തിരുവനന്തപുരം: തെക്കൻ കേരളത്തിൽ രാത്രിയിലുണ്ടായ അതിശക്തമായ മഴയെത്തുടർന്ന് പൊൻമുടിയിൽ വൻ മണ്ണിടിച്ചിൽ. അപകടഭീഷണിയും റോഡ് തടസ്സവും കണക്കിലെടുത്ത് പൊൻമുടി ഇക്കോ ടൂറിസം കേന്ദ്രം പൂർണ്ണമായി അടച്ചു.(Landslides In Ponmudi Eco Tourism Closed Due To Heavy Rains)
കല്ലാർ – പൊന്മുടി റോഡിലെ പന്ത്രണ്ടാം വളവിലും, ഇരുപത്തിരണ്ടാം വളവിന് സമീപമുള്ള ഇടിയകോവിൽ ഭാഗത്തുമാണ് മണ്ണിടിഞ്ഞു വീണത്. ശനിയാഴ്ച പുലർച്ചെയോടെയാകാം മണ്ണിടിച്ചിൽ ഉണ്ടായതെന്നാണ് വനംവകുപ്പ് ഉദ്യോഗസ്ഥരുടെ അനുമാനം.
റോഡിലേക്ക് മണ്ണും മരങ്ങളും ഇടിഞ്ഞുവീണതിനെ തുടർന്ന് പൊന്മുടിയിലേക്കുള്ള ഗതാഗതം തടസ്സപ്പെട്ടു. വിതുരയിൽ നിന്നും ഫയർഫോഴ്സും വനപാലകരും സ്ഥലത്തെത്തി മണ്ണുനീക്കാനുള്ള പ്രവൃത്തികൾ ആരംഭിച്ചിട്ടുണ്ട്. അതേസമയം, സംസ്ഥാനത്തുടനീളം മഴക്കെടുതി രൂക്ഷമായ സാഹചര്യത്തിൽ പാലക്കാട് നെല്ലിയാമ്പതി വിനോദസഞ്ചാര കേന്ദ്രവും അടച്ചു. മണ്ണിടിച്ചിൽ സാധ്യത മുന്നിൽക്കണ്ട് ശനിയും ഞായറും ഇവിടേക്ക് സഞ്ചാരികൾക്ക് പ്രവേശനം വിലക്കിയിട്ടുണ്ട്.
കൊല്ലം ജില്ലയിലെ പ്രശസ്തമായ കുംഭാവുരുട്ടി വെള്ളച്ചാട്ടവും കനത്ത മഴയെ തുടർന്ന് അടച്ചുപൂട്ടി. അച്ചൻകോവിൽ ഉൾവനങ്ങളിൽ പെയ്യുന്ന ശക്തമായ മഴ കാരണം അരുവികളിൽ പെട്ടെന്ന് ജലനിരപ്പ് ഉയരാൻ സാധ്യതയുള്ളതിനാലാണ് വിനോദസഞ്ചാരികൾക്ക് ഇവിടേക്ക് പ്രവേശനവിലക്ക് ഏർപ്പെടുത്തിയത്.
Story Summary
Heavy overnight rains triggered landslides along the Kallar-Ponmudi road, forcing authorities to close the Ponmudi Eco Tourism center. Tourism sites including Nelliampathy and Kumbhavurutty waterfalls have also been shut for visitors due to safety concerns.
