നളന്ദ: പേരുകേട്ട് ആദ്യം ഒന്ന് ഞെട്ടും; പക്ഷേ കഫേയ്ക്കുള്ളിൽ കയറിയാൽ കാഴ്ച മറ്റൊന്നാണ്. ബിഹാറിലെ നളന്ദ ജില്ലയിൽ പുതുതായി ആരംഭിച്ച ‘കോക്ക്റോച്ച് കഫേ’ ഇപ്പോൾ സമൂഹമാധ്യമങ്ങളിൽ ചർച്ചയായിരിക്കുകയാണ് (Cockroach Cafe Bihar). വിചിത്രമായ പേരിലൂടെ കൗതുകമുണർത്തി യുവാക്കളെ കഫേയിലേക്ക് ആകർഷിക്കുകയാണ് ഉടമയുടെ ലക്ഷ്യം. നളന്ദ ജില്ലയിലെ ഹിൽസ ബൈപാസിലാണ് കഫേ പ്രവർത്തിക്കുന്നത്. “ഭക്ഷണത്തിൽ ഒരു പാറ്റയെ കണ്ടാൽ ഇനി പരാതിപ്പെടാൻ കഴിയുമോ?” എന്ന തരത്തിലുള്ള തമാശ കമന്റുകളോടെയാണ് കഫേയുടെ ചിത്രങ്ങൾ സോഷ്യൽ മീഡിയയിൽ പ്രചരിക്കുന്നത്.
ചിലർ പേരിനെ വ്യത്യസ്തമായ മാർക്കറ്റിങ് ആശയമെന്ന് വിശേഷിപ്പിക്കുമ്പോൾ, മറ്റുചിലർ ഇത്രയും അസാധാരണമായ പേര് തിരഞ്ഞെടുക്കാനുള്ള കാരണം ചോദിച്ചും രംഗത്തെത്തി. പേരിലെ കൗതുകം മാറ്റിവെച്ചാൽ കഫേയുടെ അകത്തളങ്ങൾ ആധുനിക ശൈലിയിലാണ് ഒരുക്കിയിരിക്കുന്നത്. കറുപ്പ് നിറത്തിന് പ്രാധാന്യം നൽകിയ ഇന്റീരിയർ, ടിൻ മേൽക്കൂരയിൽ തൂക്കിയിട്ട മഞ്ഞ ലൈറ്റുകൾ, ചുമരുകളിലെ കൃത്രിമ വള്ളിച്ചെടികളും പൂക്കളും എന്നിവ കഫേയ്ക്ക് വ്യത്യസ്തമായ ഭംഗി നൽകുന്നു. ഇരിപ്പിടങ്ങൾക്കായി റാട്ടൻ സോഫകളും ഗ്ലാസ് ടേബിളുകളും ഒരുക്കിയിട്ടുണ്ട്.
കഫേയുടെ പേര് മനഃപൂർവം തിരഞ്ഞെടുത്തതാണെന്ന് ഉടമ പറയുന്നു. “റോയൽ കഫേ എന്ന പേരിൽ നൂറുകണക്കിന് സ്ഥാപനങ്ങൾ ഉണ്ടാകും. എന്നാൽ കോക്ക്റോച്ച് കഫേ എന്ന പേരിൽ ഒന്ന് മാത്രമേ ഉണ്ടാകൂ. യുവാക്കൾക്ക് വ്യത്യസ്തമായ കാര്യങ്ങളോടാണ് കൂടുതൽ താൽപര്യം. ആളുകളെ ആദ്യം പേരിലൂടെ ആകർഷിക്കാം; പിന്നീട് മികച്ച നിലവാരവും സേവനവും അവരെ വീണ്ടും എത്തിക്കും,” എന്നാണ് ഉടമയുടെ വിശദീകരണം. കഫേയുടെ പേര് തമാശയായി കാണാമെങ്കിലും ശുചിത്വത്തിന് വലിയ പ്രാധാന്യം നൽകുന്നുണ്ടെന്നും ഉടമ വ്യക്തമാക്കി. സമൂഹമാധ്യമങ്ങളുടെ കാലത്ത് വ്യത്യസ്തമായ ഒരു പേര് വലിയ പരസ്യച്ചെലവില്ലാതെ തന്നെ ജനശ്രദ്ധ നേടാൻ സഹായിക്കുമെന്നും അദ്ദേഹം പറഞ്ഞു.
തുറന്ന് ഏതാനും ദിവസങ്ങൾ മാത്രമായ കഫേയിൽ നിലവിൽ ചായ, കാപ്പി, മാഗി, സാൻഡ്വിച്ച്, ശീതളപാനീയങ്ങൾ എന്നിവയാണ് ലഭിക്കുന്നത്. പ്രദേശത്തെ മറ്റ് കഫേകളോട് സമാനമായ നിരക്കിലാണ് ഭക്ഷണവും പാനീയങ്ങളും ഒരുക്കിയിരിക്കുന്നത്. വൈകുന്നേരങ്ങളിൽ സുഹൃത്തുക്കൾക്കൊപ്പം ചായ കുടിക്കാനും റീലുകൾ ചിത്രീകരിക്കാനുമായി യുവാക്കൾ ഇവിടെ എത്തുന്നുണ്ടെന്നാണ് റിപ്പോർട്ട്. പേരുകേട്ട് ആദ്യം സംശയം തോന്നിയെങ്കിലും കഫേ സന്ദർശിച്ചപ്പോൾ വൃത്തിയും ആകർഷകവുമായ അന്തരീക്ഷമാണ് കണ്ടതെന്ന് പ്രദേശവാസികളും പറയുന്നു. അതേസമയം, ചില മുതിർന്നവർ പേരിനോട് വിയോജിപ്പ് പ്രകടിപ്പിച്ചിട്ടുണ്ടെങ്കിലും യുവാക്കൾ ഈ വ്യത്യസ്ത ബ്രാൻഡിങ് ആശയത്തെ ഏറ്റെടുത്തതായാണ് സൂചന.
വ്യത്യസ്തമായ ഒരു പേര് എങ്ങനെ വലിയ പരസ്യമായി മാറുമെന്നതിന്റെ ഉദാഹരണമായി ‘കോക്ക്റോച്ച് കഫേ’ മാറിക്കൊണ്ടിരിക്കുകയാണ്. പേരിലെ കൗതുകം ആളുകളെ കഫേയിലേക്ക് എത്തിക്കുമ്പോൾ, നിലവാരവും സേവനവുമാണ് അവരെ വീണ്ടും എത്തിക്കുകയെന്നാണ് ഉടമയുടെ പ്രതീക്ഷ.
Summary: A newly opened cafe named ‘Cockroach Cafe’ in Bihar’s Nalanda district has gone viral because of its unusual and humorous name. The owner says the quirky branding was designed to attract young customers, while the clean interiors and affordable menu are helping turn online curiosity into real visitors.
