വാഷിങ്ടൺ: പശ്ചിമേഷ്യയെ യുദ്ധത്തിലേക്ക് തള്ളിവിട്ട് തുടർച്ചയായ രണ്ടാം ദിവസവും ഇറാന്റെ തന്ത്രപ്രധാന കേന്ദ്രങ്ങളിൽ അമേരിക്കൻ സൈന്യത്തിന്റെ അതിശക്തമായ വ്യോമാക്രമണം. ഇറാന്റെ തെക്കുകിഴക്കൻ നഗരമായ ഇലാൻഷഹറിലെ വ്യോമതാവളത്തിന് നേരെ യുഎസ് നടത്തിയ പുതിയ ആക്രമണത്തിന്റെ ചിത്രങ്ങളും വീഡിയോയും പ്രസിഡന്റ് ഡൊണാൾഡ് ട്രംപ് നേരിട്ട് പങ്കുവെച്ചു. ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് ഭാഗികമായി ഉപയോഗിച്ചിരുന്ന താവളമാണിത്. ഇതിന് പിന്നാലെ ഇറാനെതിരെ കടുത്ത ഭീഷണിയുമായി രംഗത്തെത്തിയ ട്രംപ്, ഹോർമുസ് കടലിടുക്കിൽ കപ്പലുകൾക്ക് നേരെ ഇറാൻ നടത്തുന്ന ഓരോ ആക്രമണത്തിനും 20 മടങ്ങ് ശക്തമായ തിരിച്ചടി യുഎസ് സൈന്യം നൽകുമെന്ന് പ്രഖ്യാപിച്ചു.(US Iran airstrikes, US Launches Second Day Of Airstrikes On Iran As Donald Trump Warns Of Severe Retaliation)
ഇറാനിലെ ആണവനിലയ സമുച്ചയം സ്ഥിതി ചെയ്യുന്ന ബുഷഹർ, തുറമുഖ നഗരങ്ങളായ ചബാഹർ, കോണാർക്, ബന്ദർ അബ്ബാസ്, സിരിക്, ഇലാൻഷഹർ എന്നിവിടങ്ങളിൽ യുഎസ് സൈന്യം കനത്ത നാശനഷ്ടം വിതച്ചതായി ഇറാന്റെ ഔദ്യോഗിക മാധ്യമങ്ങൾ സ്ഥിരീകരിച്ചു. ഇതിന് പ്രതികാരമായി ഇറാൻ ബഹ്റൈൻ, കുവൈത്ത്, ഖത്തർ എന്നീ ഗൾഫ് രാജ്യങ്ങൾക്ക് നേരെ വൻതോതിൽ മിസൈൽ-ഡ്രോൺ ആക്രമണങ്ങൾ അഴിച്ചുവിട്ടത് മേഖലയെ കൂടുതൽ സങ്കീർണ്ണമാക്കിയിട്ടുണ്ട്. കുവൈത്ത് സൈന്യം തങ്ങൾക്ക് നേരെയെത്തിയ ഡ്രോണുകളും മിസൈലുകളും ആകാശത്തുവെച്ച് തകർത്തതായി അറിയിച്ചു.
തങ്ങളുമായി വെടിനിർത്തൽ കരാറിലെത്താൻ ടെഹ്റാൻ ഇപ്പോൾ വളരെയധികം ആഗ്രഹിക്കുന്നുണ്ടെന്ന് എയർഫോഴ്സ് വൺ വിമാനത്തിൽ വെച്ച് ട്രംപ് മാധ്യമങ്ങളോട് അവകാശപ്പെട്ടു. എന്നാൽ ഇറാൻ ഭരണകൂടത്തെ വിശ്വസിക്കാൻ കൊള്ളില്ലെന്നും അവർ ‘ഭ്രാന്തന്മാരെപ്പോലെയാണ്’ പെരുമാറുന്നതെന്നും ട്രംപ് പരിഹസിച്ചു. ഇറാന്റെ വൈദ്യുതി നിലയങ്ങൾ, ശുദ്ധജല വിതരണ കേന്ദ്രങ്ങൾ, പ്രധാന എണ്ണ ഉത്പാദന കേന്ദ്രമായ ഖാർഗ് ദ്വീപ് എന്നിവ തകർക്കുമെന്നും ട്രംപ് ഭീഷണിപ്പെടുത്തി.
അതേസമയം, ട്രംപിന്റെ ഭീഷണികൾക്ക് ശക്തമായ മറുപടിയുമായി ഇറാന്റെ ഉന്നത നേതാക്കൾ രംഗത്തെത്തി. “അമേരിക്ക അടിച്ചാൽ തിരിച്ചടിയും അത്രത്തോളം ശക്തമായിരിക്കും” എന്ന് ഇറാന്റെ പാർലമെന്റ് സ്പീക്കർ മുഹമ്മദ് ബാഗർ ഖാലിബാഫ് എക്സ് പ്ലാറ്റ്ഫോമിൽ കുറിച്ചു. ട്രംപിന്റേത് കരുത്തിന്റെ ലക്ഷണമല്ലെന്നും പരാജയപ്പെട്ട നയങ്ങളുടെ കുറ്റസമ്മതമാണെന്നും ഡെപ്യൂട്ടി വിദേശകാര്യമന്ത്രി കാസിം ഗരീബാബാദി പ്രതികരിച്ചു. ഫെബ്രുവരി 28-ന് നടന്ന വ്യോമാക്രമണത്തിൽ കൊല്ലപ്പെട്ട മുൻ പരമോന്നത നേതാവ് ആയത്തുള്ള അലി ഖമേനിയുടെ സംസ്കാരച്ചടങ്ങുകൾ നടക്കാനിരിക്കെയാണ് ഇറാനെ പിടിച്ചുലച്ച പുതിയ യുഎസ് ആക്രമണമുണ്ടായിരിക്കുന്നത്. യുദ്ധം മുറുകിയതോടെ ആഗോള വിപണിയിൽ എണ്ണവില എട്ട് ശതമാനത്തോളം കുതിച്ചുയർന്നു.
Story Summary
The US military launched a second consecutive day of airstrikes on Iranian bases, including an IRGC-utilized airbase in Iranshahr, prompting retaliatory Iranian missile attacks on Bahrain, Kuwait, and Qatar. While US President Donald Trump threatened to hit Iranian targets 20 times harder and target its civilian infrastructure, Iranian leaders defiantly warned that any US aggression would face immediate and equal force.
