accident).
തിങ്കളാഴ്ച രാവിലെ എട്ടരയോടെയാണ് സംഭവം. വിലങ്ങാട്–കണ്ണൂർ റൂട്ടിൽ സർവീസ് നടത്തിയിരുന്ന കെഎസ്ആർടിസി പ്രിയദർശിനി ബസിൽ മണിയൂർതാഴെ സ്റ്റോപ്പിൽ നിന്നാണ് വൈഗ കയറിയത്. ബസിൽ അമിത തിരക്കുണ്ടായിരുന്നതിനാൽ വിദ്യാർഥിനിക്ക് സ്റ്റെപ്പിൽ നിൽക്കേണ്ട സാഹചര്യമുണ്ടായതായി ദൃക്സാക്ഷികൾ പറഞ്ഞു.
തിരക്കിനെ തുടർന്ന് ബസിന്റെ ഓട്ടോമാറ്റിക് ഡോർ പൂർണമായും അടയാതിരുന്നതായാണ് വിവരം. യാത്രയ്ക്കിടെ ഡോർ തുറന്നതോടെ വിദ്യാർഥിനി ബസിൽ നിന്ന് റോഡിലേക്ക് തെറിച്ചുവീഴുകയായിരുന്നുവെന്നാണ് പ്രാഥമിക വിവരം.
പരിക്കേറ്റ വൈഗയെ ഉടൻ സമീപത്തെ ആശുപത്രിയിൽ പ്രവേശിപ്പിച്ചു. സംഭവത്തിൽ കെഎസ്ആർടിസി അധികൃതരും പൊലീസും കൂടുതൽ അന്വേഷണം നടത്തിവരികയാണ്.
Story Summary:
A Plus One student was injured after falling from a KSRTC Priyadarshini bus in Kozhikode. Preliminary reports suggest the automatic door did not close properly due to heavy crowding.
