ന്യൂഡൽഹി: രാജ്യതലസ്ഥാനത്ത് പ്രധാനമന്ത്രിയുടെ വസതിക്ക് മുന്നിൽ കോൺഗ്രസ് നടത്തിയ പ്രതിഷേധത്തിനിടെ പ്രതിപക്ഷ നേതാവ് രാഹുൽ ഗാന്ധിക്കെതിരെ രൂക്ഷവിമർശനവുമായി കേന്ദ്രമന്ത്രി ജിതേന്ദ്ര സിങ് (Jitendra singh rahul gandhi). രാഹുൽ ഗാന്ധിയുടേത് ജനാധിപത്യ മര്യാദകൾക്ക് ചേരാത്ത പെരുമാറ്റമാണെന്ന് മന്ത്രി കുറ്റപ്പെടുത്തി. വിഷയം ചർച്ച ചെയ്യുന്നതിനായി സർക്കാരിന്റെ പ്രതിനിധിയായി താനും കേന്ദ്ര ആഭ്യന്തര സെക്രട്ടറിയും സ്ഥലത്തെത്തി സംസാരിച്ചിരുന്നെങ്കിലും, രാഹുൽ ഗാന്ധി പൊടുന്നനെ നിലപാട് മാറ്റുകയായിരുന്നുവെന്ന് അദ്ദേഹം സമൂഹമാധ്യമമായ ‘എക്സി’ൽ (X) പങ്കുവെച്ച പ്രസ്താവനയിലൂടെ പറഞ്ഞു.
നീറ്റ് ചോദ്യപ്പേപ്പർ ചോർച്ചയുമായി ബന്ധപ്പെട്ട വിഷയങ്ങൾ പാർലമെന്റിൽ ചർച്ച ചെയ്യാൻ തയ്യാറാണെന്ന് കേന്ദ്ര സർക്കാർ വ്യക്തമാക്കിയാൽ സമരം അവസാനിപ്പിക്കാമെന്നാണ് രാഹുൽ ഗാന്ധി ആദ്യം അറിയിച്ചത്. സർക്കാരിലെ ഉന്നതരുമായി സംസാരിച്ച് ഈ ആവശ്യം അംഗീകരിച്ചതായി വ്യക്തമാക്കിയപ്പോൾ രാഹുൽ പുതിയ ആവശ്യങ്ങൾ ഉന്നയിച്ച് വാക്കുമാറുകയായിരുന്നു. കേന്ദ്ര വിദ്യാഭ്യാസ മന്ത്രിയുടെ രാജി കൂടി വേണമെന്ന പുതിയ ഉപാധിയാണ് രാഹുൽ പെട്ടെന്ന് മുന്നോട്ടുവെച്ചത്. ഉത്തരവാദപ്പെട്ട ഒരു പ്രതിപക്ഷ നേതാവിൽ നിന്ന് ഇത്തരത്തിൽ നിലപാട് മാറ്റുന്നത് ജനാധിപത്യ സംവിധാനത്തിന് ചേർന്നതല്ലെന്നും മന്ത്രി കൂട്ടിച്ചേർത്തു.
പ്രധാനമന്ത്രിയുടെ ഔദ്യോഗിക വസതി പ്രതിഷേധങ്ങൾ നടത്തുന്നതിനുള്ള അനുയോജ്യമായ സ്ഥലമല്ലെന്ന് ഓർമ്മിപ്പിച്ചപ്പോൾ “അത് തന്റെ തീരുമാനമാണ്” എന്ന മറുപടിയാണ് രാഹുൽ നൽകിയത്. നീറ്റ് വിഷയത്തിൽ പാർലമെന്റിൽ സമഗ്രമായ ചർച്ചയ്ക്ക് തയ്യാറാണെന്ന് സർക്കാർ നേരത്തെ വ്യക്തമാക്കിയതാണെന്നും, എന്നാൽ ഇതുവരെ പാർലമെന്റ് ചട്ടപ്രകാരമുള്ള നോട്ടീസ് നൽകാൻ പോലും കോൺഗ്രസ് തയ്യാറായിട്ടില്ലെന്നും ജിതേന്ദ്ര സിങ് വിമർശിച്ചു.
അതേസമയം, പ്രധാനമന്ത്രിയുടെ വസതിക്ക് മുന്നിൽ പ്രതിഷേധിച്ച രാഹുൽ ഗാന്ധിയെയും പ്രിയങ്ക ഗാന്ധിയെയും ദില്ലി പോലീസ് ബലം പ്രയോഗിച്ച് തൂക്കിയെടുത്ത് കസ്റ്റഡിയിലെടുക്കുകയായിരുന്നു. എഐസിസി ജനറൽ സെക്രട്ടറി കെ.സി. വേണുഗോപാൽ ഉൾപ്പെടെയുള്ള ജനപ്രതിനിധികളെയും സമാജ്വാദി പാർട്ടി അധ്യക്ഷൻ അഖിലേഷ് യാദവിനെയും പോലീസ് അറസ്റ്റ് ചെയ്ത് നീക്കി.
Story Summary: Union Minister Jitendra Singh sharply criticized Leader of the Opposition Rahul Gandhi over his protest outside the Prime Minister’s residence, terming his behavior undemocratic and accusing him of backtracking on agreed discussion terms over the NEET exam issue.
