കൊച്ചി: ജിതിൻ കെ. ജോസ് സംവിധാനം ചെയ്യുന്ന മിസ്റ്ററി ത്രില്ലർ ചിത്രം ‘മായന്റെ’ അന്താരാഷ്ട്ര ചിത്രീകരണ ഷെഡ്യൂളിന് റഷ്യയിൽ ഔദ്യോഗികമായി തുടക്കമായി (Jayasurya mayan movie russia schedule). മലയാള സിനിമയുടെ കഥാപരിസരങ്ങളെ ആഗോളതലത്തിലേക്ക് വിപുലീകരിക്കുന്ന ഈ ബിഗ് ബജറ്റ് പ്രോജക്റ്റിന്റെ ഏറ്റവും പ്രധാനപ്പെട്ട അധ്യായങ്ങളിലൊന്നാണ് ഇപ്പോൾ റഷ്യയിൽ ചിത്രീകരിക്കുന്നത്.
‘ഓർഡിനറി’, ‘അനാർക്കലി’ എന്നീ സൂപ്പർഹിറ്റുകൾക്ക് ശേഷം മാജിക് മൂൺ പ്രൊഡക്ഷൻസിന്റെ ബാനറിൽ രാജീവ് ഗോവിന്ദൻ നിർമ്മിക്കുന്ന ചിത്രത്തിൽ ജയസൂര്യയാണ് കേന്ദ്ര കഥാപാത്രത്തെ അവതരിപ്പിക്കുന്നത്. നൈല ഉഷ നായികയായെത്തുന്ന ചിത്രത്തിൽ വിജയ് ബാബു, ഐശ്വര്യ രാജ്, ജിബിൻ ഗോപിനാഥ് തുടങ്ങിയവരും നിർണ്ണായക വേഷങ്ങളിൽ അണിനിരക്കുന്നു.
വിവിധ രാജ്യങ്ങളിലേക്ക് പടർന്നു കിടക്കുന്ന പുരാതനമായ ആഭിചാര ആചാരങ്ങളുടെയും രഹസ്യ ശൃംഖലകളുടെയും പശ്ചാത്തലത്തിലാണ് സിനിമയുടെ കഥ വികസിക്കുന്നത്. നൂറ്റാണ്ടുകളായി മറഞ്ഞിരിക്കുന്ന നിഗൂഢതകളുടെ വേരുകൾ തേടിയുള്ള യാത്രയുടെ ഭാഗമായാണ് ചിത്രീകരണം റഷ്യൻ പശ്ചാത്തലത്തിലേക്ക് നീളുന്നത്.
ഹിറ്റ് തിരക്കഥാകൃത്ത് റാഫിയും സംവിധായകൻ ജിതിൻ കെ. ജോസും ചേർന്നാണ് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത്. ഫൈസൽ അലി ഛായാഗ്രഹണം നിർവ്വഹിക്കുന്ന ചിത്രത്തിന് മുജീബ് മജീദ് സംഗീതവും പശ്ചാത്തല സംഗീതവും നൽകുന്നു. പ്രവീൺ പ്രഭാകർ എഡിറ്റിംഗും സുനിൽ ദാസ് പ്രൊഡക്ഷൻ ഡിസൈനും കൈകാര്യം ചെയ്യുന്നു.
സുനിൽ സിംഗ് (എക്സിക്യൂട്ടീവ് പ്രൊഡ്യൂസർ), രോഹിത് ആർ. നായർ (ലൈൻ പ്രൊഡ്യൂസർ), ദീപക് പരമേശ്വരൻ (പ്രൊഡക്ഷൻ കൺട്രോളർ), ബോസ് വി. (ചീഫ് അസോസിയേറ്റ് ഡയറക്ടർ) എന്നിവരാണ് അണിയറയിൽ. വിപിൻ കുമാർ വി, വൈശാഖ് സി. വടക്കേവീട്, ജിനു അനിൽകുമാർ എന്നിവർ ചേർന്ന് പി.ആർ.ഒ & ഡിജിറ്റൽ മാർക്കറ്റിംഗ് നിർവ്വഹിക്കുന്നു.
Story Summary: The international shooting schedule for Jayasurya’s upcoming mystery thriller ‘Maayan’, directed by Jithin K. Jose and produced by Rajeev Govindan, has officially commenced in Russia. Written by Raffi and Jithin K. Jose, the film explores ancient occult rituals and secret global networks.
