യഷ് നായകനായി എത്തുന്ന പുതിയ ആക്ഷൻ ത്രില്ലർ ചിത്രം ‘ടോക്സിക്’ ന്റെ ഏറ്റവും പുതിയ ടീസർ പുറത്തുവന്നതോടെ വലിയ വിവാദങ്ങളാണ് സമൂഹമാധ്യമങ്ങളിൽ ഉയരുന്നത് (Yash Toxic Controversy). ചിത്രത്തിലെ നായികമാരായ നയൻതാര, കിയാര അദ്വാനി, ഹുമ ഖുറേഷി, താര സുതരിയ, രുഗ്മിണി വസന്ത് എന്നിവരെ പരിചയപ്പെടുത്തുന്നതിനായി പുറത്തിറക്കിയ ടീസറിനെതിരെയാണ് ശക്തമായ വിമർശനം. കഥാപാത്രങ്ങളുടെ ആഴമോ വ്യക്തിത്വമോ കാണിക്കുന്നതിന് പകരം ഗ്ലാമറിനും ലൈംഗികച്ചുവയുള്ള ദൃശ്യങ്ങൾക്കുമാണ് ടീസർ മുൻഗണന നൽകിയിരിക്കുന്നതെന്ന് പ്രേക്ഷകർ ആരോപിക്കുന്നു.
ടീസറിലെ ദൃശ്യങ്ങൾക്കെതിരെ എക്സ്, റെഡിറ്റ് തുടങ്ങിയ പ്ലാറ്റ്ഫോമുകളിൽ വൻ പ്രതിഷേധമാണ് ഉയരുന്നത്. “സ്ത്രീകൾക്ക് വേണ്ടി സമർപ്പിച്ച ടീസർ എന്ന പേരിൽ വന്ന ഈ വീഡിയോയിൽ അവരെ വസ്തുവൽക്കരിക്കുകയാണ് ചെയ്യുന്നത്,” എന്ന് ഒരു ഉപഭോക്താവ് കുറിച്ചു. ചിത്രത്തിന്റെ സംവിധായിക ഗീതു മോഹൻദാസിനെതിരെയും വിമർശനങ്ങൾ ഉയരുന്നുണ്ട്. സ്ത്രീപക്ഷ സിനിമകൾക്ക് പേരുള്ള ഗീതു മോഹൻദാസിൽ നിന്ന് ഇത്തരമൊരു അവതരണം പ്രതീക്ഷിച്ചില്ലെന്ന് പലരും അഭിപ്രായപ്പെടുന്നു. ടീസറിലെ ചില രംഗങ്ങൾ അങ്ങേയറ്റം അരോചകമാണെന്നും, അത് കേവലം സെൻഷ്വൽ എന്നതിലുപരി വൾഗർ (അശ്ലീലം) ആണെന്നും പ്രേക്ഷകർ വിലയിരുത്തുന്നു.
ചിത്രത്തിലെ നായികമാർക്ക് ടീസറിൽ സംഭാഷണങ്ങൾ പോലുമില്ലെന്നും, ആർക്കും 5-10 സെക്കൻഡിൽ കൂടുതൽ സ്ക്രീൻ സ്പേസ് നൽകിയിട്ടില്ലെന്നും റെഡിറ്റിലെ ചർച്ചകളിൽ ചൂണ്ടിക്കാട്ടുന്നു. ചിത്രത്തിന്റെ പ്രമേയമോ കഥാപാത്രങ്ങളുടെ സ്വഭാവമോ വെളിപ്പെടുത്തുന്നതിന് പകരം ഗ്ലാമർ പ്രദർശനത്തിൽ മാത്രം ശ്രദ്ധ കേന്ദ്രീകരിച്ചതാണ് വിമർശനങ്ങൾക്ക് വഴിവെച്ചത്. ഇത്തരമൊരു ചിത്രം സെൻസർ ബോർഡ് എങ്ങനെയാണ് അംഗീകരിക്കുന്നതെന്നും ചിലർ ചോദിക്കുന്നു. വൻ ഹൈപ്പോടെ എത്തുന്ന ചിത്രത്തിന്റെ റിലീസ് തീയതി പലതവണ മാറ്റിവെച്ചതിന് ശേഷം ഓഗസ്റ്റ് 26-നാണ് തിയേറ്ററുകളിൽ എത്താൻ നിശ്ചയിച്ചിരിക്കുന്നത്. കന്നഡയിലും ഇംഗ്ലീഷിലുമായാണ് സിനിമ ചിത്രീകരിച്ചിരിക്കുന്നത്.
Summary: Yash’s upcoming action thriller ‘Toxic’ has faced a massive backlash following the release of its latest teaser, which highlights the film’s female leads. Social media users have heavily criticized the promo for objectifying characters through glamour-focused imagery rather than showcasing their substance or narratives. Critics, including fans and film enthusiasts on X and Reddit, expressed disappointment with director Geetu Mohandas over the teaser’s execution, describing it as “vulgar” and “disturbing,” with many calling for stricter oversight before the film’s scheduled release on August 26.
