തിരുവനന്തപുരം: സംസ്ഥാനത്ത് കനത്ത മഴ തുടരുന്ന സാഹചര്യത്തിൽ മുൻകരുതൽ നടപടിയുടെ ഭാഗമായി ഓഗസ്റ്റ് 3 തിങ്കളാഴ്ച 10 ജില്ലകളിലും രണ്ട് താലൂക്കുകളിലും വിദ്യാഭ്യാസ സ്ഥാപനങ്ങൾക്ക് അവധി പ്രഖ്യാപിച്ചു (Kerala rain holiday August 3 2026). കാസർഗോഡ്, കണ്ണൂർ, വയനാട്, കോഴിക്കോട്, മലപ്പുറം, തൃശൂർ, പാലക്കാട്, ഇടുക്കി, പത്തനംതിട്ട, കോട്ടയം എന്നീ 10 ജില്ലകളിലും ആലപ്പുഴ ജില്ലയിലെ ചെങ്ങന്നൂർ, കുട്ടനാട് താലൂക്കുകളിലുമാണ് അതത് ജില്ലാ കളക്ടർമാർ അവധി പ്രഖ്യാപിച്ചിരിക്കുന്നത്.
പ്രൊഫഷണൽ കോളേജുകൾ, കോളേജുകൾ, സ്കൂളുകൾ, അങ്കണവാടികൾ, സി.ബി.എസ്.ഇ – ഐ.സി.എസ്.ഇ സ്കൂളുകൾ, കേന്ദ്രീയ വിദ്യാലയങ്ങൾ, ട്യൂഷൻ സെന്ററുകൾ, ട്രെയിനിങ് ഇൻസ്റ്റിറ്റ്യൂട്ടുകൾ, മദ്രസകൾ ഉൾപ്പെടെയുള്ള മുഴുവൻ മതപഠന കേന്ദ്രങ്ങൾക്കും അവധി ബാധകമായിരിക്കും. അതേസമയം, മുൻകൂട്ടി നിശ്ചയിച്ച സർവകലാശാല/പൊതു പരീക്ഷകൾക്കും അഭിമുഖങ്ങൾക്കും മാറ്റമുണ്ടായിരിക്കുന്നതല്ലെന്ന് അധികൃതർ അറിയിച്ചു.
മലയോര മേഖലകളിൽ ശക്തമായ മഴ പെയ്യുന്നതിനാലും താഴ്ന്ന പ്രദേശങ്ങളിൽ വെള്ളക്കെട്ടും പ്രളയഭീഷണിയും നിലനിൽക്കുന്നതിനാലുമാണ് ഈ മുൻകരുതൽ നടപടി. കോഴിക്കോട് ജില്ലയിൽ സ്കൂളുകളിൽ ഓഫ്ലൈൻ പഠന ക്ലാസുകൾക്കാണ് അവധിയെന്നും ഓൺലൈൻ ക്ലാസുകൾ നടത്തുന്നതിന് തടസ്സമില്ലെന്നും കളക്ടർ വ്യക്തമാക്കി. കനത്ത മഴ തുടരുന്ന സാഹചര്യത്തിൽ കുട്ടികൾ ജലാശയങ്ങളിലോ മലയോര മേഖലകളിലോ ഇറങ്ങുന്നത് തടയാൻ രക്ഷിതാക്കളും സ്ഥാപന മേധാവികളും ശ്രദ്ധിക്കണമെന്ന് ദുരന്തനിവാരണ അതോറിറ്റി നിർദേശിച്ചു.
Story Summary: Due to persistent heavy rainfall and flood risks, holidays have been declared for educational institutions, including professional colleges, tuitions, and religious schools, across 10 districts and two taluks in Kerala on Monday (August 3). Pre-scheduled university and public examinations will proceed as planned.
