വാഷിംഗ്ടൺ: മാസങ്ങൾ നീണ്ട സംഘർഷങ്ങൾക്കും സൈനിക നടപടികൾക്കും ശേഷം അമേരിക്കയും ഇറാനും ഔദ്യോഗികമായി സമാധാന ഉടമ്പടിയിൽ ഒപ്പുവെച്ചു. ഹോർമുസ് കടലിടുക്ക് വീണ്ടും തുറക്കുന്നതും യുദ്ധം അവസാനിപ്പിക്കുന്നതും ലക്ഷ്യമിട്ടാണ് ഇരുരാജ്യങ്ങളും ഡിജിറ്റലായി ധാരണാപത്രത്തിൽ ഒപ്പുവെച്ചത്. യു.എസ് പ്രസിഡന്റ് ഡൊണാൾഡ് ട്രംപും ഇറാനിയൻ പ്രസിഡന്റ് മസൂദ് പെസെഷ്കിയാനും ചേർന്നാണ് കരാർ യാഥാർത്ഥ്യമാക്കിയത്. യുദ്ധം അമേരിക്കൻ ശക്തിയുടെ പരിമിതികൾ വെളിപ്പെടുത്തിയെന്ന വിമർശനങ്ങളെ ട്രംപ് തള്ളിക്കളഞ്ഞു.(US and Iran Sign Peace Deal to End Hostilities and Reopen Strait of Hormuz)
“അമേരിക്കൻ ശക്തിക്ക് അതിരുകളില്ല” എന്ന് അദ്ദേഹം വ്യക്തമാക്കി. ഇറാനെ സൈനികമായി പൂർണ്ണമായും പരാജയപ്പെടുത്തിയെന്നും, ഒപ്പുവെച്ച കരാർ ഇറാൻ നടത്തിയ ഒരുതരം കീഴടങ്ങലാണ് എന്നും ട്രംപ് അവകാശപ്പെട്ടു. ഒരു സമ്പൂർണ്ണ നാവിക ഉപരോധം ഏർപ്പെടുത്തി ഒരൊറ്റ കപ്പലിനെപ്പോലും കടത്തിവിടാതെ ഇറാനെ മുട്ടുകുത്തിക്കാൻ അമേരിക്കയ്ക്ക് കഴിഞ്ഞു എന്ന് അദ്ദേഹം പറഞ്ഞു.
ഇറാനിയൻ എണ്ണ കയറ്റുമതിക്കുള്ള നിയന്ത്രണങ്ങൾ ഘട്ടംഘട്ടമായി നീക്കും. സമാധാനപരമായ ചർച്ചകളിലൂടെ ആണവ പരിപാടികൾ, സാമ്പത്തിക സഹകരണം എന്നിവയിൽ തുടർനടപടികൾ സ്വീകരിക്കും. അന്താരാഷ്ട്ര നിരീക്ഷണത്തിൽ യുറേനിയം സമ്പുഷ്ടീകരണം തുടരാൻ ഇറാനു അനുമതിയുണ്ടാകും. യുദ്ധം നീണ്ടുപോയാൽ അത് ആഗോള സമ്പദ്വ്യവസ്ഥയെ തകർക്കുമെന്നും ലോകവ്യാപകമായ സാമ്പത്തിക മാന്ദ്യത്തിന് കാരണമാകുമെന്നും ട്രംപ് തിരിച്ചറിഞ്ഞു. ഹോർമുസ് കടലിടുക്ക് അടഞ്ഞുകിടക്കുന്നത് ആഗോള എണ്ണ വിതരണത്തെ ബാധിക്കുമെന്ന ബോധ്യമാണ് കരാറിലേക്ക് നയിച്ചത്. യുദ്ധം നീട്ടിക്കൊണ്ടുപോയാൽ അത് അമേരിക്കയ്ക്കും ലോകത്തിനും വലിയ തിരിച്ചടിയാകുമെന്ന് അദ്ദേഹം സമ്മതിച്ചു.
എങ്കിലും, കരാർ അമേരിക്കൻ ശക്തിയുടെ പരാജയമല്ലെന്നും മറിച്ച് അമേരിക്കയുടെ അപ്രമാദിത്തം തെളിയിക്കുന്നതാണെന്നുമാണ് ട്രംപിന്റെ വാദം. ഇറാന്റെ ആണവ പരിപാടികൾ നിയന്ത്രിക്കുന്നതിൽ പൂർണ്ണവിജയം നേടാൻ സൈനിക നടപടികൾക്ക് പരിമിതികളുണ്ടെന്ന് വിശകലന വിദഗ്ധർ അഭിപ്രായപ്പെടുമ്പോൾ, ട്രംപ് ഇത് ഒരു വലിയ വിജയമായാണ് അവതരിപ്പിക്കുന്നത്.
Story Summary
The United States and Iran have signed a historic memorandum of understanding to end months of hostilities and reopen the Strait of Hormuz. While President Donald Trump claims the agreement is a total military victory and a form of “unconditional surrender” by Tehran, critics view the deal as a retreat from the US’s original, more rigid demands regarding Iran’s nuclear program.
