കൊച്ചി: താരസംഘടനയായ ‘അമ്മ’യുടെ ഭരണസമിതി രാജി വെച്ച സംഭവത്തിൽ പ്രതികരണവുമായി നടി അൻസിബ ഹസൻ. തന്റെ പരാതികളും സംഘടനയിലെ ക്രമക്കേടുകളും പൊതുയോഗത്തിൽ കൃത്യമായി ഉന്നയിക്കാൻ സാധിച്ചുവെന്നും, തനിക്ക് ഇപ്പോൾ സമാധാനം ലഭിച്ചുവെന്നും അൻസിബ വ്യക്തമാക്കി (Ansiba Hassan AMMA association). ഭരണസമിതി രാജിവെച്ചത് ചരിത്രപരമായ തീരുമാനമാണെന്നും, അത്ര എളുപ്പത്തിൽ കടന്നുപോകാൻ അവർക്ക് സാധിച്ചില്ലെന്നും അൻസിബ കൂട്ടിച്ചേർത്തു.
സംഘടനയുടെ വരവ്-ചെലവ് കണക്കുകൾ വ്യക്തമായി ബോധിപ്പിക്കാൻ മുൻ ഭരണസമിതിക്ക് സാധിച്ചിരുന്നില്ലെന്നും, ഇത് അംഗങ്ങൾക്കിടയിൽ വലിയ പ്രതിഷേധത്തിന് കാരണമായെന്നും അൻസിബ പറഞ്ഞു. തനിക്ക് സംസാരിക്കാൻ അവസരം നിഷേധിക്കാൻ മുൻ ഭരണസമിതി ശ്രമിച്ചെങ്കിലും, മറ്റ് അംഗങ്ങൾ പൂർണ്ണ പിന്തുണ നൽകി സംസാരിക്കാനുള്ള അവസരം ഒരുക്കി നൽകുകയായിരുന്നു. സംഘടനയുടെ 32 വർഷത്തെ ചരിത്രത്തിൽ ആദ്യമായാണ് ഇത്തരമൊരു മാറ്റം സംഭവിക്കുന്നത്.
പുതിയ ഭരണസമിതിക്ക് മുന്നിൽ അൻസിബ സുപ്രധാനമായ ഒരു നിർദ്ദേശം കൂടി വെച്ചിട്ടുണ്ട്. മുൻപ് സംഘടന വിട്ടുപോയ അതിജീവിത ഉൾപ്പെടെയുള്ളവരെ ഔദ്യോഗികമായി തിരികെ ക്ഷണിക്കണമെന്നാണ് അൻസിബയുടെ ആവശ്യം. അവരെ തിരിച്ചെത്തിക്കുമെന്ന് മുൻ ഭരണസമിതി വാഗ്ദാനം നൽകിയിരുന്നെങ്കിലും അത് പാലിക്കപ്പെട്ടില്ല. അവർ തിരിച്ചുവരുന്നതും വരാതിരിക്കുന്നതും അവരുടെ സ്വാതന്ത്ര്യമാണെങ്കിലും, ഒരു സംഘടനയെന്ന നിലയിൽ ഔദ്യോഗികമായി ക്ഷണിക്കേണ്ട ബാധ്യത അമ്മയ്ക്കുണ്ടെന്ന് അൻസിബ ഓർമ്മിപ്പിച്ചു.
Summary: Actress Ansiba Hassan expressed relief and satisfaction following the resignation of the ‘AMMA’ executive committee, stating she finally feels a sense of justice after being able to voice her grievances and concerns regarding the organization’s financial transparency. She described the resignation as a historic moment for the 32-year-old association.
