ന്യൂയോർക്ക്: ലോകമെമ്പാടുമുള്ള കാലാവസ്ഥാ സാഹചര്യങ്ങളെ വരും മാസങ്ങളിൽ ശക്തമായി സ്വാധീനിക്കാൻ സാധ്യതയുള്ള എൽ നിനോ പ്രതിഭാസം കൂടുതൽ തീവ്രമാകുന്നതായി ലോക കാലാവസ്ഥാ സംഘടനയുടെ (WMO) മുന്നറിയിപ്പ് (Powerful El NINo 2026 warning). ഉഷ്ണതരംഗങ്ങൾ, വരൾച്ച, അതിശക്തമായ മഴ, വെള്ളപ്പൊക്കം തുടങ്ങിയ അതിതീവ്ര കാലാവസ്ഥാ പ്രതിഭാസങ്ങളുടെ സാധ്യത വർധിക്കുമെന്നും ഐക്യരാഷ്ട്രസഭയുടെ കാലാവസ്ഥാ ഏജൻസി വ്യക്തമാക്കി.
എൽ നിനോ ഇനി നമ്മുടെ വാതിൽപ്പടിയിലല്ല, വീടിനുള്ളിലെത്തി ചൂട് കൂട്ടുകയാണെന്ന് ഐക്യരാഷ്ട്രസഭ സെക്രട്ടറി ജനറൽ അന്റോണിയോ ഗുട്ടെറസ് പ്രതികരിച്ചു. “ഇത് ഒരു തുടക്കം മാത്രമാണ്. ഇതിനകം തീ പിടിച്ചിരിക്കുന്ന ഭൂമിക്ക് എൽ നിനോ കൂടുതൽ ഇന്ധനം പകരുകയാണ്,” അദ്ദേഹം പറഞ്ഞു. മധ്യ പസഫിക് സമുദ്രത്തിലെ ഉപരിതല ജലത്തിന്റെ താപനില സാധാരണ നിലയേക്കാൾ 2.9 ഡിഗ്രി സെൽഷ്യസിലധികം ഉയരാൻ സാധ്യതയുണ്ടെന്നാണ് ഡബ്ല്യുഎംഒയുടെ പ്രവചനം. സമുദ്രജലത്തിലെ അസാധാരണമായ ഈ താപവർധന ആഗോള കാലാവസ്ഥാ വ്യവസ്ഥകളെ മാറ്റിമറിക്കുകയും വിവിധ മേഖലകളിൽ താപനില ഉയരാൻ ഇടയാക്കുകയും ചെയ്യും.
ആഫ്രിക്കയിലും യൂറോപ്പിലും കാട്ടുതീ വ്യാപിക്കുന്ന സാഹചര്യത്തിലും ദക്ഷിണേഷ്യയിൽ മൺസൂൺ മഴ വ്യാപക നാശനഷ്ടങ്ങൾ സൃഷ്ടിക്കുന്ന പശ്ചാത്തലത്തിലുമാണ് പുതിയ മുന്നറിയിപ്പ്. ആഫ്രിക്ക, തെക്കൻ യൂറോപ്പ്, ഇന്ത്യൻ ഉപഭൂഖണ്ഡം, കിഴക്കൻ ഏഷ്യ, ദക്ഷിണ അമേരിക്ക എന്നിവിടങ്ങളിൽ സാധാരണയേക്കാൾ ഉയർന്ന താപനില അനുഭവപ്പെടാൻ സാധ്യതയുണ്ടെന്നും റിപ്പോർട്ടിൽ പറയുന്നു. എൽ നിനോയുടെ പ്രത്യാഘാതങ്ങൾ മനുഷ്യനിർമിത കാലാവസ്ഥാ വ്യതിയാനവുമായി കൂടിച്ചേരുന്നത് ആഗോള പ്രതിസന്ധി രൂക്ഷമാക്കുമെന്നും ഗുട്ടെറസ് മുന്നറിയിപ്പ് നൽകി. പുതിയ കൽക്കരി, എണ്ണ, പ്രകൃതിവാതക പദ്ധതികൾക്ക് അടിയന്തരമായി വിരാമമിടണമെന്നും ഫോസിൽ ഇന്ധനങ്ങളുടെ വ്യാപനമാണ് കാലാവസ്ഥാ പ്രതിസന്ധിയെ കൂടുതൽ ഗുരുതരമാക്കുന്നതെന്നും അദ്ദേഹം ആവശ്യപ്പെട്ടു.
കാലാവസ്ഥാ പ്രവചനങ്ങൾ മാത്രം അപകടങ്ങൾ തടയില്ലെന്നും മുന്നറിയിപ്പുകളെ അടിസ്ഥാനമാക്കി സർക്കാരുകളും ദുരന്തനിവാരണ ഏജൻസികളും സമയബന്ധിത നടപടികൾ സ്വീകരിക്കണമെന്നും ഡബ്ല്യുഎംഒ സെക്രട്ടറി ജനറൽ സെലസ്റ്റെ സൗലോ പറഞ്ഞു. “പ്രവചനങ്ങൾ സ്വയം അപകടങ്ങൾ തടയുന്നില്ല; മനുഷ്യരുടെ പ്രവർത്തനങ്ങളാണ് അപകടസാധ്യത കുറയ്ക്കുന്നത്. ഇന്ന് എടുക്കുന്ന തീരുമാനങ്ങളാണ് നാളത്തെ പ്രത്യാഘാതങ്ങൾ നിർണയിക്കുക,” അവർ വ്യക്തമാക്കി. ഈ വർഷത്തെ എൽ നിനോ വർഷത്തിന്റെ രണ്ടാം പകുതിയിൽ റെക്കോർഡ് തീവ്രതയിലെത്താൻ സാധ്യതയുണ്ടെന്നാണ് ശാസ്ത്രജ്ഞരുടെ വിലയിരുത്തൽ. എന്നാൽ കമ്പ്യൂട്ടർ മാതൃകകളുടെ പ്രവചനങ്ങളിൽ ഇപ്പോഴും ചില അനിശ്ചിതത്വങ്ങളുണ്ടെന്നും വിദഗ്ധർ ചൂണ്ടിക്കാട്ടി.
Summary: The United Nations and the World Meteorological Organization have warned that a rapidly intensifying El Niño could increase the risk of extreme heat, droughts, floods and other severe weather events worldwide. UN Secretary-General António Guterres called for urgent climate action and an immediate halt to new coal, oil and gas projects.
