കൊച്ചി: തമ്മനത്ത് വീട്ടിൽ സൂക്ഷിച്ച എംഡിഎംഎയും ഹാഷിഷ് ഓയിലുമായി യുവാവിനെ എക്സൈസ് പിടികൂടി (Kochi Excise Drug Arrest). തമ്മനം കോദാറത്ത് വീട്ടിൽ മുഹമ്മദ് ഫയാസ് (26) ആണ് അറസ്റ്റിലായത്. ഇയാളുടെ വീട്ടിൽ നടത്തിയ പരിശോധനയിൽ 36.173 ഗ്രാം എംഡിഎംഎ, 1.116 ഗ്രാം ഹാഷിഷ് ഓയിൽ, 1.658 ഗ്രാം കഞ്ചാവ് എന്നിവയും 2000 രൂപയും എക്സൈസ് സംഘം കണ്ടെടുത്തു.
എറണാകുളം എക്സൈസ് റേഞ്ച് ഇൻസ്പെക്ടർ ആർ. അഭിരാജിന്റെ നേതൃത്വത്തിലുള്ള സംഘമാണ് പ്രതിയെ വലയിലാക്കിയത്. ബംഗളൂരുവിൽ നിന്നാണ് പ്രതി മയക്കുമരുന്ന് എത്തിച്ചിരുന്നത്.
കൊച്ചി നഗരത്തിലെ വിവിധ ഹോസ്റ്റലുകൾ കേന്ദ്രീകരിച്ചാണ് മുഹമ്മദ് ഫയാസ് ലഹരി വ്യാപാരം നടത്തിയിരുന്നതെന്ന് എക്സൈസ് അറിയിച്ചു. ബംഗളൂരുവിൽ നിന്ന് സാധാരണയായി 50 ഗ്രാം എംഡിഎംഎയാണ് ഇയാൾ എത്തിക്കാറുള്ളത്. കഴിഞ്ഞ ദിവസം കൊണ്ടുവന്ന 40 ഗ്രാമിൽ കുറച്ച് ഇതിനകം വിറ്റഴിച്ചിരുന്നു. ബാക്കിയുള്ളവയാണ് പരിശോധനയിൽ പിടിച്ചെടുത്തത്.
മുഹമ്മദ് ഫയാസ് മുമ്പും രണ്ട് ലഹരിക്കേസുകളിൽ അറസ്റ്റിലായിട്ടുണ്ട്. ഇയാളുടെ പ്രധാന കൂട്ടാളിയായ കാപ്പ (KAAPA) കേസ് പ്രതിക്കായി എക്സൈസ് അന്വേഷണം ഊർജിതമാക്കി. സിവിൽ എക്സൈസ് ഓഫീസർമാരായ സി.ജി. അമൽദേവ്, ജിബിനാസ്, വി.എച്ച്. പ്രവീൺകുമാർ, അഷ്കർ സാബു, പ്രിൻസി, ഡ്രൈവർ വിഷ്ണു കുമാർ എന്നിവരും അന്വേഷണ സംഘത്തിലുണ്ടായിരുന്നു.
ലഹരിമരുന്ന് ശൃംഖലയുടെ വേരുകൾ കണ്ടെത്താൻ പ്രതിയെ വിശദമായി ചോദ്യം ചെയ്തു വരികയാണ്. നഗരത്തിലെ വിദ്യാർത്ഥികളെയും യുവാക്കളെയും ലക്ഷ്യമിട്ടുള്ള ഇത്തരം മാഫിയകൾക്കെതിരെ കർശന നടപടി തുടരുമെന്ന് എക്സൈസ് അറിയിച്ചു.
Story Summary: The Kochi Excise team arrested 26-year-old Muhammad Fayaz from Thammanam with 36.173g of MDMA, hashish oil, and ganja. Fayaz allegedly sourced the drugs from Bengaluru and sold them primarily in city hostels. He was previously involved in two drug-related cases. Police are now searching for his accomplice, who is a KAAPA case accused.
