തിരുവനന്തപുരം: ചോദ്യപേപ്പർ വിതരണത്തിലുണ്ടായ സാങ്കേതിക തകരാറുകളെ തുടർന്ന് കേരള പബ്ലിക് സർവീസ് കമ്മീഷൻ (Kerala psc preliminary exam date) റദ്ദാക്കിയ പത്താം തരം പൊതു പ്രാഥമിക പരീക്ഷയുടെ പുതുക്കിയ തീയതി പ്രഖ്യാപിച്ചു. റദ്ദാക്കിയ പരീക്ഷകൾ വരും ഓഗസ്റ്റ് 22 ശനിയാഴ്ച രാവിലെ 10.30 മുതൽ ഉച്ചയ്ക്ക് 12.05 വരെ നടത്തുവാൻ പി.എസ്.സി തീരുമാനിച്ചു.
ജൂലൈ 18-ന് ഉച്ചയ്ക്ക് 1.30 മുതൽ 3.05 വരെ നടത്താൻ നിശ്ചയിച്ചിരുന്ന പത്താം തരം പൊതു പ്രാഥമിക പരീക്ഷയുടെ രണ്ടാം ഘട്ടമാണ് പൂർണ്ണമായി റദ്ദാക്കിയിരുന്നത്. ഇതോടൊപ്പം, ജൂലൈ 18 രാവിലെ 10 മുതൽ 11.35 വരെ ആലപ്പുഴ ജില്ലയിലെ ലജനത്തുൾ മുഹമ്മദീയ എച്ച്.എസ്.എസ് (Lajanathul Muhammadiya HSS) സ്കൂളിലെ സെന്റർ 2-ൽ (HSS വിഭാഗം) നടന്ന പരീക്ഷയും റദ്ദാക്കിയിരുന്നു. ഈ രണ്ട് വിഭാഗങ്ങളിലെ ഉദ്യോഗാർത്ഥികൾക്കുമായാണ് ഓഗസ്റ്റ് 22-ന് പുനഃപരീക്ഷ സംഘടിപ്പിക്കുന്നത്.
അതേസമയം, മുൻപ് ഓഗസ്റ്റ് 22-ന് നടത്താൻ നിശ്ചയിച്ചിരുന്ന ലീഗൽ മെട്രോളജി വകുപ്പിലെ ഇൻസ്പെക്ടിംഗ് അസിസ്റ്റന്റ് (കാറ്റഗറി നമ്പർ: 883/2025, 647/2025 – LC/AI) പരീക്ഷ നവംബർ 21-ലേക്ക് മാറ്റി വെച്ചതായും അധികൃതർ അറിയിച്ചു. പരീക്ഷാ കേന്ദ്രങ്ങൾ ഉൾപ്പെടെയുള്ള കൂടുതൽ വിവരങ്ങൾ കേരള പി.എസ്.സിയുടെ ഔദ്യോഗിക വെബ്സൈറ്റിൽ ലഭ്യമാണ്.
Story Summary: Kerala PSC announced the rescheduled date for the cancelled SSLC-level preliminary examination, which will now be held on August 22. Consequently, the Inspecting Assistant exam in the Legal Metrology department has been postponed to November 21.
