ന്യൂഡൽഹി: ആഭ്യന്തര വിമാന സർവീസുകൾക്കുള്ള ഏവിയേഷൻ ടർബൈൻ ഫ്യുവൽ (ATF) വില ലിറ്ററിന് അഞ്ച് രൂപ വർധിപ്പിച്ചു. ജൂലൈയിൽ അഞ്ച് രൂപ കുറച്ചതിന് പിന്നാലെയാണ് ഇന്ത്യൻ ഓയിൽ കോർപ്പറേഷൻ (IOCL) വില വീണ്ടും ഉയർത്തിയത് (ATF Price Hike India). ഇതോടെ ആഭ്യന്തര വിമാനക്കമ്പനികൾക്ക് ലഭിക്കുന്ന ജെറ്റ് ഇന്ധനത്തിന്റെ വില ലിറ്ററിന് 110 രൂപയിൽ നിന്ന് 115 രൂപയായി ഉയർന്നു.
വിമാനക്കമ്പനികളുടെ മൊത്തം പ്രവർത്തനച്ചെലവിന്റെ 35 മുതൽ 40 ശതമാനം വരെ ജെറ്റ് ഇന്ധനത്തിനായി ചെലവാകുന്നുവെന്നാണ് റിപ്പോർട്ട്. അതിനാൽ ATF വിലയിലെ വർധന വിമാനക്കമ്പനികളുടെ പ്രവർത്തനച്ചെലവിൽ കാര്യമായ സ്വാധീനം ചെലുത്തും. ഇന്ധനച്ചെലവ് ഉയരുന്ന സാഹചര്യത്തിൽ വരും ദിവസങ്ങളിൽ വിമാന ടിക്കറ്റ് നിരക്കിലും വർധനയുണ്ടാകാനുള്ള സാധ്യതയുണ്ട്. എന്നാൽ ഇന്ധനവില മാത്രം അടിസ്ഥാനമാക്കിയാണ് വിമാന ടിക്കറ്റ് നിരക്ക് നിശ്ചയിക്കപ്പെടുന്നത് എന്നില്ല. യാത്രക്കാരുടെ ആവശ്യം, വിവിധ വിമാനക്കമ്പനികൾ തമ്മിലുള്ള മത്സരം, സർവീസുകളുടെ എണ്ണം, റൂട്ടുകളിലെ ലഭ്യത തുടങ്ങിയ ഘടകങ്ങളും നിരക്കിനെ സ്വാധീനിക്കും.
അതേസമയം, ഓഗസ്റ്റ് ഒന്നുമുതൽ വാണിജ്യ ആവശ്യങ്ങൾക്കുള്ള എൽപിജി സിലിണ്ടറുകളുടെ വില ഇന്ത്യൻ ഓയിൽ കുറച്ചു. 19 കിലോഗ്രാം വാണിജ്യ എൽപിജി സിലിണ്ടറിന്റെ വില 192 രൂപ കുറച്ചതോടെ 2,930 രൂപയിൽ നിന്ന് 2,738 രൂപയായി. ഹോട്ടലുകൾ, റെസ്റ്റോറന്റുകൾ, കാറ്ററിങ് സ്ഥാപനങ്ങൾ ഉൾപ്പെടെയുള്ള വാണിജ്യ ഉപയോക്താക്കൾക്ക് വിലക്കുറവ് ഗുണകരമാകും. അഞ്ച് കിലോഗ്രാം ഫ്രീ ട്രേഡ് എൽപിജി (FTL) വാണിജ്യ റീഫില്ലിന്റെ വിലയും 46.50 രൂപ കുറച്ച് 762 രൂപയാക്കി. ജൂലൈ ഒന്നിന് 183.50 രൂപ കുറച്ചതിന് പിന്നാലെ തുടർച്ചയായ രണ്ടാം മാസമാണ് വാണിജ്യ എൽപിജി സിലിണ്ടർ വിലയിൽ കുറവ് വരുത്തുന്നത്.
പുതുക്കിയ ATF നിരക്ക് ആഭ്യന്തര വിമാന സർവീസുകൾക്ക് മാത്രമാണ് ബാധകം. അന്താരാഷ്ട്ര സർവീസുകൾ നടത്തുന്ന വിമാനക്കമ്പനികൾ നിലവിലുള്ള ആഗോള വിലനിർണയ സംവിധാനപ്രകാരമാണ് ജെറ്റ് ഇന്ധനം വാങ്ങുന്നത്. ഗാർഹിക ആവശ്യങ്ങൾക്കുള്ള എൽപിജി സിലിണ്ടർ വിലയിൽ മാറ്റമില്ല. ഡൽഹിയിൽ 14.2 കിലോഗ്രാം ഗാർഹിക എൽപിജി സിലിണ്ടറിന്റെ വില 942 രൂപയായി തുടരും.
Summary: Indian Oil has increased Aviation Turbine Fuel prices by Rs 5 per litre for domestic airlines, reversing the reduction announced in July. The hike may raise operating costs for airlines and could potentially influence domestic airfares, while commercial LPG cylinder prices have been reduced.
