ആലുവ: അഭിനയത്തിന് പുറമെ സാഹസികതയിലും തന്റെ കഴിവ് തെളിയിക്കുകയാണ് മലയാളികളുടെ പ്രിയ നടി മഞ്ജു വാര്യർ (Manju Warrier Horse Riding). ആലുവ ശിവരാത്രി മണപ്പുറത്ത് വെച്ച് കഴിഞ്ഞ ഒരു മാസമായി താരം നടത്തിവന്ന കുതിര സവാരി പരിശീലനം വിജയകരമായി പൂർത്തിയാക്കി. ആലുവ തോട്ടക്കാട്ടുകര സ്വദേശി ആലപ്പാട്ട് ജോർജ് ഡയസായിരുന്നു പരിശീലകൻ.
ജോർജിന്റെ ഉടമസ്ഥതയിലുള്ള ‘ലോറ’ എന്ന പെൺകുതിരപ്പുറത്തായിരുന്നു മഞ്ജുവിന്റെ സവാരി. പുലർച്ചെ അഞ്ച് മണിക്ക് തന്നെ മണപ്പുറത്ത് എത്തിയിരുന്ന താരം ദിവസവും രണ്ട് മണിക്കൂറോളം കഠിനമായ പരിശീലനം നടത്തി. വെറും ഒരാഴ്ചയ്ക്കകം തന്നെ മഞ്ജു കുതിരയെ നിയന്ത്രിക്കാൻ പഠിച്ചെന്നും പിന്നീട് ഒറ്റയ്ക്ക് സവാരി നടത്തി തുടങ്ങിയെന്നും പരിശീലകൻ ജോർജ് പറഞ്ഞു.
എറണാകുളത്തെ ഫ്ലാറ്റിൽ നിന്ന് ജാക്കറ്റും തൊപ്പിയും ധരിച്ച് സ്വന്തം ബൈക്കിലായിരുന്നു മഞ്ജു ആലുവയിൽ എത്തിയിരുന്നത്. പുലർച്ചെയായതിനാലും വേഷം മാറിയതിനാലും മണപ്പുറത്ത് എത്തുന്ന പലരും താരത്തെ തിരിച്ചറിഞ്ഞിരുന്നില്ല. നടൻമാരായ സണ്ണി വെയ്ൻ, സിജു വിൽസൺ, നിർമ്മാതാവ് ബിനീഷ് ചന്ദ്രൻ എന്നിവരും മഞ്ജുവിനൊപ്പം പരിശീലനത്തിന് എത്തിയിരുന്നു. ആലുവ സ്വദേശിയായ സിജു വിൽസൺ വഴിയാണ് മഞ്ജു പരിശീലകനെ കണ്ടെത്തിയത്.
അതേസമയം , സാഹസിക യാത്രകളെയും ബൈക്ക് റൈഡിംഗിനെയും ഏറെ ഇഷ്ടപ്പെടുന്ന മഞ്ജു വാര്യർ, സ്വന്തമായി ഒരു കുതിരയെ വാങ്ങി സവാരി തുടരാനുള്ള തയ്യാറെടുപ്പിലാണെന്ന് അടുത്ത വൃത്തങ്ങൾ സൂചിപ്പിച്ചു. പരിശീലനത്തിന് ശേഷം ആലുവയിലെ തട്ടുകടകളിൽ നിന്ന് പ്രഭാതഭക്ഷണം കഴിച്ച ശേഷമാണ് താരം മടങ്ങിയിരുന്നത്.
Story Summary: Actress Manju Warrier completed a month-long horse riding training session at Aluva Manappuram. Under the guidance of trainer George Dias, she practiced for two hours daily starting at 5 AM. Known for her adventurous spirit and love for bike riding, Manju is now reportedly planning to buy her own horse to continue riding.
