തിരുവനന്തപുരം: പുതുതായി രൂപീകരിക്കപ്പെട്ട പതിനാറാം കേരള നിയമസഭയിലെ അംഗങ്ങളുടെ സത്യപ്രതിജ്ഞാ ചടങ്ങുകൾ സഭാ മന്ദിരത്തിൽ. ഇന്ന് രാവിലെ 9 മണിക്ക് ആരംഭിച്ച ചടങ്ങിൽ പ്രോടേം സ്പീക്കർ ജി. സുധാകരനാണ് പുതിയ സഭാംഗങ്ങൾക്ക് സത്യവാചകം ചൊല്ലിക്കൊടുത്തത്. തിങ്കളാഴ്ച വി.ഡി. സതീശൻ സർക്കാരിന്റെ സത്യപ്രതിജ്ഞയും ഇന്നലെ മന്ത്രിമാരുടെ വകുപ്പുവിഭജനവും പൂർത്തിയായതിന് പിന്നാലെയാണ് നിയമസഭയുടെ പ്രത്യേക സമ്മേളനം വിളിച്ചുചേർത്തത്.(16th Kerala Assembly MLA Swearing In Chandy Oommen Bicycle Ride TK Govindan)
അക്ഷരമാലാ ക്രമത്തിലാണ് അംഗങ്ങൾ സത്യവാചകം ചൊല്ലിയത്. പുതിയ യു.ഡി.എഫ് മന്ത്രിസഭയിലെ ഫിഷറീസ് മന്ത്രി വി.ഇ. അബ്ദുൾ ഗഫൂറാണ് സഭാംഗമായി ആദ്യം സത്യപ്രതിജ്ഞ ചെയ്തത്. തുടർന്ന് പാറക്കൽ അബ്ദുള്ള, കെ.എം. അഭിജിത്ത് എന്നിവരും ദൈവനാമത്തിൽ സത്യപ്രതിജ്ഞ ചെയ്ത് അധികാരമേറ്റു. കെ.കെ. ആബിദ് ഹുസൈൻ തങ്ങൾ, അബിൻ വർക്കി എന്നിവരും ദൈവനാമത്തിൽ ഒപ്പിട്ടപ്പോൾ, പുനലൂർ എം.എൽ.എ സി. അജയപ്രസാദ്, ജി.ആർ. അനിൽ, എം.എസ്. അരുൺ കുമാർ, കെ.എൻ. ബാലഗോപാൽ, വി.ടി. ബൽറാം, സി.പി. ജോൺ, വി. ജോയ് എന്നിവർ സഗൗരവമാണ് പ്രതിജ്ഞ എടുത്തത്. അക്ഷരമാലാ ക്രമത്തിൽ ‘അ’യിൽ തുടങ്ങിയപ്പോൾ ഒ.എസ്. അംബികയായിരുന്നു സഭയിൽ സത്യപ്രതിജ്ഞ ചെയ്ത ആദ്യ വനിതാ അംഗം. ഇവർ സഗൗരവമാണ് പ്രതിജ്ഞ ചെയ്തത്.
അന്തരിച്ച മുൻ മുഖ്യമന്ത്രി ഉമ്മൻചാണ്ടിയുടെ ഫോട്ടോ പതിച്ച ടി-ഷർട്ട് ധരിച്ചാണ് നിയമസഭാ മന്ദിരത്തിലേക്ക് പുതുപ്പള്ളി എം.എൽ.എ ചാണ്ടി ഉമ്മൻ എത്തിയത്. ഇത് സഭയ്ക്ക് പുറത്തും അകത്തും വലിയ ശ്രദ്ധയാകർഷിച്ചു. മഞ്ചേശ്വരം എം.എൽ.എ എ.കെ.എം. അഷ്റഫ് കന്നഡ ഭാഷയിലാണ് സത്യപ്രതിജ്ഞ ചെയ്തത്. കോഴിക്കോട് സൗത്ത് എം.എൽ.എ അഡ്വ. ഫൈസൽ ബാബു ഇംഗ്ലീഷിലാണ് സത്യവാചകം ചൊല്ലിയത്.
തളിപ്പറമ്പിൽ നിന്ന് സിപിഎമ്മിനോട് രാഷ്ട്രീയമായി തെറ്റിപ്പിരിഞ്ഞ് യു.ഡി.എഫ് സ്വതന്ത്രനായി മത്സരിച്ച് അട്ടിമറി വിജയം നേടിയ ടി.കെ. ഗോവിന്ദന്റെ സത്യപ്രതിജ്ഞ സഭയിലെ അപൂർവ്വ നിമിഷങ്ങളിലൊന്നായി. പ്രതിപക്ഷ നിരയിലിരുന്ന മുൻ മുഖ്യമന്ത്രി പിണറായി വിജയന് കൈ കൊടുത്ത ശേഷമാണ് അദ്ദേഹം സത്യവാചകം ചൊല്ലാനായി എത്തിയത്. സഗൗരവം പ്രതിജ്ഞ ചെയ്ത അദ്ദേഹത്തെ ഭരണകക്ഷി അംഗങ്ങൾ വൻ കയ്യടികളോടെയാണ് വരവേറ്റത്.
ആലുവ എം.എൽ.എ അൻവർ സാദത്ത് തന്റെ സത്യവാചകം പൂർത്തിയാക്കിയ ശേഷം ആലുവാക്കാർക്ക് നന്ദി രേഖപ്പെടുത്തി. നാളെയാണ് നിയമസഭയിലെ പുതിയ സ്പീക്കറെ കണ്ടെത്താനുള്ള തിരഞ്ഞെടുപ്പ് നടക്കുക. തുടർന്ന് മേയ് 29-ന് ഗവർണറുടെ നയപ്രഖ്യാപന പ്രസംഗത്തോടെ സഭാ സമ്മേളനത്തിന്റെ അടുത്ത ഘട്ട നടപടികളിലേക്ക് നിയമസഭ കടക്കും.
Story Summary
The swearing-in ceremony of the newly elected MLAs of the 16th Kerala Legislative Assembly concluded with Pro tem Speaker G. Sudhakaran administering the oath. Following the formation of the VD Satheesan government, the session witnessed distinctive highlights, including Chandy Oommen arriving on a bicycle wearing a T-shirt featuring Oommen Chandy, AKM Ashraf taking the oath in Kannada, and rebel leader TK Govindan shaking hands with Pinarayi Vijayan before his oath.
